3. ०३. जल प्रलय (महापूर)

खूब दिह्या नंतर जगाम खूब लोक रेतला आया ते खूब दृष्ट आन उपद्रवी आया ऐ आता खाराब आया की परमेश्वराय एक मोठा महापुराकी आखों जण नाशकित गनी लेदलं.

पेन परमेश्वर नुहा से खुश आथो तो दुष्ट मांहाम रेनारो एक धर्मी व्यक्ती आयो. परमेश्वराय नुहाल आख्यों का एक मोउं खाड आवनारं हाय. इया खातोर तीयाय नुहाल एक मोठी नाव (उडी) बनावा आख्यो.

परमेश्वराय नुहाल लगभग १४० मीटर लांबी २३ मीटर जाडी आन १३.५ उंची उडी बनावा आखी. नुहाल ती लकडा बनावनु आथी आन तीयम तीन तोल, खूब खोल्या एक छत (हुळ) आन एक खिडकी बनावबु आयी. ती उडी नूह तिया परिवार, आन तरतीवेने हर एक प्रकार जनावराहान सूरक्षित राखे.

नुहाय परमेश्वरा गोठ मानी. तीयाय आन तिया पोयरा हाय तेह्कीज(उडी) बनावी जेह्की परमेश्वराय आखलं काहाका ती नाव(उडी) खूब मोडी आयी तियाल तिमोल बनावा खूब वरेहे लागले. नुहांय लोकाहान आवनारा खाडा विषयी चेतावनी देदी आन तीहांन परमेश्वरावेल फिरा आख्यों, पेन तियाहांय तीयावे विश्वास नाहा केअयो.

परमेश्वराय नूह आन तिया परिवाराला तीयाहा खातोर आन जानवराहा खातोर पुरे ओतो खादय इकठो केरा आदेश बी देदो. जाहा बादों तियार आयो. ताहा परमेश्वराय नुहाल आख्यों का ओ समय तीयाहा, तिया पत्नी, तियाहा तिनी पोयाहा आन तिया पोयरीही ऐहकी एकूण आक जांहाल उडीम जावनू आथों.

परमेश्वराय प्रत्येक जानवारल आन चिळाहान नर आन मादाल नुहा इही मोकल्यें कितें उडीम जाम आन खाडा समय सुरक्षित रे. परमेश्वराय ऐंहडे हर प्रकार जनावराहा सात नर आन सात मादा हान मोक्ल्ये जें की तीयाहा बली दाखातोर उपयोग केराम आवे. जाहा ते बादें उडीमपोची गिये ताह स्वतः परमेश्वराय उडी बांआडो (दरवाजो) बंद केअम.

तांहा पांय षडनू चालू वेअयो. आन पाय पडतो रियो नाय बंद वेअता चालीस दिही आन चालीस सत लुग पांय षडतो रियो. बादा जगा हर एक वस्तू इही लुग की उचाम-उया डगा बी पायांकी डुबी गिया.

हुळाली जमिनीवे रेनारी हर एक वस्तू मोय गिमी, तिया लोकाहान आन जनावराहान सोडीन जे उडीन आथे ती उडी पायोंवे तैरती आथी आन उडी माजमे हर एक वस्तू डुबनु से सुराक्षित राखी.

पांय बंद वेअनु बाद, पाय मोईन लुण ती उडी पांयाव तैरती आयी, आनी तिया समयीवे पांय कमी वेरा लाग्यो. तांहा एक दिही ती उडी एक पर्वता टेळळीवे जाईन ओटकी गियो पेन जग आमी बी पांयाकी बुजालं आथों तीन भोईना बाद पर्वताहां शेडुव्या देखांया लाग्या.

आन फाची चालीस दिह्या बाद, नुहांय एक नेंडाडाल इं देखा वाखरे मोक्ल्यो की पाय डुकायं का नाह. तोअ नेंढाडो हुळाली जमीन होदतो-होदतो ऐहे तेहे उडतो रियों, पेन तीयाल ऐहेडो किहीज जागो नाय मिल्यों.

फाची नुहांय एक कबुतरील बारे मोकली पेन तीयोल बी हुकाली जमीन नाय मिली, तीयालती नुहा पाही परत आली. एक आठवडया बाद तीयाय एक कबुतरील फाची मोकली, आन ती तियो चोचडीम जैतून एक दाग लीईन परत आली पांय(कमी) आटातो आथों आन चाडवे परत उगा लाग्यें.

नुहांय एक आठवडो लुग वाट जोवतो रिओ आन तिसऱ्यांदा तियो कबुतरील बारे मोकली इया टाईमावे तीयोल रांखातोर जागो मिली गियो आन ती परत नाय आली. पांय हुकाय रेह्लो आथो.

बेन मोईना बाद परमेश्वराय नुहाल आख्यों, “ आमी तूं आन तोअ परिवार(कुटुंब) आन बादे जनावरे उडी मीने बारे आवा. खूब बादे पोयरे आन नातू पंतु उत्पन्न करा, आन तरतीवे पोराय जा.” नूह आन तिया कुटुंब उडी बारे निगी आलो.

नूह उडी बारे आवून बाद, तीयाय एक वेदी बनावी आन बली खातोर उपयोगाम आवे रीहेडे हर प्रकारा जनावरामेने काहीक लीईन बली यठाय्वें परमेश्वर तिया बली कि खुश वेअयो आन नूह आन तिया कुटुंबाल आशीर्वाद देदो.

परमेश्वराय आख्यों, “ आय शपथ खाहुं की माहोंको केरानारा खोटा कामाहा कारणे आंय फाची कधीही तरतील शाप नाय दिंव कींवा खाडाकी जगा नाश नाय किंव मांहु तिया हानेनेज पापी हाय.

फाची परमेश्वराय तिया वायदा खुना रुपाम मेघधनुष बनाव्यों. जहा कधी वी आकासाम मेघ धनुष देखाय ता परमेश्वर इर्त केरीका तियाय काय वायदो केयोह आन तेह्कीज तिया लोक बी इर्त करी.