17. दाऊदे सौगी परमात्मे दा वादा

शाऊल इस्राएल देसे दा पैहल्ला राजा था। सैह़ लम्मा कने बड़ा सुन्दर था, जदेया राजा इस्राएली लोक चांहदे थे सैह़ सदेया ई था। शाऊलैं इस्राएल देसे च अच्छा राजा बणी करी अपणा योगदान दित्ता। अपर बादे च सैह़ इक्क बुरा माणु बणी गेआ कने तिन्हीं परमात्मे दे हुक्मा दा पालन नीं कित्ता, इसतांई परमात्मे तिसदिया जगाह दूया राजा चुणेया।

शाउले दिया जगाह पर परमात्मैं इक्क जुआन इस्राएली माणुये जो चुणेया जिसदा नां दाऊद था। दाऊद बैतलहम सैहरे दा इक्क चरवाहा था। सैह़ अपणे बुढ़े दियां भेड्डां दी रखवाल़ी करदा था, कई बरी दाऊदैं शेर कने भालू मारेया था क्जोकि तिन्हां भेड्डा पर हमला कित्या था। दाऊद इक्क नरम स्भाव आल़ा कने धर्मी माणु था, जेह्ड़ा परमात्मे पर बसुआस कने तिसदे हुक्मां दा पालन करदा था।

जाह़लू दाऊद इक्क जुआन माणु था, कने सैह़ लम्मे-चौड़े फलिस्तीन सैनिक गोलियते दे खलाफ लड़ाई कित्ती। गोलियत इक्क बड़ा खतरनाक सैनिक था। सैह़ बड़ा ताकतवर कने लगभग 3 मीटर लम्मा था। अपर परमात्मै गोलियते जो मारणे कने इस्राएली लोकां जो बचाणे च दाऊदे दी मदत कित्ती। इसते बाद, दाऊदैं इस्राएल देसे दे दुश्मणा पर कई बरी जीत हासल कित्ती। दाऊद इक्क बड्डा सैनिक बणी गेआ, कने तिन्हीं मतिआं लड़ाईयां च इस्राएली सेना दी अगुआई कित्ती। इस्राएली लोकां तिसदी बड़ी तारीफ कित्ती।

इस्राएली लोक दाऊदे नैं प्यार करदे थे इसा गल्ला जो जाणी करी शाऊल तिस नैं जल़ण रखणा लग्गा। शाऊलैं दाऊदे जो मारणे मती बरी मारणे दी कोसिस कित्ती, इसतांई दाऊद तिसते कने तिसदे सैनिकां ते बचणे तांई जंगले च नठी गेआ। इक्क दिन, जाह़लू शाऊल कने तिसदे सैनिक दाऊदे जो तोपा दे थे ताह़लू शाऊल इक्का सरूगां च गेआ जित्थु दाऊद लुक्केया था, अपर शाऊल तिसियो दिक्खी नीं सकेया। दाऊद शाऊले दे बड़ा नजदीक था कने तिसियो मारी सकदा था, अपर तिन्हीं इआं नीं कित्ता। अपर दाऊदैं पचांह़ ते आई करी शाउले दे कपड़ेयां दा इक्क टुकड़ा कटी लेआ ताह़लू शाऊले जो इसा गल्ला दा पता लग्गा कि दाऊद राजा बणने तांई मिन्जो मारणा नीं चांहदा था।

थोड़े दिन बाद, शाऊल लड़ाईया च मरी गेआ, कने दाऊद इस्राएल देसे दा राजा बणी गेआ। सैह़ इक्क अच्छा राजा था, कने लोक तिस नैं प्यार करदे थे। परमात्मैं दाऊदे जो आसीस दित्ती कने तिसियो कामयाब बणाया। दाऊदैं मतिआं लड़ाईयां लड़ियां, कने परमात्मैं इस्राएल देसे दे दुश्मणा जो हराणे तांई दाऊदे दी मदत कित्ती। दाऊदैं यरूशलेम सैहरे जो जीती लेआ कने तिसियो इस्राएल देसे दी राजधानी बणाई दित्ता, दाऊद इस्राएल देसे दा चाल़ी साल राजा रेह्आ। दाऊद राजे दे बग्त इस्राएल देस ताकतवर कने अमीर देस बणी गेआ।

