8. परमात्मैं यूसुफ कने तिसदे परवारे जो बचाया - काहणी

कनान देसे च रैंह्दे याकूब जो मते साल होई गियो थे। जाह़लू याकूब जबरा होई गेआ था, तां तिन्हीं अपणे लाडले जागते यूसुफे जो तिसदे भाऊआं दा हाल-चाल पता करणे तांई घल्लेया, कि सैह़ भेड्डां-बकरियां दी देखभाल करा दे हन।

यूसुफे दे भाई तिस नैं बैर रखदे थे क्जोकि तिन्हां पिता तिस नैं जादा प्यार करदा था कने इसतांई भी कि यूसुफैं सुपना दिख्या था कि सैह़ तिन्हां पर राज करगा। जाह़लू यूसुफ अपणे भाऊआं अल्ल आएया तां तिन्हां तिसियो अगवा करी लेआ कने तिसियो वपारियां अल्ल बेची दित्ता।

जाह़लू तिसदे भाऊ घर वापस आये तां तिन्हां यूसेफे दे कपड़े फाड़ी करी बकरिया दे खूने नैं रंगी दित्ते। भिरी तिन्हां सैह़ कपड़े अपणे पिता जो दस्सी करी ग्लाया कि तेरे जागते यूसुफे जो जंगली जानवरा खाई गेआ। इसा बुरिया घटना जो सुणी करी याकूब बड़ा उदास होएया।

वपारी यूसुफ जो मिस्र देसे जो लेई गे। मिस्र देस नील नदिया च बसेया इक्क बड़ा बडा कने ताकतवर देस था। तिन्हां वपारियां यूसुफे जो इक्क अमीर सरकारी अधिकारिये अल्ल गुलाम बणाई करी बेची दित्ता। यूसुफैं अपणे मालिके दी बड़ी सेवा कित्ती, कने परमात्मे यूसुफे जो आसीस दित्ती।

तिसदे बाद इआं होएया कि तिसदे मालिके दिया लाड़िया यूसुफे सौगी नाजायज रिश्ता बणाने दी कोशिस कित्ती, अपर यूसुफैं तिसा सौगी नाजायज रिश्ता नीं बणाया, तिन्हीं तिसा नैं ग्लाया, “मैं परमात्मैं दे खलाफ जाई करी इतणा बडा पाप नी करी सकदा।” इसा गल्ला जो सुणी करी सैह़ यूसुफे पर बड़ी गुस्सा होई, कने तिन्नैं तिस पर झूठा अरोप लगाई दित्ता। इसतांई तिसियो गिरफ्तार करी नैं जेला च पाई दित्ता। ऐत्थु तिकर कि यूसुफ जेला च भी, परमात्मैं सामणै सच्चा कने इमानदार रेह्आ, कने परमात्मैं तिसियो आसीस दित्ती।

दो साल बाद, बेकसूर होणे दे बाबजूद यूसुफ हुण भी जेला च था। इक्क रात मिस्र देसे दे राजैं, जिसदा नां फिरौन था, तिन्हीं राती दो सुपने दिक्खे जेह्ड़े तिसियो परेसान करदे थे। जेह्ड़े तिन्हीं सुपने च दिख्यो थे तिन्हां दा मतलब दस्सणे आल़ा कोई भी सलाहकार नीं था।

परमात्मैं यूसुफे जो सुपनेयां दा मतलब दस्सणे दी समझ दित्तियो थी, इसतांई फिरौन राजैं यूसुफे जो जेला ते अपणे अल्ल सदेया। यूसुफैं तिसियो तिन्हां सुपनेयां दा मतलब दस्सेया कने ग्लाया, “सारे मिस्र देसे च सत साल मती सारी फसल हुंगी, कने अगले सत साल अकाल पोणा ऐ।

फिरौन राजा यूसुफे ते बड़ा खुस होएया कि तिन्हीं मिस्र देसे दा दूया सबते ताकतवर माणु चुणेया। मतलब मिस्र देसे दा प्रधानमन्त्री बणाया।

यूसुफैं खरिया फसला आल़े सतां सालां च लोकां जो मता सारा अनाज किट्ठा करणे तांई ग्लाया, जाह़लू सत साल अकाल पेआ ताह़लू यूसुफैं लोकां जो सैह़ अनाज बेचेया तांजे तिन्हां सबना जो खाणे तांई पूरा अनाज मिल्ली सकैं।

सैह़ खतरणाक अकाल सिर्फ मिस्र देसे च ई नी, अपर कनान देसे च भी पैआ था जित्थु याकूब कने तिसदा परवार रैंह्दा था।

इसतांई याकूबैं अपणे सबते बडे जागतां जो अनाज खरीदणे तांई मिस्र देसे च घल्लेया। जाह़लू सैह़ अनाज खरीदणे तांई यूसुफे सामणैं आये तां तिन्हां भाऊआं यूसुफ जो नीं पणछैणया। अपर यूसुफैं तिन्हां जो पणछैणी लेआ।

यूसुफैं एह पता करणे तांई कि क्या मेरे भाऊआं अपणे आप्पे जो बदलेया ऐ या नीं, तिन्हां जो परखणे ते बाद, यूसुफैं तिन्हां नैं ग्लाया, “मैं तुहां दा भाऊ यूसुफ ऐ! डरा मत। जाह़लू तुहां मिन्जो गुलाम होणे तांई मिस्र देसे दे वपारियां अल्ल बेचेया था, तां तुहां तिस बग्त मेरा बुरा करणे दी ठाणियो थी, अपर परमात्मैं तिसा बुराईया जो भलाईया तांई इस्तेमाल कित्ता! हुण तुहां भी आई करी मिस्र देसे च रेह्आ तांजे मैं तुहां कने तुहां दे परवारे तांई अनाज दा इन्तजाम करी सकैं।

जाह़लू यूसुफे दे भाऊ अपणे घर वापस कनान देसे च आई गे कने अपणे पिते याकूबे जो दस्सेया कि यूसुफ तेरा जागत जिन्दा ऐ इसा गल्ला जो सुणी करी यूसुफ बड़ा खुस होएया।

तिस बग्त याकूब बड़ा जबरा होई गेआ था तमी सैह़ अपणे पूरे परवारे सौगी मिस्र देसे जो चली गेआ, कने सैह़ तित्थु बसी गे। याकूबे दे मरने ते पैहल्लैं अपणे हर इक्क जागते आसीर्वाद दित्ता।

परमात्मैं जेह्ड़ा वादा अब्राहमे नैं कित्या था, सैह़ इसहाक पर कने तिसदे बाद याकूब, कने तिसदे बारांह जागतां कने तिन्हां दे परवारे पर आई गेआ था। तिन्हां बारांह जागतां दे वंश इस्राएल देसे दे बारह गोत्र बणी गे।