5. वादे दा पुत्तर - काहणी

अब्राम कने सारै दे कनान देस पुज्जणे दे दस साल बाद, अल्ली तिकर भी तिन्हां दी कोई औलाद नीं थी। इसतांई अब्रामे दिया लाड़िया सारै तिस नैं ग्लाया, “दिक्खा परमात्मैं मिन्जो अल्ली तिकर औलादी दा सुख नीं दित्ता ऐ कने हुण मैं औलादी दा सुख पाणे तांई बड़ी जबरी होई गियो ऐ, हुण सुणा, तुहां मेरी दासी हाजिरा दे जरिये मिन्जो तांई औलादी दा सुख देआ।”

भिरी अब्रामैं हाजिरा दे जरिये अपणिया लाड़िया सारै तांई इक्क जागते दा सुख दित्ता, कने अब्रामैं तिसदा नां इश्माइल रखेया। अपर सारै हाजिरा नैं जल़न करणा लग्गी। जाह़लू इश्माइल तेरांह सालां दा था, ताह़लू परमात्मैं भिरी अब्रामे नैं गल्ल कित्ती।

परमात्मैं ग्लाया, “मैं सर्वशक्तिमान परमात्मा ऐ। मैं तिज्जो सौगी इक्क वादा करदा ऐ।” ताह़लू अब्रामैं धरती च पेई करी परमात्मे जो प्रणाम कित्ता। परमात्मैं अब्रामे नैं एह़ ग्लाया, “तू मतिआं जातिआं दा पिता हुंगा मैं तेरे वंशे जो तिन्हां दी अपणी जमीन होणे तांई कनान देस दिंगा कने मैं हमेसा तांई तिन्हां दा परमात्मा हुंगा। तिज्जो अपणे परवारे दे हर मर्दे दा खतणा करणा ऐ।”

तेरी लाड़ी सारै इक्क जागते जन्म दिंगी, सैह़ वादे दा जागत हुंगा। तिसदा नां इसहाक रखेयां। मेरा वादा तिस सौगी भी बणी रैंह्गा, कने तिसते इक्क बड़ी बड्डी जाति बणी जांगी। मैं इश्माइल ते भी इक्क बड़ी बड्डी जाति बणांगा, अपर मेरा वादा इसहाक सौगी बणी रैंह्गा।” ताह़लू परमात्मैं अब्रामे दा नां बदली करी अब्राहम रखी दित्ता, जिसदा मलतब ऐ “मूलपिता” परमातमैं सारै दा नां भी बदली करी सारा रखी दित्ता, जिसदा मतलब ऐ “मूलमाता”

तिस दिन अब्राहमैं अपणे घराने दे सारे मर्दां दा खतणा कित्ता। इक्क साल बाद जाह़लू अब्राहम दी उम्र सौ साल कने सारा दी उम्र नब्बैं साल थी, ताह़लू सारा अब्राहमे दे जागते जो जन्म दित्ता। जिआं परमात्मैं तिन्हां जो ग्लाया था तिन्हां तिसदा नां इसहाक रखेया।

जाह़लू इसहाक जुआन होएया तां परमात्मैं अब्राहमे दे बसुआसे दी परख कित्ती, परमात्मैं ग्लया, “मिन्जो तांई अपने इक्कलौते जागते दी बल़ि चढ़ाई दे।” भिरी अब्राहमैं परमात्मे दे इस हुक्मे दा पालन कित्ता, कने अपणे जागते दी बल़ि चढ़ाणे तांई त्यार होई गेआ।

जाह़लू अब्राहम कने इसहाक बल़ि चढ़ाणे आल़िआ जगाह दी तरफ जाणा लग्गे तां इसहाकैं पुछया, “हे बापू, अहां अल्ल बल़ि चढ़ाणे तांई लकड़ू तां हन, अपर बल़ि चढ़ाणे तांई भेड्डा दा बच्चा कुत्थू ऐ?” अब्राहमैं जबाब दित्ता, “मेरे जागता, परमात्मा बल़ि चढ़ाणे तांई भेड्डा दे बच्चे दा इन्तजाम खुद करगा।”

जाह़लू सैह़ बल़ि चढ़ाणे आल़िआ जगाह च पुज्जे, ताह़लू अब्राहमैं वेदी बणाई करी लकड़ू चुणी-चुणी करी रखे, तिसते बाद अब्राहमैं इसहाके दे हत्थ पैर बन्नी करी वेदी पर लिटाई दित्ता। सैह़ अपणे जागते जो मारणे आल़ा ई था, कि परमात्मै तिसियो ग्लाया रुकी जा! जागते जो कुच्छ मत कर कने मत मार। क्जोकि तू मेरे तांई अपणे इक्कलौते जागते दी बल़ि चढ़ाणे तांई त्यार होई गेआ; हुण मैं जाणी गेआ कि तू परमात्मे दा डर मनदा ऐ।

ताह़लू अब्राहमै तित्थु बक्खैं झुड़ेयां च इक्क भेड्डा दा बच्चा फसेया दिख्या। अब्राहमैं जाई करी तिस भेड्डा दे बच्चे जो लेआ, कने तिसियो परमात्मे तांई बल़ि चढ़ाई दित्ता। क्जोकि परमात्मैं तित्थु तिन्हां तांई भेड्डा दे बच्चे दा इन्तजाम कित्या था। परमात्‍मा सिर्फ अब्राहमे दी परख करणा चांहदा था।

ताह़लू परमात्मैं अब्राहमे नैं ग्लाया, “तू मिन्जो अपणा सब कुच्छ दैणे तांई त्यार होई गेआ, ऐत्थू तिकर कि तू मेरे तांई अपणे इक्कलौते जागते दी बल़ि दैणे तांई त्यार होई गेआ, इसतांई मैं तिज्जो आसीस दैणे दा वादा करदा ऐ। तेरा वंश तारेयां ते भी जादा हुंगा। क्जोकि तैं मेरे हुक्मे दा पालन कित्ता ऐ इसतांई मैं तेरे परवारे दे जरिये संसारे दी सारी जातिआं जो आसीस दिंगा।”