14. जंगले च भटकणा - काहणी

भिरी इस्राएली लोकां जो सारे नियम दस्सणे ते बाद, परमात्मैं तिन्हां लोकां दी अगुवाई सीनै प्हाड़े ते लेई करी कनान देस तिकर कित्ती। परमात्मा बदल़े दा खम्भा बणी करी तिन्हां दे गांह-गांह चलेया, कने सैह़ तिसदे पचांह्-पचांह् चले।

परमात्मैं अब्राहम, इसहाक कने याकूबे नैं वादा कित्या था कि मैं वादे दा देस तिन्हां दे वंशे जो दिंगा, अपर इस बग्त तित्थु मतिआं जातिआं दे लोक रैंहदे थे। सैह़ लोक कनानी जाति दे कैहलांदे थे। एह़ कनानी लोक परमात्मे दी अराधना नी करदे थे कने तिसदे हुक्मां दा पालन भी नीं करदे थे। सैह़ झूठे देवतेयां दी भक्ति करदे थे कने बुरेयां कम्मां करदे थे।

परमात्मैं इस्राएली लोकां नैं ग्लाया, “जाह़लू तुहां तिस वादे दे देस च जान तां तित्थु दे सारे कनानी लोकां ते छुटकारा पाई लेआ। तिन्हां सौगी यारी-दोस्ती मत बणाणा कने ना ई तिन्हां सौगी ब्याह करणा। तुहां तिन्हां दियां सब मूर्तियां जो नास करी दिनेयों। जे तुहां मेरे हुक्मां दा पालन नीं करगे, कने मेरे बदले तिन्हां दे देवतेयां दी भक्ति करगे तां तुहां सज़ा दे हक्कदार हुंगे।

जाह़लू इस्राएली लोक कनान देसे दिया सीमा अ अल्ल पुज्जे, ताह़लू मूसैं इस्राएल देसे दे हर इक्क गोत्रे ते इक्क-इक्क करी नैं बाराह माणु जो चुणे। तिन्हीं तिन्हां माणुआं जो हुक्म दित्ता कि जा कने तिस कनान देसे दा पता लग्गा कने दिक्खी करी ओआ कि सैह़ कदेया देस ऐ। तिन्हां जो इसतांई भी घल्लेया कि सैह़ पता लगान कि कनानी लोक कितणे ताकतवर कने कितणे कमजोर हन।

तिन्हां बारांह माणुआं चाल़ी दिन कनान देसे च सफर कित्ता, कने भिरी सैह़ वापस आई गे। तिन्हां लोकां जो दस्सेया, “कि तित्थु दे खेत कने धरती बड़ी उपजाऊ ऐ। अपर तिन्हां च दसां ग्लाया, “तिन्हां दे सैहर बड़े ताकतवर हन कने तित्थु दे लोक बड़े हटे-कट्टे हन! जे अहां तिन्हां पर हमला करदे हन, तां सैह़ जरुर अहां जो हराई दिंगे कने अहां जो मारी दिंगे।”

तिस बग्त कालेब कने यहोशू कने दूये दो माणु ग्लाणा लग्गे, “एह़ सच्च ऐ कि कनान देसे दे लोग लम्मे हटे-कट्टे कने ताकतवर हन, अपर अहां तिन्हां जो हराई सकदे हन! परमात्मा अहां तांई लड़ेगा।”

अपर लोकां कालेब कने यहोशू दी नीं सुणी। सैह़ मूसा कने हारून पर गुस्सा होई गे कने ग्लाणा लग्गे, “तुहां अहां जो इस खतरनाक जगाह पर क्जो लेई नैं आएयो हन? अहां जो मिस्र देसे च ई रैहणा चाइदा था। जे अहां तिस देसे च जांदे हन तां अहां लड़ाई च मारे जांगे, कने कनान देसे दे लोक अहां दियां लाडियां कने बच्चेयां जो गुलाम बणाई लेंगे।” सैह़ लोक इक्क नौआ अगुवा चुणना लग्गे तांजे सैह़ तिन्हां जो मिस्र देसे च वापस लेई जां।

जाह़लू तिन्हां लोकां इआं ग्लाया तां परमात्मा बड़ा गुस्सा होई गेआ था। सैह़ मिलाप आल़े तम्बू च आया कने ग्लाणा लग्गा, “तुहां मेरे खलाफ बगाबत कित्ती ऐ, इसतांई तुहां सबना जो भटकणा हुंगा। तुहां च हर इक्क माणु जेह्ड़ा बीई साल या तिसते जादा उम्रा दा ऐ तित्थु मरी जांगा कने कदी भी तिस देसे च जाई नीं पांगा। जेह्ड़ा देस मैं तुहां जो दैणा ऐ। सिर्फ कालेब कने यहोशू तिस देसे च जाई सकगे।”

