12. इस्राएली लोकां दा मिस्र देसे ते चली जाणा (निर्गमन – काहणी)

मिस्र देसे ते अजाद होई करी इस्राएली लोक बड़े खुस थे। सैह़ हुण गुलाम नी थे, कने सैह़ वादे दे देस जो जा दे थे। जेह्ड़ा कुच्छ भी इस्राएली लोकां मंगेया था, मिस्री लोकां तिन्हां जो सब कुच्छ दित्ता, जिआं कि सोना, चाँदी कने कीमती चीज्जां भी। दूये देसां दे कुच्छ लोकां परमात्मे पर बसुआस कित्ता कने जाह़लू इस्राएली लोक मिस्र देसे ते चली पे तां सैह़ भी तिन्हां सौगी चली पे।

परमात्मे दिन दे बग्त च तिन्हां जो रास्ता दस्सणे तांई बदल़े दा खम्भा तिन्हां दे गांह-गांह चलाया। कने राती दे बग्त एह़ अग्गी दा खम्भा बणी गेआ। परमात्मा जेह्ड़ा कि तिस बदल़े दे खम्भे च कने अग्गी दे खम्भे च था, हमेसा तिन्हां सौगी था कने सफर करदे बग्त तिन्हां दी अगुआई करदा था। तिन्हां जो सिर्फ इतणा करणा था कि तिस खम्भे दे पचांह़ चलन।

कुच्छ बग्ते बाद, फिरौन कने तिसदे अधिकारियां दा मन बदलूई गेआ, कने सैह़ इस्राएली लोकां जो भिरी अपणा गुलाम बणाणा चांहदे थे। इसतांई तिन्हां इस्राएली लोकां दा पीछा कित्ता। एह़ परमात्मा ई था जिन्हीं तिन्हां दे मनां जो बदली दित्या था। परमात्मैं एह़ इसतांई कित्ता क्जोकि सैह़ चांहदा था कि हर कोई एह़ जाणी लैं कि फिरौन राजे कने मिस्री लोकां दे सारे देवतेयां ते, यहोवा परमात्मा बड़ा सामर्थी ऐ।

जाह़लू इस्राएली लोकां मिस्र देसे दिया सेना जो ओंदे दिख्या तां तिन्हां जो पता लग्गा कि सैह़ फिरौन राजे दी सेना तिन्हां दी पीछा करा दी ऐ कने इस्राएली लोक फिरौन राजे दी सेना कने लाल समुन्दरे बिच फसी गियो थे। क्जोकि सैह़ बड़े डरा दे थे कने रोणा लग्गे, “कि अहां मिस्र देसे जो क्जो छड्डी करी आये हुण अहां जो मरने ते कोई नीं बचाई सकदा।

मूसैं इस्राएली लोकां नैं ग्लाया, “डरा मत, परमात्मा अज्ज तुहां तांई लड़गा कने तुहां जो बचांगा।” ताह़लू परमात्मैं मूसा नैं ग्लाया, “इन्हां लोकां जो लाल समुन्दर पार करणे तांई ग्ला।”

ताह़लू परमात्मैं बदल़े दे खम्भे जो इस्राएली लोकां कने मिस्री लोकां दे बिच करी दित्ता तांजे मिस्री सेना इस्राएली लोकां जो नीं दिक्खी सकैं।

परमात्मैं मूसे जो ग्लाया, “समुन्दरे पर अपणा हत्थ बधा। तिआं ई मूसैं अपणा हत्थ बधाया कने समुन्दरे दे दो हिस्से होई गै कने तिस च जाणे तांई रस्ता बणी गेआ।

इस्राएली लोक समुन्दरे बिच सुकिया जमीना पर चलणा लग्गे, कने पार टपी गे।

ताह़लू परमात्मैं तिस बदल़े जो ऊपर करी लेआ तांजे मिस्री सेना इस्राएली लोकां समुन्दरे जो पार करदे दिक्खैं। मिस्री सेना तिन्हां जो पकड़णे तांई तिन्हां दा पीछा करणे दा फैसला लेआ।

इसते बाद इआं होएया कि मिस्री लोकां समुन्दरे दे बिच आल़े रस्ते पर इस्राएली लोकां दा पीछा कित्ता, अपर परमात्मैं मिस्री सेना जो डराई दित्ता कने तिन्हां दे रथां दे टेरां जो निकाल़ी दित्ता। सैह़ डड्डणा लग्गे, “नठा! इस्राएली लोकां दिया तरफा ते परमात्मा लड़ा दा ऐ।

सारे इस्राएली लोक समुन्दरे पार पुज्जी गे। ताह़लू परमात्मैं मूसे जो ग्लाया, कि भिरी समुंन्दरे दी तरफ हत्थ बधा। जाह़लू मूसैं हत्थ बधाया, तां समुन्दरे दा पाणी मिस्री सेना पर पेआ कने समुन्दर पैहल्ले साइआं होई गेआ कने सारी मिस्री सेना डूबी गेई।

जाह़लू इस्राएली लोकां दिख्या कि मिस्री लोक मरी गे हन तां तिन्हां परमात्मे पर बसुआस कित्ता कि मूसा परमात्मे दिया तरफा ते भविष्यवक्ता था।

इस्राएली लोक इसा गल्ला पर खुस थे क्जोकि परमात्मै तिन्हां जो मरने ते कने गुलाम बणने ते बचाई लेआ था। हुण सैह़ परमात्मे दी अराधना करणे कने तिसदे हुक्म दा पालन करणे तांई अजाद थे। इस्राएली लोकां अपणिया अजादिया दा खुसी मनाणे तांई कने परमात्मे दी महिमा करणे तांई मते गीत गाये। क्जोकि परमात्मे तिन्हां लोकां जो मिस्री सेना ते बचाया था।

परमात्मैं इस्राएली लोकां जो हुक्म दित्ता, कि सैह़ हर साल त्योहार मनान, इसा गल्ला जो याद करणे तांई कि किआं परमात्मैं मिस्री लोकां जो हराया कने तिन्हां जो गुलामिया ते बचाया। सैह़ इस त्योहारे जो इक्क सुद्ध मेम्ने दा बलिदान देई करी मनान कने तिस मेम्ने जो भुनीकरी बिना खमीरे दिया रोटिया सौगी खान। इस त्योहारे जो फसह दा त्योहार भी ग्लांदे हन।