9. परमात्मैं मूसा जो सद्देया - काहणी

यूसुफ दे मरणे ते बाद तिसदे सारे रिश्तेदार मिस्र देस च बसी गे। मते साल तिकर सैह़ कने तिन्हां दे वंश मिस्र देसे च ई रेह् कने तिन्हां दे मते बाल-बच्चे होये। तिन्हां इस्राएली लोक ग्लाया गेआ।

मतेआं साल्लां बाद, इस्राएली लोकां दी अबादी बड़ी जादा बधी गेईयो थी। मिस्र देसे दे लोक युसूफे जो कने जेह्ड़ा कुच्छ तिन्हां दी मदत करणे तांई कित्या था तिसियो भुली गियो थे मिस्र देसे लोक इस्राएली लोकां ते डरदे थे क्जोकि इस्रएली लोकां दी अबादी बड़ी जादा थी। इसतांई तिस बग्त मिस्र देसे पर राज़ करणे आल़े फिरौन राजैं इस्राएली लोकां जो मिस्री लोकां दा गुलाम बणाई दित्ता।

मिस्री लोकां इस्राएली लोकां बड़ा अत्याचार करी नैं हर कम्म करवाणे तांई मजबूर कित्ता। मिस्री लोकां दे जरिये तिन्हां पर हद ते जादा मेहनत करवाई करी तिन्हां दियां ज़िन्दगिया जो दुखां नैं भरी दित्ता। अपर परमात्मैं तिन्हां जो आसीस दित्ती कने तिन्हां दे मते बच्चे पैदा होये।

जाह़लू फिरौन राजैं दिख्या कि इस्राएली लोकां दे बड़े जादा बच्चे पैदा होआ दे हन, ताह़लू फिरौन राजैं अपणिया प्रजा दे लोकां जो हुक्म दित्ता, इस्राएली लोकां दे जितणे भी जगत पैदा होएयो हन तिन्हां सारेयां जो नील नदिया च पाई करी मारी देया।

तिस बग्त इक्क इस्राएली जणासा जागते जो जन्म दित्ता। तिन्नै कने तिसा दे लाड़ैं तिस बच्चे जो लक्काई करी रखेया।

जाह़लू तिस जागते दे माँ-पियो तिसियो जादा देर तिकर लक्काई नीं सके, तां तिन्हां तिसियो बचाणे तांई टोकरिया च पाई करी नील नदिया दे कनारे कनैड़े दे घाहे बिच रखी दित्ता। तिस जागते दी बड्डी बैहण दूर खड़ौई करी दिक्खा दी थी कि तिस जागते सौगी क्या हुंगा।

ताह़लू फिरौन राजे दी कुड़ी नौह्णे तांई तिसा नदिया च आई, कने तिन्नैं कनैड़े दे घाहे बिच फसियो टोकरी दिक्खी, तिन्नैं अपणियां दासियां जो तिसा टोकरिया जो लैयोणे तांई घल्लेया, कने तिन्नैं तिसा टोकरिया च इक्क बच्चे जो दिख्या, तां तिन्नैं तरस खाई नैं तिसियो अपणा जागत बणाई लेआ। भिरी तिन्नैं इक्क इस्राएली जणासा जो जागते जो दूद पिलाणे तांई रखी लेआ। अपर फिरौन राजे दी कुड़ी नी जाणदी थी सैह़ जणास तिस जागते दी सग्गी माँ ऐ। जाह़लू सैह़ जागत बड्डा होई गेआ तां तिन्नैं इस्राएली जणासा सोचेया हुण जागते जो माँऊ दे दूदे दी जरुरत नी ऐ, ताह़लू तिन्नैं तिस जागते जो फिरौन राजे दिया कुड़िया अल्ल वापस करी दित्ता, तिन्नैं तिसदा नां मूसा रखेया।

इक्क दिन, जाह़लू मूसा जुआन होएया, तां तिन्हीं दिख्या कि इक्क मिस्री माणु इस्राएली माणुये जो मारा दा ऐ। तां मूसैं अपणे तिस साथिये जो बचाणे दी कोसिस किती।

ताह़लू मूसैं सोचेया कि तिसियो कोई नीं दिक्खा दा ऐ, कने तिन्हीं तिस मिस्री माणुये जो मारी दित्ता कने तिसदिया लाशा जो रेता च दब्बी दित्ता। अपर मूसैं जेह्ड़ा कित्या था तिसियो कुणकी दिक्खी लेआ था।

जाह़लू फिरौन राजे जो इसा गल्ला दा पता लग्गा, ताह़लू तिन्हीं मूसा जो मारणे तांई योजना बणाई, अपर मूसा मिस्र देसे ते जंगले जो नठी गेआ। फिरौन राजैं दे सैनिक तिसियो तोपी नीं सके।

मूसा मिस्र देसे ते बड़ी दूर मिघान देसे च रैहणा लग्गा कने तिन्हीं तित्थु इक्की कुड़िया नैं ब्याह करी लेआ कने मूसा दूँ जागतां पियो बणी गेआ।

सैह़ तित्थु रेई करी अपणे सौरे यित्रो दियां भेड्डां चरा दा था। मूसे दा सौरा तिस देसे दा याजक था। इक्क दिन, मूसा जाह़लू अपणिया भेड्डां दी देखभाल़ करा था, तित्थु तिन्हीं दिख्या कि इक्क झाड़ी च अग्ग लगियो ऐ, अपर झाड़ी फकूया दी तां थी अपर नास नी होआ दी थी। मूसा तिसा जो दिखणे तांई तिसा झाड़िया अल्ल गेआ। जाह़लू सैह़ तिसा झाड़िया दे बक्खैं आई रेह्आ तां परमात्मे मूसे नैं गल्लां कित्तियां। परमात्मैं तिसियो ग्लाया, “ओ मूसे, तू अपणे जूतेयां खोली दे। जिसा जगाह पर तू खड़ौत्या ऐ सैह़ पवित्र जगाह ऐ।

परमात्मैं मूसे जो एह़ भी ग्लाया, “मैं अपणे लोकां दे दुखां जो दिख्या ऐ जेह्ड़े मिस्र देसे हन। मैं तिज्जो फिरौन राजे अल्ल घल्लगा तांजे तू इस्राएली लोकां जो मिस्र देसे दिया गुलामिया ते छड़ाई करी लेई ओयैं। मैं तिन्हां जो कनान देस दिंगा, सैह़ देस जिसदा दैणे दा वादा, मैं अब्राहम, इसहाक कने याकूबे नैं कित्या ऐ।”

मूसैं परमात्मे ते पुछया, “जाह़लू सैह़ लोक मिन्जो ते पुछगे कि तिज्जो कुणी घल्लेया ऐ, तां मैं तिन्हां लोकां नैं क्या ग्लांगा?” परमात्मैं मूसे नैं ग्लाया, “जेह्ड़ा मैं ऐ सैह़ मैं ऐ, तिन्हां जो ग्लाणा कि, जिन्हीं मिन्जो घल्लेया सैह़ तुहां दे पुर्वज अब्राहम, इसहाक कने याकूबे दा परमात्मा यहोवा ऐ कने सदा तिकर तिसदा नां ऐई रैंह्गा।

मूसा फिरौन राजे अल्ल जाणे ते डरदा था, क्जोकि सैह़ अटकी-अटकी करी ग्लांदा था, इसतांई परमात्मैं मूसे दे भाऊ हारूने जो तिसदी मदत करणे तांई घल्लेया।