6. परमात्मे दा इसहाके तांई इन्तजाम - काहणी

जाह़लू अब्राहम बड़ा जबरा होई गेआ था ताह़लू तिसदा जागत, इसहाक ब्याह करणे तांई जुआन होई गेआ था इसतांई अब्राहमैं अपणे इक्की दासे जो ग्लाया, कि तू तिस देसे च मेरे रिश्तेदारां अल्ल जा कने मेरे जागते इसहाके तांई इक्क लाड़ी लेई आ।

इक्क लम्मा सफर करणे दे बाद, अब्राहमे दा दास तिस सैहरे च पुज्जी गेआ जित्थु अब्राहमे दे रिश्तेदार रैंह्दे थे, ताह़लू परमात्मै तिस दासे दे सामणैं रिबका जो घल्लेया। सैह़ अब्राहम दे भाऊये दी पोतरी थी।

रिबका अपणे परवारे जो छड्डी करी, अब्राहमे दे दासे सौगी इसहाके दे घर जाणे जो राज्जी होई गेई। जिआं ई रिबका अब्राहमे दे घर पुज्जी, इसहाकैं तिसा नैं ब्याह करी लेआ।

कुच्छ बग्ते बाद, अब्राहम मरी गेआ। ताह़लू परमात्मैं अब्राहमे नैं जेह्ड़ा वादा कित्या था तिसदे मताबक, परमात्मैं इसहाके जो आसीस दित्ती। अपर इसहाके दिया लाड़िया रिबका जो कोई औलाद नीं होई सकदी थी। इसहाक मतिआं जातिआं दा पिता नीं बणी सकदा था जे तिस अल्ल इक्क भी जागत नीं हुंदा।

इसहाकैं रिबका तांई प्रार्थना कित्ती, कने परमात्मैं तिसदी विणती सुणी कने तिसदिया लाड़िया जो तिसी बग्त दोल़ू बच्चेयां दी आसीस दित्ती। जिस बग्त सैह़ बच्चे रिबका दे गर्भे च ई थे, सैह़ तिसा दे गर्भे च अप्पु च लड़णा लग्गे, इसतांई रिबका परमात्मे ते पुछया कि एह़ क्या होआ दा ऐ।

ताह़लू परमात्मैं रिबका नैं ग्लाया, “तू दूँ जागतां जो जन्म दिंगी। तिन्हां दे वंश दो लग्ग-लग्ग जतिआं बणगियां। सैह़ इक्की दूये नैं लड़गे, कने बडा जागत लोक्के दे अधीन रैंहगा।

जाह़लू रिबका दे बच्चेयां दा जन्म होएया, तां बडा जागत लाल था कने तिसदे सरीर च कम्बल़े साइआं बाल़ थे, कने तिन्हां तिसदा नां एसाव रखेया। ताह़लू लोक्का जागत एसावे दिया खुरिया जो पकड़ी करी जम्मेया, कने तिन्हां तिसदा नां याकूब रखेया।