13. इस्राएली लोकां सौगी परमात्मे दा वादा – काहणी

परमात्मैं इस्राएली लोकां जो लाल समुन्दरे पार करवाया, ताह़लू परमात्मा तिन्हां जो जंगले ते होई करी सीनै प्हाड़े पर लेई गेआ। एह़ सैई प्हाड़ था जित्थु मूसैं फकुदीं झाड़ी दिखियो थी। इस्राएली लोकां तिस प्हाड़े बक्खैं रेहणे तांई तम्बु बणाई दित्ते।

परमात्मैं मूसे नैं कने सारे इस्राएली लोकां नैं ग्लाया, “जे तुहां हमेसा मेरियां गल्लां दा पालन करगे कने जेह्ड़ा वादा मैं तुहां सौगी कित्या ऐ तिस पर बणी रैंह्गे, तां तुहां मेरे खास लोक हुंगे, एह़ सारी धरती मेरी ऐ, कने तुहां मेरिया नजरा च याजकां दा राज्ज कने इक्क पवित्र जाति बणगे।”

त्रै दिन तिकर सैह़ अपणे तन-मन जो सुद्ध करदे रेह् तांजे परमात्मा तिन्हां अल्ल आई सकैं। ताह़लू परमात्मा सीनै प्ह़ाडे पर आएया कने जाह़लू सैह़ आएया तां अम्बर गरजणा कने बिजल़ी चमकणा लग्गी, कने प्हाड़े पर काले बदल़ छाई गे, कने तुरहियां दी जोरे नैं अवाज़ आई। सिर्फ मूसे जो ई प्हाड़े पर ओणे दी इजाजत थी।

ताह़लू परमात्मैं लोकां नैं इक्क वादा कित्ता कने ग्लाया, “मैं तुहां दा परमात्मा, यहोवा ऐ। मैंई ऐ जिन्हीं तुहां जो मिस्र देसे दिया गुलामिया ते बचाया ऐ। कने मिन्जो छड्डी करी कुसी दूये देवते दी अराधना मत करदे।”

“तुहां अपणे तांई कोई मूर्ति मत बणाणा, ना तिन्हां दी भक्ति करना, क्जोकि मैं तुहां परमात्मा यहोवा जल़न रखणे आल़ा परमात्मा ऐ।” तुहां अपणे परमात्मे दा नां बेकार च मत लैंदा। तुहां बिस्राम दिने जो पवित्र मनणे तांई याद रखणा। तुहां छे दिन मेहनत करी नैं अपणे सारे कम्म करणा, सतमां दिन तुहां तांई बिस्राम करणे दा दिन होगा कने तिस दिन तुहां सिर्फ मेरी भक्ति करणा।”

“तुहां अपणे माँऊ-बुढ़े दा आदर करनेयों। तुहां कुसी दा खून मत करदे,व्यभिचार मत करदे, कने चोरी मत करदे, तुहां कुसी दे खलाफ झूठी गवाही मत दिंदे कने तुहां कुसी दे भी घरे दा लालच मत करणा, इसका मतलब एह़ कि पडेसिये दिया लाड़िया दा, तिसदे घरे दा, तिसदिया चीज्जां दा लालच मत करदे।

सारे लोकां इन्हां नियम-कानूनां दा पालन कित्ता जेह्ड़े परमात्मे तिन्हां जो दित्तेयो थे। सैह़ सिर्फ परमात्मे दे लोक होणे तांई कने परमात्मे दी अराधना करणे तांई राज्जी होई गे।

परमात्मैं इस्राएली लोकां जो इक्क बड्डा तम्बू बणाणे तांई भी ग्लाया, “इस तम्बू जो मिलाप आल़ा तम्बू ग्लाया था। परमात्मे तिन्हां जो ठीक-ठीक दस्सेया कि इस तम्बूये जो किआं बणाणा ऐ, कने तिसदे अन्दर कुणा चीज्जां जो रखणा ऐ। परमात्मे तिन्हां जो ग्लाया, कि तिस तम्बूये दे दो कमरे बणाणे तांई बिच इक्क बड्डा पड़दा लगाई देया। जिस कमरे च परमात्मे दी हजूरी हुंदी थी, तिस कमरे च सिर्फ महायाजक ई जाई सकदा था।”

