46. पौलुस मसीही विश्वासी बणे जाए है।

शाऊल नाम नो एक आदमी जणेवे यीशु इपर विशवास नहे करयो हेथो। जर यो जोवन हेथो तर अणे स्तिफनुस ने मारवा वाळ मनख न सीसर नी देखभाळ करी हेथी। बाद म अणे विश्वासियो ने सताय हेथू। अणे यरूशलेम म घेर घेर जाएने आदमजे या बजेर बेय ने गिरफ्तार करने जेलखाना म दड देद हेथ। तर महायाजक वे शाऊल ने दमिश्क गाव म जावा नी परमिशन आली। अणे तान विश्वासीयो ने गिरफ्तार करवा अने अणने पासा यरूशलेम लेने भावा ने हारू शाऊल थकी केदू।

अतः शाऊल वे दमिश्क जावा नो सफर शुर करयो। हणा गाव म पोगवा थकी थोडोक पेल ऐने सारी मेर हरग थकी एक घोळ् हजवाळु समको अने इते जगा इपर पड़े जो। शाऊल वे केनेक केत थक हमळयो हे शाऊल हे शाऊल तू मने कम सतावे रयो है? शाऊल वे पुसु हे प्रभु तू कोण है? यीशु वे जवाब आल्यो, हु यीशु हु। तू मने सतावे है।

जर शाऊल उठ्यो ते इते देखे नहे सकतो हेथो। ऐना दोस्त एने दमिश्क म लेने जा हेथा। शाऊल वे तिन दाड तक कई भी खाद या पिदो ने हेथो।

दमिश्क म हनन्याह नाम नो एक सेलो हेथो। परमेश्वर वे ऐने थकी केइ। हणा घेर म जा जाह शाऊल रोकाए लो है। आपड हाथ ने ऐने इपर मेल ताकी इते फेर थकी देखवा लागे। पोंणे हनन्याह केदू , हे प्रभु मै हमळयु है के हंणे आदमी वे विश्वासीयो न केकेम सताय है। परमेश्वर वे ऐने जवाब आल्यो जा मै ऐने यहूदियों म अने बिजी जातीय न मनख म मारा नाम नी घोषणा करवा ने हारू सुन लेदो है। इते मारा नाम ने हारू घनोस दुःख वेठ है।

अतः हनन्याह शाऊल ने मेड जो आपड हाथ ने ऐने इपर मेल्या अने केदू यीशु वे जी आ आवा ने तारे वाट म तने इपर प्रगट थायु हेथू मने तारे कने मोकल्यो हे ताळी तू फेर थकी देखवा लागे अने पवित्रआत्मा तेन भर दे। तरतेस शाऊल फेर थकी देखावा म सक्षम थाए जो अ हनन्याह वे ऐने बपतिस्मा आल्यो तर शाऊल वे खावानु खादु अने फेर थकी मजबूत थाए जो।

तर थकी शाऊल वे दमिश्क म रेवावाळ यहूदियों म प्रसार करवो शुरू कर देदु। अणे केइ यीशु स परमेश्वर नो सोरो है। यहूदी मनख अचंभित हेथ, केमके शाऊल वे ते विश्वासीयो ने मार दडवा नो कोशिश करी हेथी पोंणे आवु अणे यीशु म विश्वास करयो हेथो। शाऊल वे यहुदियो ने हाते वादविवाद कारयो अणे देखाडयु के यीशु ही मसीह हेथो।

घण दाड ने बाद यहूदियों वे शाऊल ने मार दडवा नी योजना बणावी। अणवे ऐने मार दडवा ने हारू गाम न बायणा इपर मनख ने मोकल्या। के एनी देखभाळ करे पोंणे शाऊल वे हणी योजना ने बारा म हमळ लेदुम अने ऐना दोस्त वे वसे ने नकळवा म ऐनी मदद करी एक रातर म अणवे ऐने होडला म बहाडे ने गाम नी दिवाळ थकी निस उतार देदो। दमिश्क थकी वसे ने नकळवा ने बाद शाऊल वे यीशु ना बारा म प्रचार करवो शुरू राख्यो।

शाऊल प्रेरितों थकी मळवा ने हारू यरूशलेम जो पोंणे इ ऐने थकी समकता हेथा। तर बरनबास नाम नो एक विश्वासी शाऊल ने प्रेरित ने मेड लेने जो। अणे अणने वताड्यू के शाऊल ने केकेम साहसी थाए ने दमिश्क म प्रसार कारयो हेथो। ऐने बाद प्रेरित वे शाऊल ने स्वीकार कर लेदो।

थोडाक विश्वासी जी येरूशलेम मा सताव थकी नाहे जा हेथा इ सिटी अन्तकिया नगर म नाहे जा हेथा अने यीशु ना बारा म प्रचार करता हेथा। अन्तकिया म रेवा वाळ मनख अधिकारी यहूदी ने हेथ पोंणे पेलखी वखत अणम थकी घण थक मनख विश्वासी बणे ज। बरनबास अने शाऊल अण नव विश्वासी ने यीशु ने बारा म अजु वइ शिकावड़ा ने हारू ता जा अने कलीसिया ने मजबूत कारय। यीशु इपर विश्वास करवा वाळ पेलखी वखत अन्तकिया म मसीह केवाया।

एक दाडो अन्तकिया न मसीह मनख उपवास ने हाते दूवा करी रया हेथा। पवित्र आत्मा वे अण थकी केइ मारे हारू बरनबास अने शाऊल ने हणा काम ने करवाने हारू अलग कर दो जेने करवा ने हारू में अणने बुलाया है। ऐतरे हारू अन्तकिया नी कलीसिया वे बरनबास अने शाऊल ने हारू दूवा करी अने अण इपर आपडे हाथ ने मेल्या। तर अणवे अणने बिजी घणीस जगा इपर यीशु न बारा म शुभ सन्देश नो प्रचार काराव ने हारू मोकल देदा। बरनबास अने शाऊल ने अलग अलग जातीय न मनख ने शिक्षा आली अने घण थक मनख वे यीशु म विश्वास करयो।