10. दस मुसीबतां - काहणी

परमात्मैं मूसा कने हारून जो चतौणी दित्ती कि फिरौन राजा ढीठ होई जांगा। जाह़लू सैह़ फिरौन राजे अल्ल गे कने तिन्हां तिस नैं ग्लाया, इस्राएल देसे दा परमात्मा ग्लांदा ऐ, “मेरे लोकां जो छड्डी दे।” अपर फिरौन राजैं तिन्हां दी गल्ल नीं सुणी, अपर तिन्हीं तिन्हां नैं ग्लाया, कि मैं इस्राएली लोकां जो नीं छड्डणा, तिन्हीं होर कड़ी मेहनत करणे तांई तिन्हां जो मजबूर कित्ता।

फिरौन राजा होर ढीठ होई गेआ, कने तिन्हां लोकां जो छड्डणा नीं चांहदा था, इसतांई परमात्मैं मिस्र देसे दस खतरनाक मुसीबतां घल्लियां। इन्हां मुसीबतां दे जरिये परमात्मा दस्सणा चांहदा था, कि सैह़ फिरौन राजे ते कने मिस्र देसे दे देवतेआं ते जादा सामर्थी ऐ।

परमात्मै नील नदिया दे पाणिये जो खून बणाई दित्ता, अपर भिरी भी फिरौन राजा इस्राएली लोकां जो छड्डणा नीं चांहदा था।

परमात्मैं सारे मिस्र देसे च मेंढक घल्ले। फिरौन राजैं मेंढकां जो दूर लेई जाणे तांई मूसा नैं विणती कित्ती। जाह़लू फिरौन राजैं दिख्या कि सारे मेंढक मरी गे हन, ताह़लू फिरौन राजैं अपणे मने जो होर कठोर करी लेआ कने इस्राएली लोकां नीं छड्डेया।

इसतांई परमात्मैं मिस्र देसे च खतरनाक कटणे आल़िआं टिड्डियां दी मुसीबत घल्ली। तिसदे बाद तिन्हीं खून चुसणे आल़िआं मक्खियां घल्लियां। फरौन राजैं मूसा कने हारूने जो सदेया कने तिन्हां नैं ग्लाया कि जे तुहां तिसा मुसीबता जो रोकी दिंगे तां इस्राएली लोक मिस्र देसे जो छड्डी करी जाई सकदे हन। जाह़लू मूसैं प्रार्थना कित्ती तां परमात्मैं मिस्र देसे ते खून चुसणे आल़िआं मक्खियां जो दूर करी दित्ता। अपर फिरौन राजैं भिरी अपणे मने जो कठोर करी लेआ कने तिन्हां लोकां जो नीं छड्डेया।

इसते बाद, परमात्मैं मिस्री लोकां दे सारे पालतू जानवरां जो बमार करी दित्ता कने तिन्हां जो मारी दित्ता। अपर फिरौन राजे दा मन होर कठोर होई गेआ कने तिन्हीं इस्राएली लोकां जो छड्डेया।

ताह़लू परमात्मैं मूसे नैं ग्लाया, हत्थे च धुड़ ले कने तिसा जो फिरौन राजे दे सामणैं अम्बरे पास्सेयो सट्ट। जाह़लू तिन्हीं तिआं ई कित्ता तां मिस्र देसे दे लोकां कने जानवरां पर बड्डे-बड्डे फोड़े होई गे, अपर इस्राएली लोकां जो कुच्छ नी होएया। ताह़लू परमात्मैं फिरौन राजे दे मने जो कठोर करी दित्ता। फिरौन राजैं इस्राएली लोकां जो नीं छड्डेया।

इसते बाद, परमात्मैं मिस्र देसे पर अम्बरे ते ओले बरसाये , कने मिस्री लोकां दी सारी फसल बरबाद होई गेई, कने जेह्ड़ा कोई घरे ते बाहर निकलेया तिसियो मारी दित्ता। फिरौन राजैं मूसा कने हारूने जो सद्देया कने तिन्हां जो ग्लाया, “मैं पाप कित्या ऐ तुहां जाई सकदे हन। मूसैं प्रार्थना कित्ती कने अम्बरे ते ओले बरसणा रूकी गे।”

अपर फिरौन राजैं भिरी ते पाप कित्ता कने अपणे मने जो कठोर करी लेआ। तिन्हीं इस्राएली लोकां जो नीं छड्डेया।

भिरी परमात्मैं मिस्र देसे च हड्ड-गुआलियां दी मुसीबत घल्ली। इन्हां हड्ड-गुआलियां मिस्र देसे दिया सारिया फसला जो खाई लेआ, जेह्ड़ी फसल ओलेआं ते बची गेईयो थी।

भिरी परमात्मैं त्रै दिन मिस्र देसे च नेहरा करी दित्ता। एह़ नेहरा इतणा काल़ा था कि मिस्र देसे दे लोक घरां ते बाहर नीं निकल़ी सके। अपर जित्थु इस्राएली लोक रैंह्दे थे तित्थु परगड़ा था।

इन्हां नौ मुसीबतां दे बाद भी, फिरौन राजैं इस्राएली लोकां जो नीं छड्डेया कने छड्डणे ते मना कित्ता। क्जोकि फिरौन राजैं परमात्मे दी गल्ल नीं सुणी, इसतांई परमात्मैं इक्क आखरी मुसीबत घल्लणे दी योजणा बणांई। इसते फिरौन राजे दा मन बदली गेआ।