16. छड्डाणे आल़ा

यहोशूये दे मरणे ते बाद, इस्राएली लोकां परमात्मे दे हुक्मां कने नियम-कानूनां दा पालन नीं कित्ता कने तिन्हां बचेयो कनानी लोकां जो बाहर नीं कड्डेया। इस्राएली लोकां अपणे सच्चे परमात्मे यहोवा जो छड्डी करी कनानी लोकां दे देवतेयां दी भक्ति करणा सुरू करी दित्ती। इस्राएली लोकां अल्ल कोई राजा नीं था, इसतांई हर कोई सैई करदा था जेह्ड़ा तिन्हां जो खरा लगदा था।

क्जोकि इस्राएली लोक लगातार परमात्मे दा अपमान करा दे थे, इसतांई परमात्मे दा कोप तिन्हां पर भड़की पेआ, कने तिन्हां जो दुश्मणा दे अधीन करी दित्ता; कने सैह़ भिरी अपणे दुश्मणा सामणैं टिक्की नीं सके। इन्हां दुश्मणा इस्राएली लोकां दियां चीज्जां जो लुटी लेआ, कने तिन्हां दी धन-दौलत नास करी दित्ती, कने मते सारे इस्राएली लोक मारे गे। मतेआं साल्लां बाद इस्राएली लोकां अपणे पापां दा पश्चाताप कित्ता कने परमात्मे नैं प्रार्थना कित्ती कि सैह़ अहां जो बचाये।

हर बरी जाह़लू इस्राएली लोक पापां दा पश्चाताप करदे तां परमात्मा तिन्हां दी सुणदा था कने तिन्हां जो बचाणे तांई मते छड्डाणे आल़ेआं जो घल्लेया। अपर लोक परमात्मे जो भुलना लगे कने पराये देवतेया दे पचांह् चली करी तिन्हां दी भक्ति करणा लग्गे। तां परमात्मे अल्ल इक्क दुश्मणा दा दल मिघानी लोकां जो इजाजत दित्ती कि सैह़ तिन्हां जो हाराई दैन।

मिघानी लोकां सत साल तिकर इस्राएली लोकां दियां फसलां जो लुटेया। इस्राएली लोक बड़े डरी गे, कने सैह़ सरूगां च लुक्की बैठे तांजे मिघानी लोक तिन्हां जो तोपी नी सकन। आखर च तिन्हां परमात्मे जो पुकारेया कि सैह़ अहां जो बचाये।

इक्क दिन, गिदोन नांऐ दा इक्क इस्राएली माणु था। सैह़ लुक्की करी कणका जफ्फा दा था तांजे मिघानी लोक तिसा जो चोरी नीं सकन। यहोवा परमात्मे दा सुअर्गदूत गिदोने अल्ल आएया कने ग्लाणा लग्गा, “ओ ताकतबर सूरमा, परमात्मा तिज्जो सौगी ऐ। जा कने इस्राएली लोकां जो मिघानी लोकां ते बचा।”

गिदोने दे पियो मूर्तिया दे सामणैं बल़ि चढ़ाणे तांई इक्क वेदी बणाईयो थी। सबते पैहल्लैं परमात्मैं गिदोने नैं तिसा वेदिया जो तोड़णे तांई ग्लाया। अपर गिदोन लोकां ते डरा दा था, इसतांई तिन्हीं राती दा इन्तजार कित्ता। जाह़लू रात होई गेई ताह़लू सैह़ गेआ कने तिन्हीं तिसा वेदिया जो तोड़ी दित्ता। तिन्हीं परमात्मे तांई इक्क नौई वेदी बणाई कने तिसा पर परमात्मे तांई बल़ि चढ़ाई।

