3. बाढ़ा दी काहणी

काफी बग्ते बाद, संसारे च मते सारे लोक रैंह्दे थे। सैह़ बुरे कम्मां कने खून-खराबा करणा लग्गी पेयो थे। इस बग्ते लोक इतणे पापी बणी गियो थे सैह़ कुसदा भी डर नीं मनदे थे। इन्हां लोकां जो दिक्खी करी परमात्मैं इक्क फैसला लेआ कि मैं इस पूरे संसारे जो इक्क खतरनाक बाढ़ कऱी नास करी दिंगा।

अपर तिस बग्त परमात्मे दी नजर नूह पर पेई। नूह तिन्हां पापी लोकां च इक्क धर्मी माणु था। कने परमात्मा नूहे ते बड़ा खुस था। ताह़लू परमात्मैं तिसा बाढ़ा दे बारे च नूह नैं ग्लाया, कि मैं खतरणाक बाढ़ करी नै इसा धरतिया जो नास करणे आल़ा ऐ। इसतांई परमात्मैं नूह जो इक्क बड्डा जाह्ज बणाणे तांई ग्लाया।

भिरी परमात्मैं नूह जो ग्लाया, कि तू इस नापे दे जरिये इक्क लकड़िया दा बड्डा जाह्ज बणा, कने तिस जाह्जे दी लम्बाई 140 मीटर, चौड़ाई 23 मीटर कने ऊँचाई 13.5 होणी चाइदी, कने तू जाह्जे च इक्की खिड़की, इक्क दरवाजा कने इक्क छत कने तिसदे अन्दर त्रै कमरे बणाया। परमात्मैं नूह जो ग्लाया, जाह़लू मैं इसा धरती च बरखा करगा तां, तू अपणे परवारे सौगी जाह्जे अन्दर चली जायां, कने सारे ज़िन्दे प्राणियां कने पंछियां कने जानवरां दा इक्क-इक्क जोड़ा जाह्जे च अपणे सौगी लेई जाई नैं अप्पु सौगी रखेयां।

तिन्हीं परमात्मे दे इस हुक्मे दे मताबक कित्ता। नूह कने तिसदेयां जागतां परमात्मे दे दस्सेयो नापे मताबक जाह्ज बणाया। क्जोकि सैह़ जाह्ज बड़ा बड्डा था इसतांई तिस जाह्जे जो बणाणे तांई मते साल लग्गे। नूहैं लोकां जो बाढ़ा दे बारे च चतौणी दित्ती, कने ग्लाया, कि परमात्मे पर बसुआस करा कने तिसदे सामणैं अपणे पापां दा पश्चाताप करा, अपर तिन्हां नूह दिया गल्ला पर कोई ध्यान नीं दित्ता, कने बुरे कम्मा च ई अपणी ज़िन्दगी जिन्दे रेह्।

परमात्मैं नूह कने तिसदे परवारे जो अपणे तांई कने सारे जानवरां तांई खाणा किट्ठा करणे दा हुक्म दित्ता। जाह़लू सब कुच्छ त्यार होई गेआ, ताह़लू परमात्मैं नूह जो ग्लाया, कि हुण तू अपणी लाड़िया, त्रिनी जागतां सौगी कने तिन्हां दियां लाड़ियां सौगी जाह्जे च चली जा। सैह़ सारे परवारे दे अठ जणे थे।

परमात्मैं सारे जानवर, जीव जन्तु कने पंछियां दे नर कने मादा नूह अल्ल घल्ली दित्ते, तांजे सैह़ नूह सौगी जाह्जे च जाई सकन कने बाढ़ा ते बची सकन। परमात्मैं हर किस्मां दे पशुआं दे सत नर कने सत मादा जो घल्लेया, जिन्हां दा इस्तेमाल बलिदान करणे तांई कित्ता जाई सकैं। जाह़लू सैह़ सारे जाह्जे अन्दर चली गै, ताह़लू परमात्मैं जाह्जे दा दरवाजा बन्द करी दित्ता।

