1. सृष्टिया दी काहणी

सुरु च परमात्मैं इस तरीके नैं सारी सृष्टिया जो बणाया। परमात्मैं छीं दिनां च संसारे जो कने जेह्ड़ा कुच्छ तिस च ऐ तिन्हां सबना चीज्जां जो बणाया। परमात्मे दे धरतिया जो बणाणे ते बाद धरतिया च नैहरा कने खाली थी, क्जोकि अल्ली तिकर परमात्मैं तिसा च कुसा भी चीज्जा जो नीं बणाया था। अपर परमात्मे दा आत्मा पाणिये ऊपर घूमदा था।

भिरी परमात्मैं पैहल्ले दिन ग्लाया, “परगड़ा होयैं!” कने परगड़ा होई गेआ। परमात्मैं दिख्या कि परगड़ा छैल़ लग्गा दा ऐ कने परमात्मैं परगड़े जो “दिन” ग्लाया। कने तिसते बाद परमात्मैं परगड़े जो नैहरे ते लग्ग कित्ता कने तिन्हीं नैहरे जो “रात ग्लाया। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ। परमात्मैं सृष्टिया जो बणाणे दे पैहल्ले दिनैं परगड़े कने रात जो बणाया।

भिरी दूयैं दिनैं परमात्मैं ग्लाया, “पाणिये ऊपर इक्क ऐदेया हिस्सा बणी जां” कने दिक्खा इक्क ऐदेया हिस्सा बणी गेआ। परमात्मैं इस हिस्से जो “अम्बर” ग्लाया।

भिरी त्रीयैं दिनैं परमात्मैं ग्लाया, “पाणी इक्की जग़ाह पर किट्ठा होई जां कने सूकी जमीन दुस्सैं। कने परमात्मैं तिसा सुकिया जमीना जो “धरती” ग्लाया कने पाणिये जो “समुंदर” ग्लाया। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ।

भिरी परमात्मैं ग्लाया, “धरतिया पर हर किस्मां दे रूख कने बूटे लूंगी पौन।” कने तिआं ई होई गेआ। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ।

भिरी चौथे दिनैं परमात्मैं ग्लाया, “अम्बरे च जोतियां बणी जान।” कने तिआं ई अम्बरे च सूरज, चंद्रमा कने तारेयां दियां जोतियां बणी गियां। परमात्मैं तिन्हां जोतियां जो धरतिया पर लौ दैणे तांई कने दिन कने रात, मौसमां कने सालां दे बारे च दस्सणे तांई बणाया। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ।

भिरी पंजमैं दिनैं परमात्मै ग्लाया, “पाणिये च तैरणे आल़े ज़िन्दे प्राणी कने अम्बरे च उडणे आल़े सारे पंछी बणी जान।” इस तरीके नैं परमात्मैं पाणिये च तैरणे आल़े ज़िन्दे प्राणियां कने अम्बरे च उडणे आल़े सारे पंछियां जो बणाया। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ कने तिन्हां जो आसीस दित्ती।

भिरी छेमैं दिनैं परमात्मैं ग्लाया, “धरतिया पर रैहणे आल़े सारे जानवर पैदा होई जान।” जिआं परमात्मैं ग्लाया तिआं ई होई गेआ। तिन्हां च कुच्छ पालतु जानवर, कुच्छ धरतिया पर पेटे दे भार चलणे आल़े, कने कुच्छ जंगली जानवर थे। परमात्मैं दिख्या कि जेह्ड़ा बणाया ऐ सैह़ छैल़ लग्गा दा ऐ।

भिरी परमात्मैं ग्लाया, “ओआ अहां माणुये जो अपणे सरूपे च बणान। सैह़ धरतिया पर कने सारे जानवरां पर अपणा अधिकार रखन।”

तिसते बाद परमात्मैं क्या कित्ता कि धरतिया ते चिक्क लेई कने तिसा चिक्का ते माणुये जो बणाया कने तिस च ज़िन्दगिया दा साह पाई दित्ता, कने सैह़ ज़िन्दा माणु बणी गेआ। परमात्मैं तिस माणुये दा नां आदम रखेया। परमात्मैं आदमैं जो रैहणे तांई इक्क बड़ा बड्डा अदन दा बगीचा बणाया कने तिस बगीचे दी रखवाल़ी करणे तांई तिसियो तित्थु रैहणे जो ग्लाया।

तिस बगीचे दे बिच परमात्मैं खास रूख लगाये, इक्क जिन्दगिया दा रूख कने इक्क भले-बुरे दे ज्ञाने दा रूख लगाया। परमात्मैं आदमैं नैं ग्लाया कि तू इस बगीचे दे सब रूखां दे फल़ां खाई सकदा ऐ, अपर जेहड़ा भले-बुरे दे ज्ञाने दा रूख ऐ, तिसदा फल़ तू कदी मत खांदा। क्जोकि जिस दिन तू तिस रूखे दा फल़ खांगा, तिस दिन तू जरूर मरी जांगा।

भिरी परमात्मैं ग्लाया, आदमैं दा किल्ला रैहणा ठीक नीं ऐ। अपर कोई भी जानवर आदमैं दा जोड़ीदार नी बणी सकेया, जेह्ड़ा तिस नैं मेल खाई सकदा था।

इसतांई परमात्मैं आदमैं जो गैहरिया निंदरा च सुआई दित्ता। भिरी परमात्मैं आदमैं दी इक्क पसल़ी कड्डी कने तिसा ते इक्क जणास बणाई कने तिसा जो आदमे अल्ल लेई आएया।

जाह़लू आदमैं तिसा जणांसा जो दिख्या तां तिन्हीं ग्लाया, “सच्ची! च एह़ मिन्जो साइआं ऐ! इसा जो जणांसा दे नांऐ ते जाणेयां जांगा, क्जोकि एह़ मर्दे ते बणाईयो ऐ।” इसा बज़ाह ते मर्द अपणे माँ-पियो जो छड्डी करी, अपणिया लाड़िया सौगी इक्क होई जांदा ऐ।

परमात्मैं मर्द कने जणांसा जो अपणे सरूपे च बणाया। तिन्हीं तिन्हां जो आसीस दित्ती कने तिन्हां जो ग्लाया, मते सारे बाल-बच्चे पैदा करा, कने सारिया धरतिया च फैली जा।” तिसते बाद परमात्मैं दिख्या कि जेह्ड़ा कुच्छ बणाया ऐ, सैह़ बड़ा छैल़ लग्गा दा ऐ, कने सैह़ तिन्हां सबना जो दिक्खी करी बड़ा खुस होएया। एह़ सब कुच्छ सृष्टि बणाणे दे छेमैं दिनैं होएया था।

जाह़लू सतमा दिन आएया तां जेह्ड़ा कुच्छ परमात्मे बणाया था तिन्हीं सारे कम्मां जो पूरा करी नै अराम कित्ता। तिन्हीं सतमे दिने जो आसीस दित्ती कने तिसियो पवित्र ग्लाया, क्जोकि तिस दिन तिन्हीं सारियां चीज्जां जो बणाई करी अपणे कम्मे जो पूरा कित्ता था। इस तरीके नैं परमात्मैं संसारे जो कने जेह्ड़ा कुच्छ तिस च ऐ तिन्हीं सबना चीज्जां जो बणाया।