7. परमात्मैं याकूब जो आसीस दित्ती - काहणी

जाह़लू सैह़ बच्चे बडे होई गै तां याकूब जो घरैं रैहणा खरा लग्गा, अपर एसावे जो जानवरां दा सिकार करणा खरा लग्गा। रिबका याकूबे नैं बड़ा लाड प्यार करदी थी, अपर इसहाक एसावे नैं बड़ा लाड प्यार करदा था।

इक्क दिन, जाह़लू इसहाक सिकार करी नैं वापस आया तां तिसियो बड़ी भुख लगियो थी, एसावैं अपणे लोक्के भाऊ याकूबे नैं ग्लाया, “जेहड़ा खाणा तैं बणाया ऐ तिस च थोड़ा खाणे जो मिन्जो भी दे।” याकूबैं जबाब दित्ता, “पैहल्लैं मिन्जो नैं एह़ वादा कर कि अपणा जेठे होणे दा हक्क मिन्जो देई दे, तां मैं तिज्जो सब कुच्छ खाणे जो देई दिंगा।” तिसी बग्त एसावैं अपणा जेठे होणे दा हक्क याकूबे जो देई दित्ता। तिसते बाद याकूबैं एसावे जो खाणा देई दित्ता।

इसहाक एसाव असीस दैणा चांहदा था। अपर इसहाक दे इआं करणे ते पैहल्लैं ईं, रिबका याकूबे जो एसावे दिया जगाह इसहाके अल्ल घल्ली करी धोखा कित्ता, कने याकूबैं एसाव बणी करी तिस नैं दिखावा कित्ता। क्जोकि इसहाक जबरा होई गेआ था कने तिसियो घट दुस्सदा था। इसतांई याकूबैं एसावे दे कपड़े पैहने कने अपणेयां हत्थां च कने गल़े च बकरिया दिया खला जो लपेटी लेआ।

याकूब इसहाके अल्ल आया कने ग्लाया, “मैं एसाव ऐ। मैं इसतांई आएया कि तू मिन्जो आसीस दैं।” जाह़लू इसहाकैं बकरिया दे बालां जो मसूस कित्ता कने तिसदे कपड़ेयां जो सुँघेया, तां तिन्हीं समझेया कि एह़ तां एसाव ऐ कने तिसियो आसीस दित्ती।

एसावैं याकूबे नैं बैर रखेया क्जोकि याकूबैं तिसदा जेठा होणे दा हक्क धोखे नैं लेई लेआ था कने तिन्हीं पिता ते आसीसा जो भी पाई लेआ था। तिसते बाद एसावैं इक्क योजना बणाई कि “मै अपणे पिता दे मरने ते बाद याकूब जान्नी ते मारी दैणा।

अपर रिबका एसावे दी योजना जो सुणी लेआ। इसतांई तिन्नैं याकूबे जो दूर अपणे रिशतेदारां अल्ल घल्ली दित्ता।

याकूब मते साल रिबका दे रिश्तेदारां सौगी रेह्आ। तिस बग्त याकूबैं ब्याह करी लेआ कने तिसदे बाराह जागत कने इक्क कुड़ी पैदा होई। परमात्मैं तिसियोँ अमीर बणाई दित्ता।

बीई साल तिकर कनान देस च अपणे घरे ते दूर रैहणे ते बाद, याकूब अपणे परवारे, अपणे दासां कने अपणै जानवरां जो लेई करी वापस आई गेआ।

याकूब बड़ा डरेया था क्जोकि सैह़ हुण भी एह़ सोचदा ऐ कि एसाव तिसियो जान्नी ते मारणा चांहदा ऐ। इसतांई तिन्हीं पैहल्लैं अपणे मते जानवर उपहार दैणे तांई कने अपणे दासां जो एसावे अल्ल घल्लेया। तित्थु जाई करी तिन्हां एसावे जो ग्लाया, “तेरा दास याकूब, इन्हां जानवरां जो तिज्जो दिंदा ऐ। सैह़ बस ऐत्थु वापस ओणे आल़ा ऐ।

अपर एसावैं याकूब जो पैहल्लैं ई माफ करी दित्या था। सैह़ तिसियो इक्क बरी भिरी दिक्खी करी बड़ा खुस होएया। तिसदे बाद याकूब कनान देसे च सान्तिया नैं रेह्आ। भिरी इसहाक मरी गेआ कने याकूबैं कने एसावैं तिसियो दफनाया। जेह्ड़ा वादा परमात्मैं अब्राहमे नैं कित्या था सैह़ हुण इसहाके ते याकूबे पर आई गेआ।