परमात्मैं तिन्हां लोकां जो एह़ भी ग्लाया कि तिस बड्डे तम्बूये च इक्क वेदी बणा, एह़ इसतांई बणाई कि जेह्ड़ा कोई परमात्मे दे नियम-कनूनां दा पालन नीं करगा सैह़ अपणे पापां दी माफी तांई तिसा वेदिया पर इक्क जानवरे दा बलिदान परमात्मे तांई लैयोंगा। ताह़लू इक्क महायाजक तिस दी बल़ि दिंगा कने वेदी पर तिसियो फूकी दिंगा। परमात्मे ग्लाया, कि तिस जानवरे दा खून तिस माणुये दे पापां जो धोई दिंगा। भिरी परमात्मा तिसदे पाप जो नीं दिखगा। सैह़ माणु परमात्मे दिया नजरा च सुद्ध हुंगा। परमात्मैं मूसा दे भाऊ हारूने जो कने हारूने दे वंशे जो अपणा याजक होणे तांई चुणेया।

परमात्मे एह़ दस हुक्म पत्थरें दियां दूँ पट्टियां पर लिखी करी मूसा जो दित्ते। परमात्मे लोकां जो पालन करणे तांई होर भी मते नियम-कानून दित्ते। भिरी परमात्मे ग्लाया, “जे सैह़ लोक इन्हां नियम-कनूनां दा पालन करगे, तां परमात्मा अपणे वादे दे मताबक तिन्हां जो आसीस दिंगा।” परमात्मे एह़ भी ग्लाया कि जे सैह़ इन्हां नियम-कानूनां दा पालन नीं करगे तां सैह़ सज़ा दे हक्कदार हुंगे।

मते दिन तिकर मूसा सीनै प्हाड़े पर परमात्मे नैं गल्लां करदा रेह्आ। अपर लोक मूसा दे वापस ओणे दा इन्तजार करदे-करदे थकी गे। इसा बज़ाह ते सैह़ हारूने अल्ल सोना लेई नैं आये कने तिसियो इक्क मूर्ति बणाणे तांई ग्लाया, तांजे सैह़ परमात्मे दिया जगाह पर तिसा मूर्तिया दी भक्ति करी सकन। इस तरीकै नैं, तिन्हां बड़ा बुरा परमात्मे दे खलाफ पाप कित्ता।

हारूने बछुये दी इक्क सोने दी मूर्ति बणाई। भिरी लोक तिसा मूर्तिया दी भक्ति करणा लग्गी पे कने तिसा मूर्तिया सामणैं बल़ि चढ़ाणा लग्गे। तिन्हां दे पापां दिया बज़ाह ते परमात्मा तिन्हां पर बड़ा गुस्सा होएया कने तिन्हां जो नास करी दैणा चांहदा था। अपर मूसैं परमात्मे नैं प्रार्थना कित्ती कने परमात्मैं तिसदी प्रार्थना जो सुणेया कने तिन्हां जो नास नीं कित्ता।

तिसते बाद मूसा सीनै प्हाड़े ते लौई आएया, कने तिन्हीं तिसा मूर्तिया जो दिख्या, तां सैह़ तिसा मूर्तिया जो दिक्खी करी बड़ा गुस्सा होएया, कने जेह्ड़ियां मूसैं पत्थरे दियां दो पट्टियां पकड़ियां थियां, तिन्हां जो तिन्हीं प्हाड़े ते सट्टी करी तोड़ी दित्ता, क्जोकि जेह्ड़ा तिन्हां लोकां कित्ता सैह़ परमात्मे दे दस हुक्मां दे खलाफ था।

ताह़लू मूसैं तिसा मूर्तिया जो अग्गी च पाई करी फूकी दित्ता। कने तिसा जो पीई करी तिसा दे बुरादे जो पांणिये च मिलाई करी तिन्हां लोकां जो सैह़ पाणी पियाई दित्ता। परमात्मैं तिन्हां लोकां पर बड़ी बड्डी मुसीबत घल्ली, जिसा दिया बज़ाह ते मते लोक मरी गे।

ताह़लू सैह़ भिरी तिस प्हाड़े पर चढ़ी गेआ कने तिन्हीं प्रार्थना कित्ती, कि “हे परमात्मा इन्हां लोकां दे पापां जो माफ करी दे। परमात्मैं मूसा दी प्रार्थना सुणी कने तिन्हां लोकां जो माफ करी दित्ता। ताह़लू मूसैं जेह्ड़ियां पट्टियां तिन्हीं तोड़ी दित्तियां थियां तिन्हां साइआं तिन्हीं नौइआं पट्टियां बणाईयां।