11. फसह दा त्योहार - काहणी

परमात्मैं मूसा कने हारून जो फिरौन राजे अल्ल एह़ ग्लाणे तांई घल्लेया कि इस्राएली लोकां जो छड्डी दे। तिन्हां तिसियो चतौणी दित्ती कि जे सैह़ तिन्हां लोकां जो नीं छड्डगा, तां परमात्मा मिस्र देसे दे लोकां दे कने जानवरां दे जेठे बच्चेयां जो मारी दिंगा। फिरौन राजैं एह़ सुणी करी भी परमात्मे पर बसुआस करणे ते कने तिसदी गल्ल मनने ते मना करी दित्ता।

भिरी परमात्मैं ग्लाया, कि जेह्ड़ा माणु मिन्जो पर बसुआस करगा मैं तिसदे जेठे जागते जो बचांगा। अपर हर परवार इक्क सुद्ध मेम्ने दा बल़ि चढ़ांगा।

परमात्मैं इस्राएली लोकां नैं ग्लाया, कि तुहां मेम्ने दे खूने जो अपणे दरवाजे दिया चौखाठा पर लगाई देया, कने सैह़ तिसा राती तिस मेम्ने जो भुनीकरी बिना खमीरे आल़िआ रोटिया नैं खाई लेआ। परमात्मैं एह़ भी ग्लाया कि खाणे ते बाद मिस्र देसे जो छड्डणे तांई त्यार रेह्आ।

जिआं परमात्मैं इस्राएली लोकां जो करणे तांई ग्लाया था तिन्हां तिसदे मताबक सब कुच्छ कित्ता। परमात्मैं ग्लाया, कि “तिसा राती जो मैं मिस्र देसे च होई करी जांगा, कने मिस्र देसे हर माणुये दे कने जानवरे दे जेठे बच्चेया जो मारी दिंगा।”

इस्राएली लोकां दे हर इक्की घरे दे दरवाजे पर मेम्ने दा खून लगेया था, इसतांई परमात्मैं तिन्हां घरां जो छड्डी दित्ता। कने सारे घर मेम्ने दे खूने दिया बज़ाह ते बची गे।

अपर मिस्री लोकां भिरी भी परमात्मे पर बसुआस नी कित्ता कने तिसदे हुक्मां दा पालन नीं कित्ता। इसतांई परमात्मैं तिन्हां घरां जो नीं छड्डेया। परमात्मैं मिस्री लोकां दे सारे जेठे जागतां जो मारी दित्ता।

मिस्री लोकां दे हर इक्क परवारे दे जेठे जागतां जो मारी दित्ता, जेला दे कैदियां दे जेठे जागतां ते लेई करी फिरौन राजे तिकर, हर इक्क जेठा बच्चा मरी गेआ। इसा घटना जो दिक्खी करी मिस्र देसे दे लोक रोणा कने सोक मनाणा लग्गे।

ताह़लू फिरौन राजैं तिस राती मूसा कने हारूने जो सद्दी करी ग्लाया, “तुहां इस्राएली लोकां सौगी झटफट मिस्र देसे ते चली जा।” मिस्र देसे दे लोकां भी इस्राएली लोकां जो जाणे तांई ग्लाया, कि झटपट चली जा।