ताह़लू बरखा लग्गी पेई, कने बरखा बिना रुके चाल़ी दिन कने चाल़ी रात लगातार हुंदी रेई कने धरती च पाणी इतणा भरी गेआ कि सब कुच्छ पाणिये च डुबी गेआ, बल्कि ऊचे ते ऊचे प्हाड़ भी डुबी गे।

बाकि धरतिया च रैहणे आल़े जानवर, पंछी कने सारे माणु पाणिये च डुबी करी मरी गै, जेह्ड़े जाह्जे च थे सिर्फ सैई जिन्दे बचे। कने जाह्ज पाणिये च तैरणा लग्गी पेआ।

बरखा रुकणे ते बाद, जाह्ज पंज मीहने पाणिये च तैरदा रेह्आ, कने जाह़लू पाणी घटणा लग्गी पेआ था, ताह़लू इक्क दिन जाह्ज प्हाड़े पर टिकी गेआ, अपर धरतिया च ताह़लू भी मता सारा पाणी था। त्रीं मीहनेयां बाद थोड़े-थोड़े प्हाड़ दुस्सणा लग्गे।

भिरी चाल़ी दिनां बाद, नूहैं इक्क कोगला एह़ दिखणे तांई जाह्जे दे बाहर घल्लेया कि क्या पाणी सुकी गेआ ऐ कि नीं। सैह़ कोगला सुकिया जमीना जो तोपदा-तोपदा तांह-तुंह उडदा रेह्आ अपर तिसियो सुकी जमीन नीं मिल्ली।

भिरी नूहैं इक्क कबूतरिया जो बाहर घल्लेया। अपर तिसा जो कुत्थी भी सुकी जमीन नी मिल्ली, इसतांई सैह़ वापस जाह्जे च आई गेई। नूहैं सतां दिनां बाद भिरी तिसा कबूतरिया जो जाह्जे बाहर घल्लेया, कने सैह़ संझा जो अपणिया चुंजा च जैतूने दे रुखे दा इक्क नौआं पतर लेई करी वापस आई गेई। इसते नूह जो पता लग्गी गेआ कि धरतिया च पाणी घटी गेआ ऐ।

नूहैं सत दिन होर इन्तजार कित्ता, कने त्री बरी भिरी तिसा कबूतरिया जो जाह्जे ते बाहर घल्लेया, इस बरी सैह़ वापस नीं आई। क्जोकि सारी धरतिया दा पाणी सूकणा लग्गी पेआ था।

दूँ मीहनेयां बाद परमात्मैं नूह नैं ग्लाया, “हुण तू कने तेरा परवार कने सारे जानवर जाह्जे बाहर निकल़ी ओआ। परमात्मैं तिन्हां जो आसीष दित्ती, कि मते सारे बच्चे पैदा करा कने सारी धरतिया च फैली जा।” ताह़लू नूह कने तिसदा परवार जाह्जे बाहर निकल़ी आएया।

नूह दे जाह्जे ते बाहर ओणे ते बाद, सबते पैहल्लैं इक्क वेदी बणाई कने परमात्मे तांई हर किस्मां दे जानवरां ते कुच्छ जानवरां दी भेंट चढ़ाई कने तिसदी अराधना कित्ती। परमात्मा इस बलिदान ते खुस होएया कने नूह कने तिसदे परवारे जो आसीस दित्ती।

भिरी परमात्मैं ग्लाया, “कि मैं तुहां नै वादा करदा ऐ कि भिरी कदी भी सारे प्राणियां जो बाढ़ा नैं नास नी करगा कने धरतिया दा नास करणे तांई बाढ़ नीं करगा; क्जोकि माणु अपणे बचपणे ते ई पापी ऐ।”

परमात्मैं ग्लाया, मैं बदल़े च अपणा धनुष रखेया ऐ। सैह़ मेरे कने धरती दे सारे प्राणियां सौगी मेरे वादे दी नसाणी हुंगी। जाह़लू मैं अम्बरे पर बदल़ां लैयोंगा ताह़लू बदल़ां च मेरे वादे दा धनुष दुस्सगा। तिसियो दिक्खी करी मैं तिस वादे जो याद करगा, ताह़लू ऐदई बाढ़ भिरी नीं हुंगी जिसते सारे प्राणियां दा नास होयैं।