4. अब्राहमे सौगी परमात्मे दा वादा - काहणी

बाढ़ा ते मते साल बाद, संसारे च मते लोक रैंह्दे थे, कने सारे संसारे च इक्क ई भासा कने इक्क ई बोली थी, इसतांई सैह़ सारे किट्ठे होई कऱी इक्की सैहरे जो बनाणा लग्गे। तिन्हां भिरी ते परमात्मे दे कने इक्की दूये दे खलाफ पाप करणा सुरु करी दित्ता। परमात्मैं धरती जो लोकां नैं भरने दा हुक्म दित्या था, अपर तिन्हां परमात्मे दे तिस हुक्मे दा पालन नी कित्ता।

सैह़ बड़े घमंडी थे, कने तिन्हां जो कदेई ज़िन्दगी जीणी चाइदी थी इस बारे च सैह़ परमात्मे दे हुक्मे दा पालन नीं करणा चांहदे थे। अपर तिन्हां इक्क ऐदई मीनारा जो बणाणा सुरू करी दित्ता जेह्ड़ी सुअर्गे तिकर पुज्जगी। परमात्मैं दिख्या कि जे सैह़ किट्ठे मिल्ली करी बुराई करदे रैंह्गे, तां सैह़ बड़े पापी कम्मां जो करी सकदे हन।

इसतांई परमात्मैं तिन्हां दिया भासा जो कने बोलिया जो बदली दित्ता कने तिन्हां लोकां जो सारे संसारे च फैलाई दित्ता। जिस सैहरे जो तिन्हां बणाणा सुरू कित्या था तिस सैहरे नां बेबीलोन रखेया, जिसदा मतलब ऐ “गड़बड़ी”

मतेआं सालां बाद, परमात्मैं अब्राम नांऐ दे इक्की माणुये नैं गल्ल कित्ती। परमात्मैं तिस नैं ग्लाया, “अपणे देसे कने परवारे जो छड्डी करी तिस देसे जो चलिया जेह्ड़ा मैं तिज्जो दस्सगा। मैं तिज्जो आसीस दिंगा कने तिज्जो ते इक्क बड़ी जाति बणांगा। मैं तेरा नां म्हान करगा, जेह्ड़ा तिज्जो आसीस दिंगा मैं तिसियो आसीस दिंगा, कने जेह्ड़ा तिज्जो श्राप दिंगा मैं तिसियो श्राप दिंगा। तेरे जरिये संसारे से सारे कुल़ आसीस पांगे।”

परमात्मे दे हुक्मे दे मताबक अब्राम सब कुच्छ छड्डी करी चली गेआ। अब्रामैं अपणिया लाड़िया सारै कने अपणे सारे सेवकां कने अपणिया सारिया धन-दौलता जो लेई करी कनान देसे जो चली गेआ जेह्ड़ा परमात्मैं तिसियो दस्सेया था।

जाह़लू अब्राम कनान देसे च पुज्जा तां परमात्मैं तिस नैं ग्लाया, “अपणे चौनी पास्सैं नजर करी नैं दिक्ख। मैं तिज्जो एह़ सारा देस दिंगा कने तेरा वंश हमेसा तांई इस देसे पर हक्क रखगा।” ताह़लू अब्राम तित्थु बसी गेआ।

मलिकिसिदक नांऐ दा इक्क माणु था जेह्ड़ा सर्वशक्तिमान परमात्मे दा याजक था। इक्क दिन जाह़लू अब्राम युद्ध करी वापस ओआ दा था तां मलिकिसिदक कने अब्राम मिल्ले। मलिकिसिदकैं अब्राम जो आसीस दित्ती कने ग्लाया, “सर्वशक्तिमान परमात्मा जेह्ड़ा सुअर्ग कने धरती दा मालिक ऐ सैह़ तिज्जो आसीस दिंगा।” भिरी अब्रामैं युद्धे च जीत्तियां चीज्जां दा दसमां हिस्सा मलिकिसिदके जो दित्ता।

मते साल होई गै, अपर अब्राम कने सारै दी कोई औलाद नी थी। परमात्मैं अब्रामे नैं गल्ल कित्ती कने भिरी वादा कित्ता कि तिज्जो तांई तेरिया लाड़िया सारै ते इक्क जागत पैदा हुंगा कने जिआं अम्बरे च तारे हन तिआं ई तेरा वंश भी हुंगा। अब्रामैं परमात्मे दे वादे पर बसुआस कित्ता परमात्मैं घोषणा कित्ती कि अब्राम इक्क धर्मी माणु ऐ क्जोकि तिन्हीं परमात्मे दे वादे पर बसुआस कित्या था।

ताह़लू परमात्मैं अब्रामे नैं इक्का वादा कित्ता। इसदे बारे च दिख्या जां तां इक्क वादा दूँ झुण्डा बिच इक्की-दूये तांई कम्मां जो करणे दा इक्क समझौता हुंदा ऐ। परमात्मैं अब्रामे नैं सैह़ वादा ताह़लू कित्ता था जाह़लू अब्राम सुतेया था, अपर सैह़ ताह़लू भी परमात्मे दियां गल्लां जो सुणी सकदा था। परमात्मैं ग्लाया, “कि मैं तेरिया लाड़िया सारै ते तिज्जो तांई इक्क जागते दी असीस दिंगा। मैं तेरे वंशे जो एह़ कनान देस दिंदा ऐ।” अपर अल्ली तिकर अब्रामे दा कोई जागत नीं था।