भ्यागा उठी करी लोकां दिख्या कि कुणकि वेदिया जो तोड़ी दित्या ऐ, इसतांई सैह़ बड़े गुस्सा होये। जाह़लू तिन्हां जो पता लग्ग लग्गा कि एह़ कम्म गिदोने कित्या ऐ ताह़लू सैह़ लोक गिदोने जो मारणे तांई तिसदे घरेयो गे, अपर गिदोने दे बापूयैं ग्लाया, “तुहां क्जो अपणे देवते दी मदत करणे दी कोसिस करा दे हन? जे सैह़ देवता ऐ तां तिसियो अपणी रक्षा खुद करणा देया।” इसा गल्ला जो सुणी करी तिन्हां गिदोने जो नी मारेया।

ताह़लू मिघानी लोक इस्राएली लोकां जो लुटणा भिरी आई गे। सैह़ इतणे सारे थे कि तिन्हां दी गिणती भी नीं कित्ती जाई सकदी थी। गिदोनैं तिन्हां दे खलाफ लड़णे तांई इस्राएली लोकां जो किट्ठा होणे तांई ग्लाया कने सद्देया। गिदोनैं परमात्मे ते दो चिन्हां दी माँग कित्ती तांजे तिसियो बसुआस होई जां कि परमात्मा सच्ची च इस्राएली लोकां जो बचाणे तांई ग्ला दा ऐ।

पैहल्ले चिन्हैं तांई, गिदोने भेड्डा दिया ऊना जो जमीना पर रखी करी, परमात्मैं नैं ग्लाया कि भ्यागा दा पाल़ा सिर्फ भेड्डा दिया तिसा ऊना पर पोयैं कने जमीना पर ना पोयैं। परमात्मैं तिआं ई कित्ता। अगलिया राती तिन्हीं परमात्मे नैं ग्लाया कि सारी जमीन सीज्जीं जां अपर भेड्डा दी ऊन सूकी रैंह्‌। परमात्मैं तिआं ई कित्ता। इन्हां दूँ चिन्हां दिया बज़ाह ते, गिदोने जो बसुआस होई गेआ कि सच्ची च परमात्मा चांहदा ऐ कि सैह़ इस्राएली लोकां जो मिघानी लोकां ते बचां।

ताह़लू गिदोने सैनिकां जो अप्पु अल्ल सद्देया कने 32 हज़ार सैनिक गिदोने अल्ल आये, अपर परमात्मैं ग्लाया कि एह़ बड़े जादा हन। ताह़लू गिदोने 22 हज़ार लोकां जो घरेयो वापस घल्ली दित्ता जेह्ड़े लड़णे ते डरदे थे। परमात्मैं गिदोने नैं ग्लाया, अल्ली भी सैनिक जादा हन।” इसतांई गिदोने 300 लोकां जो छड्डी करी सबना जो घरेयो वापस घल्ली दित्ता।

तिसा राती परमात्मैं गिदोने नैं ग्लाया, “कि तू मिघानी लोकां दे तम्बुआं च जा कने सुण कि सैह़ क्या ग्ला दे हन। जाह़लू तू सुणगा कि सैह़ क्या गल्लां करा दे हन तां तू तिन्हां पर हमला करणे ते मत डरदा।” इसतांई तिसा राती गिदोन थलैं तिन्हां दे तम्बुआं च गेआ ताह़लू इक्क मिघानी सैनिक अपणे साथिये नैं अपणे सुपणे दे बारे च दस्सा दा था। सैह़ अपणे साथिये नैं ग्ला था, “कि इस सुपणे दा मतलब एह़ होएया कि गिदोने दी सेना मिघानियां दी सेना जो हराई दैणा। जाह़लू गिदोनैं एह़ सुणेया तां तिन्हीं परमात्मे दी स्तुति कित्ती।

