2. पाप दा संसारे च औणां - काहणी

परमात्मैं मरद कने जणांस इक्की दूये सौगी रैह्णे तांई बणाये, कने सैह़ दोयो परमात्मे दे बणायो सुन्दर बगीचे च बड़े भरी खुस थे। तिस बग्त कोई कपड़े नीं हुंदे थे कने सैह़ दोयो नंगे रैंह्दे थे, भिरी भी तिन्हां दूनीं जो इसा गल्ला दी कोई भी शर्म नी हुंदी थी क्जोकि तिस बग्त संसारे च पाप नीं था। सैह़ दोयो हर-रोज तिस बगीचे च घूमदे-फिरदे थे कने परमात्मे नैं गल्लां करते थे।

अपर तिस बगीचे च इक्क सर्प था, कने सैह़ बड़ा चलाक था। तिन्हीं तिसा जणांसा ते पुछया, “क्या सच्ची च परमात्मैं तुहां जो एह़ ग्लाया ऐ कि इस बगीचे दे कुसी भी रूखे दे फल़े मत खांदे?”

तिन्नै जणांसा जबाब दित्ता, “परमात्मैं अहां नै ग्लाया ऐ कि अहां तिस भले-बुरे ज्ञाने दे रूखे दे फल़े जो छड्डी करी कुसी भी रूखे दा फल़ खाई सकदे हन। परमात्मैं अहां जो ग्लाया ऐ कि जे तुहां तिस रूखे दे फल़े जो खांगे कने तिसियो छूता भी, तां तुहां जरुर मरी जांगे।”

तिन्हीं सर्पैं जणांसा जो ग्लाया, “एह़ सच्च नी ऐ! तुहां नी मरगे। परमात्मा जाणदा ऐ कि जिआं ई तुहां तिस रूखे दे फल़े जो खांगे, तां तुहां परमात्मे साइआं होई जांगे कने जिआं भले कने बुरे ज्ञाने जो परमात्मा समझदा ऐ, तुहां भी समझणा लग्गी पोंगे।”

तिन्नै जणांसा दिख्या कि सैह़ फल़ खाणे तांई बड़ा स्वादिस्ट कने दिखणे च बड़ा छैल़ लग्गा दा ऐ। सैह़ भी अक्लमंद बणना चांह़दी थी, इसतांई तिन्नै तिस फल़े जो तोड़ी करी खाई लेआ। भिरी तिन्नै अपणे लाड़े जो भी सैह़ फल़ खाणे जो दित्ता कने तिन्हीं भी सैह़ फल़ खाई लेआ।

भिरी क्या होएया कि तिस रूखे दे फल़े खाणे ते बाद तिन्हां दियां अँखी इकदम खुली गैइयां, कने तिन्हां जो पता लग्गी गेआ कि अहां तां नंगे थे। तिसते बाद तिन्हां क्या कित्ता कि अपणे सरीरे जो ढकणे तांई पतरां जो जोड़ी-जोड़ी करी तिन्हां अप्पुं तांई कपड़े बणाणे दी कोशिश कित्ती।

ताह़लू आदमैं कने तिसदिया लाड़िया बगीचे च घुमदे-फिरदे होये परमात्मे दी उआज सुणी। सैह़ दोयो परमात्मे दे डरे ते लुक्की बैठे। ताह़लू परमात्मैं आदमे जो हक्क पाई, “आदम! तू कुत्थू ऐ?” आदमैं ग्लाया, “मैं बगीचे च घुमदे-फिरदे होये तुहां दी उआज सुणी, तां मैं डरी गेआ, क्जोकि मैं नंगा था। इसतांई लुक्की बैठेया था।”

भिरी परमात्मैं आदमे ते पुछया, “तिज्जो कुणी दस्सेया कि तू नंगा ऐ? क्या तैं सैह़ फल़ खाई लेआ ऐ जिसियो मैं खाणे तांई मना कित्या था?” आदमैं ग्लाया, “तुहां जेह्ड़ी एह़ जणांस दित्तियो ऐ इन्नैं मिन्जो सैह़ फल़ खाणे जो दित्ता।” ताह़लू परमात्मैं जणांसा ते पुछया, “तैं एह़ क्या कित्ता ऐ?” तिन्नैं जणांसा ग्लाया, “सर्पैं मिन्जो बैहकाई दित्ता।

परमात्मैं सर्पे जो ग्लाया, “तू श्रापित ऐ! तू अपणे पेटे दे भार चलगा कने चिक्का चटगा तू कने एह़ जणांस इक्की दूये नैं नफरत करगे, कने तेरी औलाद कने इसा दी औलाद भी इक्की दूये नै नफरत करगी। इसा जणांसा दा वंश तेरे सिरे कुचल़ी दिंगा, कने तू तिसदिया खुरिया जो डसगा।”

ताह़लू परमात्मैं जणांसा जो ग्लाया, “मैं तेरे बच्चे जम्मणे दे बग्त पीड़ा जो बधांगा। तेरी चाह तेरे लाड़े दी तरफ बणी रैंह्गी, कने सैह़ तिज्जो पर अपणा हक्क रखगा।”

परमात्मैं आदमैं नैं ग्लाया, “तैं अपणिया लाड़िया दी गल्ल सुणी ऐ कने मेरे हुक्मे दा पालन नीं कित्ता। इसतांई धरती श्रापित होई ऐ, कने तिज्जो अपणा पेट भरने तांई कड़ी मेहनत करणी पोंगी। भिरी तू मरी जांगा, कने तेरा सरीर मिट्टी ऐ कने मिट्टी च मिल्ली जांगा।” तिन्हीं आदमैं अपणिया लाड़िया दा नां हव्वा रखेया, जिसदा मतलब ऐ, “ज़िन्दगी दैणे आल़ी”, क्जोकि सैह़ सारी मानस-जात दी माँ बणगी, कने परमात्मैं जानवरे दिया खाला ते कपड़े बणाई करी आदम कने हव्वा जो पैहनाये।

भिरी परमात्मैं ग्लाया, “माणु हुण भले-बुरे जो जाणी करी अहां साइआं होई गेआ, इसतांई इन्हां दा इस बगीचे च रैहणा ठीक नीं, कुत्थी इआं ना होयैं कि सैह़ तिस ज़िन्दगिया दे रूखे दे फल़े जो खाई करी हमेसा तांई ज़िन्दे रेह़न।” इसतांई परमात्मैं आदम कने हव्वा जो तिस बगीचे ते बाहर कड्डी दित्ता। भिरी परमात्मैं तिस बगीचे दे दुआरे पर ताकतवर सुअर्गदूतां दा पैहरा लगाई दित्ता, तांजे कोई भी तिस ज़िन्दगिया दे रूखे दा फल़ नी खाई सकैं।