15. वादे दा देस - काहणी

आखर च, हुण सैह़ बग्त आई गेआ था कि इस्राएली लोक वादे दे देस कनान च जाई सकन। तिस देसे च इक्क यरीहो सैहर था। तिसदी सुरक्षा तांई तिसदे चौंनी पास्सैं मजबूत दिवारां थियां। यहोशूयैं तिस सैहरे च दूँ भेतियां जो घल्लेया। तिस सैहर च इक्क राहाब नांए दी इक्क वेश्या रैंह्दी थी। तिन्नैं इन्हां दूँ भेतियां जो अपणे घरे च लक्काई लेआ, कने तिन्हां दी नठणे च मदत कित्ती क्जोकि सैह़ परमात्मे पर बसुआस करदी थी। तिन्हां कसम खादी कि इस्राएली लोक जाह़लू यरीहो सैहरे जो नास करगे ताह़लू सैह़ राहाब कने तिसदे परवारे दी रक्षा करगे।

इस्राएली लोकां वादे दे देस च जाणे तांई यरदन नदी पार करणी पोणी थी। परमात्मैं यहोशूये नैं ग्लाया, “याजकां जो पैहल्लैं जाणा दे।” जाह़लू याजकां नदिया च अपणे पैर रखे तां पाणी थमी गेआ, जिसते कि इस्राएली लोक नदिया दी पारली तरफ सूकिया जगाह पर जाई सकन।

जाह़लू सारे इस्राएली लोकां यरदन नदिया जो पार करी लेआ, ताह़लू परमात्मैं यहोशूये नैं ग्लाया कि यरीहो सैहरे पर हमला करणे जो त्यार रेह्, अपर यरीहो बड़ा ताकतवर सैहर था। परमात्मैं तिन्हां लोकां नैं ग्लाया, कि याजकां कने सैनिकां जो छे: दिन चौनी पास्सैं चक्कर लगाणा ऐ। याजकां कने सैनिकां तिआं ई कित्ता।

भिरी सतमैं दिनैं, इस्राएली लोकां तिस सैहरे दे चौनी पास्सैं सत बरी होर चक्कर लगाये। जाह़लू सैह़ सैहरे दे चौनी पास्सैं चक्कर लग्गा दे थे, ताह़लू याजकां अपणियां तुरहियां बजाईयां कने सैनिक जोरे नै चिल्ला दे थे।

सातमां चक्कर लगाणे ते बाद यरीहो सैहरे दी दिवार चौंनी पास्सैं ते ढेई गेई। ताह़लू इस्राएली लोकां परमात्मे दे हुक्मे मताबक, जेह्ड़ा कुच्छ तिस सैहरे च था सब कुच्छ नास करी दित्ता। तिन्हां सिर्फ राहाब कने तिसदे परवारे जो छड्डी दित्ता, क्जोकि सैह़ इस्राएली लोकां च शामिल होई गियो थे। जाह़लू कनान देसे च रैहणे आल़े दूयेयां लोकां सुणेया कि इस्राएली लोकां यरीहो सैहरे जो नास करी दित्ता ऐ, तां सैह़ बड़े डरी गे।

परमात्मैं इस्राएली लोकां जो हुक्म दित्या था कि कनान देसे च रैहणे आल़ी कुसा भी जाति सौगी सान्ति दा समझौता मत करणा। अपर कनान देसे च रैहणे आल़ी इक्क टौली, जेह्ड़ी गिबोनी जाति कैहलांदी ऐ तिन्हां यहोशूये सौगी झूठ ग्लाया कि अहां दूर देस दे रैहणे आल़े हन। तिन्हां यहोशूये नैं ग्लाया, कि तुहां अहां नैं सौगी सान्ति दा समझौता करी लेआ। अपर यहोशूयैं कने इस्राएली लोकां परमात्मे ते नीं पुछया, कि सैह़ गिबोनी लोक कुत्थु ते हन। तिन्हीं तिन्हां लोकां सौगी सौगी सान्ति दा समझौता करी लेआ।

त्रीं दिनां बाद, इस्राएली लोकां जो पता लग्गा कि गिबोनी लोक कनान देसे च ई रैंह्दे हन। सैह़ बड़े गुस्सा होई गे क्जोकि गिबोनी लोकां तिन्हां जो धोखा दित्या था। अपर इस्राएली लोकां गिबोनी लोकां सौगी सौगी सान्ति दा समझौता बणाई रखेया था क्जोकि सैह़ परमात्मे सामणैं कित्या था। ताह़लू कुच्छ बग्ते बाद, कनान देसे च रैहणे आल़े दूये लोकां कने एमोरी लोकां दे राजैं सुणेया कि गिबोनी लोकां इस्राएली लोकां सौगी सौगी सान्ति दा समझौता करी लेआ ऐ, इसतांई तिन्हां अपणियां-अपणियां सेना जो किट्ठा कित्ता कने इक्क बड्डी सेना बणाई कने गिबोनी लोकां पर हमला करी दित्ता। गिबोनी लोकां यहोशू जो संदेसा घल्लेया कि अहां दी मदत कर।

इसा गल्ला जो सुणी करी यहोशूयैं इस्राएली सेना जो किट्ठा कित्ता कने गिबोनी लोकां अल्ल पुज्जणे तांई पूरी रात चले। भ्यागा पुज्जी करी तिन्हां एमोरी सेना जो हैरान करी दित्ता कने तिन्हां पर हमला करी दित्ता।

तिस दिन परमात्मा इस्राएली लोकां तांई लड़ेया। तिन्हीं एमोरी लोकां जो उलझणा च पाई दित्ता कने परमात्मे बड्डे-बड्डे ओले सट्टी करी एमोरी लोकां जो मारी दित्ता।

परमात्मैं अम्बरे च सूरजे जो इक्की जगाह पर रोकी दित्ता। तांजे इस्राएली लोकां अल्ल एमोरी लोकां जो हराणे तांई जादा बग्त मिल्ली सकैं। तिस दिन परमात्मे इस्राएली लोकां जो इक्क बड्डी जीत दैणे च तिन्हां दी मदत कित्ती।

जाह़लू परमात्मे एमोरी सेना जो हराई दित्ता, ताह़लू मते कनानी लोकां दा दल किट्ठा होएया कने तिन्हां इस्राएली लोकां पर हमला करी दित्ता। यहोशू कने इस्राएली लोकां भी तिन्हां पर हमला करी दित्ता कने तिन्हां जो भी मारी दित्ता।

इसा लड़ाई ते बाद, परमात्मैं इस्राएली लोकां जो सारा देस देई दित्ता, जिसदा दैणे दा वाद तिन्हां दे पुर्वजां सौगी कित्या था। कने सैह़ तिस देसे च अधिकारी बणी नैं रैहणा लग्गे। ताह़लू परमात्मैं इस्राएल देसे दे सारे लाक्केयां जो सान्ति दित्ती।

जाह़लू यहोशू जबरा होई गेआ, ताह़लू तिन्हीं सारे इस्राएली लोकां जो किट्ठा कित्ता। ताह़लू यहोशूयैं इस्राएली लोकां जो सैह़ वादा याद करवाया जेह्ड़ा तिन्हां परमात्मे सौगी सीनै प्हाड़े पर कित्या था, कि सैह़ तिस वादे दा पालन करन। इस्राएली लोकां वादा कित्ता कि सैह़ परमात्मे दे सामणैं इमानदार बणी रैंह्गे कने तिसदे हुक्मां दा पालन करगे।