ताह़लू गिदोन अपणे डेरे जो वापस चली गेआ कने तिन्हीं हर इक्क जो नरसिंगा, इक्क-इक्क घड़ा कने इक्क-इक्क मशाल दित्ती। तिन्हां मिघानी लोकां दे तम्बुआं जो घेरी लेआ जित्थु सैह़ सुतेयो थे। गिदोने दे 300 सैनिकां अपणियां मशालां जो घड़ेयां अन्दर रखेया था, जिसदिया बज़ाह ते मिघानी लोक मशालां दियां लौई दिक्खी नीं सके।

ताह़लू गिदोने दे सारे सैनिकां अपणे-अपणे घड़ेयां जो तोड़ी दित्ता, कने चाणचक मशालां ते अग्ग निकल़णा लग्गी। तिन्हां अपणे नरसिंगे बजाये कने जोरे-जोरे नैं चिल्लाणा लग्गे, “यहोवा परमात्मे दी तलवार कने गिदोने दी तलवार।”

परमात्मैं मिघानी लोकां जो हक्का-बक्का करी दित्ता, इसतांई सैह़ इक्की-दूये पर हमला कने मारणा लग्गे। तिसी बग्त, बाकि इस्राएली लोकां जो भी तिन्हां दे तम्बुआं ते सद्दी लेआ तांजे मिघानी लोकां पीछा करी सकन। तिन्हां मतेआं जो मारी दित्ता, कने बाकि बचेयो मिघानी लोकां जो इस्राएल देसे नठाई दित्ता। तिस दिन 1,20,000 मिघानी लोकां जो मारी दित्ता। परमात्मैं इस्राएली लोकां जो बचाई लेआ।

ताह़लू इस्राएली लोकां गिदोने जो ग्लाया, कि तू अहां दा राजा बणी जा। अपर गिदोने ग्लाया, मैं तुहां दा राजा नीं बणी सकदा, अपर मैं तुहां ते कुच्छ मंगणा चांहदा ऐ कि तुहां मिन्जो सोने दे गैहणेयां देई देया जेह्ड़े तुहां मिघानी लोकां ते लेई लियो हन। तिन्हां लोकां गिदोने जो मता सारा सोना देई दित्ता।

ताह़लू गिदोने तिस सोने दे खास कपड़े बणाई ले जेह्डे मिघानी लोकां दा राजा पैहणदा था। अपर लोकां तिसदी भक्ति करणा सूरु करी दित्ती जिआं कि सैह़ कोई मूर्ति ऐ।

ताह़लू परमात्मैं भिरी ते इस्राएली लोकां जो सज़ा दित्ती क्जोकि तिन्हां मूर्तिया दी भक्ति कित्ती। परमात्मैं तिन्हां दे दुश्मणा जो इजाजत दित्ती, कि सैह़ इस्राएली लोकां जो हराई दैन। तिन्हां परमात्मे नैं इक्क बरी भिरी मदत करणे तांई प्रार्थना कित्ती, कने परमात्मैं तिन्हां जो बचाणे तांई इक्क छड्डाणे आल़ा घल्लेया। एह़ गल्ल मती बार होई कि इस्राएली लोक पाप करगे, परमात्मा तिन्हां जो सज़ा दिंगा, कने सैह अपणे पापां दा पश्चाताप करगे, कने परमात्मा तिन्हां जो छड्डाणे तांई कुसी जो घल्लगा। मते साल तिकर, परमात्मैं मते छड्डाणे आल़ेआं जो घल्लेया जिन्हां इस्राएली लोकां जो दुश्मणा ते बचाया।

आखर च, तिन्हां लोकां परमात्मे नैं प्रार्थना कित्ती कि अहां जो भी दूयेयां देसां साइआं राजा चाइदा। जेह्ड़ा दिखणे च लम्मा कने ताकतवर होयैं, कने जेह्ड़ा लड़ाईया च अहां दी अगुआई करी सकैं। परमात्मे तिन्हां दी एह़ प्रार्थना नीं सुणी, अपर परमात्मे तिन्हां जो सैई राजा दित्ता जेह्ड़ा सैह़ चांहदे थे।