जाह़लू लोकां परमात्मे जो इआं ग्लांदे सुणेया, तां सैह़ दुखी होये क्जोकि तिन्हां पाप कित्या था। इसतांई तिन्हां कनान देसे दे लोकां पर हमला करणे दा फैसला कित्ता। मूसैं तिन्हां जो चतौणी दित्ती कि यहोवा परमात्मा तुहां सौगी नीं ऐ, मत जा, नीं तां तुहां दुश्मणा ते हरी जांगे, अपर तिन्हां मूसे दी गल्ल नीं सुणी।

परमात्मा इसा लड़ाईया च तिन्हां सौगी नीं था, इसतांई कनानी लोकां तिन्हां जो हराई दित्ता कने तिन्हां च कुच्छ लोक मारे भी गे। ताह़लू इस्राएली लोक कनान देसे ते वापस हट्टी आये। कने इस्राएली लोक अगले चाल़ी साल तिकर जंगले च तां-तुंह भटकदे रेह्।

जाह़लू इस्राएली लोक चाल़ी साल्ल तिकर जंगले च भटकदे रेह्, ताह़लू परमात्मैं तिन्हां दी हर जरूरत पूरी कित्ती, तिन्हीं तिन्हां जो सुअर्गे ते रोटी दित्ती, “जिसियो मन्ना ग्लांदे हन।” परमात्मे तिन्हां दे तम्बूआं च छोटे-छोटे बटेरू पंछि घल्ले तांजे तिन्हां अल्ल खाणे तांई माँस भी होयैं। इन्हां चाल़ियां साल्लां च ना तां कुसी दे कपड़े पराणे होये, कने ना तां तिन्हां दे जूते फटे।

परमात्मैं तिन्हां जो पीणे तांई चमत्कारी रुपे नैं चट्टाना ते पाणी भी दित्ता। अपर एह़ सब कुच्छ मिलणे ते बाद भी इस्राएली लोक परमात्मे दे खलाफ कने मूसा दे खलाफ बुड़बुड़ांदे रेह्। भिरी भी परमात्मा अपणे वादे पर बसुआसे जोग्गा बणी रेह्आ जेह्ड़ा तिन्हीं अब्राहम, इसहाक कने याकूबे नैं कित्या था।

इक्क बग्त होर आएया, जाह़लू इस्राएली लोकां जो पीणे दा पाणी नीं मिला, तां परमात्मैं मूसे नैं ग्लाया, “जाह़लू तू चट्टाना जो पाणी दैणे तांई ग्लांगा, ताह़लू तिसा चट्टाना च पाणी अप्पुं निकलणा लग्गी पोंगा।” अपर मूसैं चट्टाना जो ग्लाणे दिया जगाह पर तिन्ही दो बरी सोठिया नैं मारेया। इस तरीके नैं तिन्हीं परमात्मे दे हुक्मे दा पालन नीं कित्ता। ताह़लू चट्टाना ते पीणे तांई पाणी तां निकल़ी आएया, अपर परमात्मा मूसा पर बड़ा गुस्सा होएया कने ग्लाया, “तू मेरे हुक्मे दा पालन नीं कित्ता इसतांई तू वादे दे देसे च जाई नीं पांगा।”

जाह़लू इस्राएली लोकां दा चाल़ी साल तिकर जंगले च भटकणे दा बग्त पूरा होई गेआ था, ताह़लू जिन्हां परमात्मे नैं बगाबत कित्तियो थी सैह़ सारे मरी गियो थे। ताह़लू परमात्मैं भिरी लोकां जो वादे दे देस घल्लेया कने तिन्हां दी अगुआई कित्ती। मूसा बड़ा जबरा होई गेआ था, तिसदी मदत करणे तांई परमात्मे यहोशू जो चुणेया कि सैह़ लोकां दी अगुआई करी सकैं। परमात्मैं मूसे नैं वादा कित्ता कि इक्क दिन सैह़ तिन्हां लोकां अल्ल मूसे साइआं इक्क भविष्यवक्ता घल्लगा।

ताह़लू परमात्मैं मूसे जो इक्क प्हाड़े दिया चोटिया पर जाणे तांई ग्लाया तांजे सैह़ वादे दे देस दिक्खी सकैं। मूसैं वादे दे देस जो दिख्या अपर परमात्मैं मूसे जो तिस देसे च जाणे दी इजाजत नीं दित्ती। तिसते बाद मूसा मरी गेआ कने इस्राएली लोकां तीई दिन सोग मनाया। यहोशू तिन्हां दा नौआं अगुआ बणी गेआ। यहोशू इक्क खरा अगुआ था क्जोकि तिन्हीं परमात्मे पर बसुआस कित्ता कने तिसदे हुक्मां दा पालन कित्ता।