32. यीशु भुत भराएला आदमी ने अने मांदी बजेर ने हाजी करे है।

यीशु अने ऐना सेला आपडी जावड़ा म हणा जगा म जा जाह गिरासेनी मनख रेत हेत इ हणा जगा म पुगे ने नावडा थकी उतरी गया।

ता एक आदमी हेथो जी भूतात्मा भराएली हेथो।

यो आदमी ऐतरो बळवाळो हेथो के कई भी ऐने वस म ने करे सकतो हेथो। घणी वखत मनख वे ऐन हाय अने पोग ने हकोळ थकी होदो बदयो, पोंणे इते अणने तोड़ ददतो हेथो।

इते आदमी हणा जगा म कबर में रिय करतो हेथो। यो आदमी पुरो दाड़ो अने पूरी रातर सिसाय करतो हेथो इते सीसर ने पेरतो हेथो अने घडी-घडी खुद ने प्राण थकी घवाएलो करप करतो हेथो।

इते आदमी दोड़ेने यीशु कने आयो अने ऐना हामें घुस टेके देद। तेर यीशु वे हणा आदमी ने मय नी भूतात्मा थकी वाते करी अने केदो अणा आदमी म थकी बारत नकळे आव।

इते भूतात्मा उसी आवाज म सीसाई हे यीशु परम प्रधान परमेश्वर ना सोरा तारे मने थकी हु काम करपा करने ने मने नहे सतावे। तर यीशु वे हणी भूतात्मा थकी पुस्यु तारो नाम हु है? अणेवे जबाव आल्यो मारू नाम सेना है, केमके हमो घणस है।(रोमी सेना म कई हजार सैनिक नो एक झुण्ड एक सेना थाती हेथी।)

हणी भूतात्मा वे यीशु थकी ललुसरा करया, करपा करेने हमने अणि जगा थकी बारत नहीं काड तास मेड ना दोंगोर इपर हुवोर नो सक टोळो सरे रयो हेथो। ऐतरे हारू हणी भूतात्माओं वे यीशु थकी ललुसरा करया करेने हमने हण हुवोर में मोकल दे। यीशु वे केदो, ठीक है, हेनेम जात रो।

अतः ई भूतात्मा हणा आदमी म थकी नकळेने हण हुवोर म भराए गई इ हुवोर दोडेंने एक सोरी इपर थकी झील म पड़े ग्या अने दुबे मरया हणा झूठ म लमसम २००० हुवोर हेथा।

ता इते हण हुवोर नी थाळ देख करवा वाळा मनख हेथ। जी कई थायु हेथू जेर अवणे दिख्यु ते इ नगर म नाही ग्या। यीशु वे जी कार्यो हेथो ता अणेव हेत ने वताडयु। हणा नगर न मनख नकळे आय अने हणा आदमी ने दिख्यो जेनेम भूतात्मा देथी। इते आराम थकी, सीसर यरेने अने एक साधारण आदमी ने वाणीय वेवार करतो सको बेठो हेथो।

इ मनख घण संमके हेथ अने अणवे यीशु थकी जातो रेवा ने हारू केदो। अतः यीशु नावडा इपर सड़े जो। वयो आदमी जेवेम भूतात्मा हेथी अणवे यीशु ने हाते जावा नी ललुसरा करया।

पोंणे यीशु वे ऐने थकी केदू नाहु साहो है के तू घेर जाय ने हेत ने वताड की परमेश्वर वे तारे हारू हु करयो है। अणने वताड के केकेम परमेश्वर वे तने इपर दया करी हेथी।

ऐतरे हारू वयो आदमी जातो रयो अने हेत ने हणा बारा म वताडयु जी यीशु वे ऐने हारू करयु हेथू ऐनी कहानी ने हमळवा वाळा हरेक जणो थायो हेथो।

यीशु झील नी बिजी मरे फेट आयो ऐने ता पुगवा ने बाद एक मोटी भीड़ ऐने ऐटमेट भीळी थाई अने ऐने दबावा लागी। हणी भीड़ म एक बजेर हेथी जी बारा वरह थकी लुई बहवा नी तकलीफ थकी पीड़ा म हेथी। अणी वे आपड हेतू धन डॉक्टरो ने आला देद हेथो ताकि इ ऐने हाजी करे सके, पोंणे ऐनो रोग फेर होदो वगडे जो।

अणयी हमळयु तू के यीशु वे कई बीमार मनख ने ठीक करय है, अने अणयी हुम्यु अने विसवा है के अगर हु खाली यीशु न सीसर ने अड़े ले, तो हु होदी हाजी थाए जए ऐतरे हारू इते यीशु ने वहे थकी आवी अने ऐन सीसर ने मडे लेद। जेमेस अणयी अड़य लुई वहवो बंद थाए जू।

तरतेस यीशु वे जाण लेदो के ऐने माही सामर्थ नकळी है। ऐतरे हारू अणेवे वहे करे ने पुस्यु मने कोण अड़यु? सेल वे जबाव आल्यो आ ऐतर आख मनख वे तारे सारी मेट भीड़ लगाडी ली है। अने तने धकोले रिया है। तू केम पुसे है के मने कोण अड़यु है।

इते बजेर यीशु ने हामी दुसती थकी अने घणी समकेली थकी घुटन इपर वेहे गई। तर अणयी ऐने वताड देदु के अणयी वे हु करयो है। अने यूर होदो के इते ढिक थाए गई है। यीशु वे एने थकी केदू तारे विश्वावे तने हाजी करी है। आराम थकी जाती रे।