4. ०४. देवाचा अब्राहामाशी करार

मोहाखाडा काहीक वोराहा बाद, जगाम खुबुच लोक रेतला आथा, आन तीयाहां वापस परमेश्वरा आरी आन एकबिजा विरुदाम पाप केअयो. कहाका ते बादा एकुच भाषा गोगतला आथा, तीयाल ते एकत्र एकठ्ठा वेअया आन जगाम पोराय जावनु परमेश्वरा आदेशाल सोडीन एकुच नगर बनाव्यो.

ते खूब घमंडी आया, आन तीयाहन केह्की जीवन जीवनू हाय इया बाबतीम ते परमेश्वरा आदेशा पालेन नाय केरा आथा. दूंटी लुग की तीयाहांय एक रेहेडी मिनार बनावा सुरुवात केअयी की जी होरगा लुण पोली जाय. परमेश्वराय देख्यो की अगर ऐ एकत्र रीईन बुराई केअते रियेता, ते खुबुच पापी काये कि सेकतेह.

तीयाल परमेश्वराय तीयाहा भाषा खुबच वेगवेगळी भाषाय बदली देदी. आन तिया लोकात बादा जगाम फैलावी देदा. जिया नगराल तियाहांय बनावनु सुरुवात केअली तो बाबेल आखवाय आलो, जिया अर्थ हाय “गडबडी.” (गुसवाढ)

होव वोराहा बाद परमेश्वरने अब्राम नावा एक मांअहा आरी गोठ केअयी. परमेश्वराय तीयाल आख्यों, “ तोंअ देश आन कुटुंबाल सोडीन तिया देसाम निगी जो जियाल आंय तुल देखावीहिं आंय तुल आशीष दिहिं आन तोअस एक मोडी जाती बनावीहिं. आंय तोअ नांव मोडे कीही. जो तुल आशीष दी आंय तीयाल आशीष दीही. आन जो तुल श्राप दी आंय तीयाल श्राप दिहिं तोअ लिहे जगा बादा कुल अशीषित वोरी.”

शेवटी अब्रामाय परमेश्वरा गोठ मारी. तीयाय तिया बादा सेवक आन तिया बादी सम्पती लीईन तिया पत्नी सारै आन तिया देशाय, कनान देसाय निगी गियो जो परमेश्वराय तीयाल देखावलं आथो.

जाहां अब्राम कानान देसाय पोच्यों तलै परमेश्वराय तीयाल आख्यों, “ तोअ चारीवेल दोख. आंय तुल इ बाद हेस दीही आन तोअ वंश कायम इयावे अधिकार राखी.” तहां अब्राम तिया देसाम रा लाग्य.

माल्कीसिदिक नावा एक पुरुष आथो जो सर्वोग्य परमेश्वरा याजक आथो. एक दिही जांहा अब्राम युध्द किईन आवतलं ताहां तोअ आन अब्राम मिल्या. मेल्कीसिदी काय अब्रामाला आशीष देदी आन आंख्यों “ सर्वोग्य परमेश्वर जो होरगा आन तरती मालक हाय तो तुल आशीष दे. कायी अब्रामाय युध्दाम जिकली बादी वस्तूहं दशमांश मल्कीसिदीकाल देदी.

काहीक वोरेह निगी गिये, पेन आयी बी अब्राम आन सौरल एक बी पोयरं नाय आथों. परमेश्वरांय अब्राम आयी गोठ केअयी आन परत तिया आरी वायदो केअयो की तुल एक पोयरो वेरी. आन जेह्की आकासाम चांदुल्या हाय तेह्कीज तिया बी वंश वनी अब्रामाय परमेश्वरा वायदावे विश्वास केअयो. परमेश्वराय एक घोषणा केअयी की अब्राम एक धर्मी मांहू हाय काह्का तिया परमेश्वरा वायदा वे विश्वास केअयोह.

तांहा परमेश्वराय अब्रामा आरी एक वायदो केअयो. साधारण रीतीसे एक वायदो बेन गटाहा निसमे एक बिजा खातोर कामे केरा होमजवात आथो. परमेश्वराय अब्रामा आरी तो वायदो ताहा केअलो जाहा अब्राम हुवतल आथो. पेन तोअ तांहाबी परमेश्वरा उनातो आथो. परमेश्वराय आख्यों, “ आंय तोअ शरीराकी तुल एक खास पोयरो दिहिं. आंय तोअ वंशाला इं कनान देस दीटुं.” पेन आमी बी अब्रामाल एक बी पोयरों नाय आथों.