दाऊद इक्क मंदर बणाणा चांहदा था जित्थु सारे इस्राएली लोक परमात्मे दी अराधना करी सकन कने तिस तांई बलिदान चढ़ाई सकन। इस्राएली लोकां 400 साल मिलाप आल़े तम्बूये च परमात्मे दी भक्ति करदे थे कने बलिदान चढ़ांदे थे।

अपर तित्थू नातान नांऐ दा इक्क भविष्यवक्ता था। परमात्मैं तिसियो दाऊदे नैं एह़ ग्लाणे तांई घल्लेया कि, “तैं मतिआं लड़ाईयां लड़ियां हन, इसतांई तू मिन्जो तांई एह़ मंदर नीं बणांगा। तेरा जागत तिस मंदरे जो बणांगा। अपर मैं तिज्जो बड़ी आसीस दिंगा। तेरे वंशे ते कोई इक्क राजा मेरे लोकां पर हमेसा तांई राज़ करगा। कने मसीह भी तेरे वंशे ते हुंगा।” मसीह परमात्मे दा चुणेया जण ऐ जेह्ड़ा संसारे दे लोकां जो तिन्हां दे पापां ते बचांगा।

जाह़लू दाऊदैं नातान भविष्यवक्ता जो एह़ ग्लांदे सुणेया, तां तिन्हीं परमात्मे दा धन्यावाद कित्ता कने तिसदी स्तुति कित्ती। परमात्मा तिसदे आत्म-सम्माने जो बधा दा था कने तिसियो मती सारी आसीस दित्ती। बेसक, दाऊद नीं जाणदा था कि परमात्मा इन्हां गल्लां जो काह़लू पूरियां करगा। इस बग्त अहां लोक जाणदे हन कि इस्राएली लोकां जो हज़ार साल तिकर मसीह दा इन्तजार करणा पेआ था।

दाऊदैं मते साल इमानदारिया नैं लोकां पर राज़ कित्ता, कने परमात्मे दे हुक्मा दा पालन कित्ता कने परमात्मैं तिसियो आसीस दित्ती। अपर दाऊदैं अपणियां ज़िन्दगिया दे आखरी बग्ते च परमात्मे दे खलाफ बड़ा बड्डा पाप करी दित्ता।

इक्क दिन, जाह़लू दाऊदे दे सारे सैनिक दूर लड़ाई करणा गियो थे। ताह़लू दाऊद अपणे मैहले दे बाहर आएया तां तिन्हीं इक्क सुन्दर जणासा जो छती पर नौंह्दे दिख्या, अपर तिन्हीं तिसा ते अपणी नजर नीं हटाई। अपर बादे च तिन्हीं पता लगाई लेआ कि तिसा दा नां बतशेबा था।

दाऊदैं तिसा जो अपणा बणाणे तांई, तिन्हीं अपणा इक्क सैनिक तिसा घल्लेया। दाऊदैं तिसा सौगी नाजायज रिश्ता बणाया कने तिसा जो अपणे घर वापस घल्ली दित्ता। कुच्छ दिनां बाद बेतशेबा दाऊद राजे जो एह़ खबर घल्ली कि मैं गर्भवती ऐ।

बतशेबा दे लाड़े दा नां ऊरिय्याह था। सैह़ दाऊदे दा इक्क खास सैनिक था। इस बग्त सैह़ लड़ाईया च गेआ था। दाऊदैं ऊरिय्याह जो लड़ाईया ते वापस सद्दी लेआ कने तिसियो ग्लाया कि तू अपणिया लाड़िया सौगी रेह्। पर बाकि सैनिक लड़ाई लड़ा दे थे इसतांई ऊरिय्याह अपणे घरेयो नीं गेआ। ताह़लू दाऊदैं ऊरिय्याह जो वापस लड़ाईया च घल्ली दित्ता, भिरी दाऊदैं योआब सेनापतिये नैं ग्लाया कि, उरिय्याह जो खतरनाक दुश्मणा बिच छड्डी कर वापस चली ओआ कि सैह़ लड़ाईया मारा जाये। कने तिसते बाद इआं होएया कि ऊरिय्याह लड़ाईया च मारा गेआ।

जाहल़ू उरिय्याह लड़ाईया च मारा गेआ, तां तिसते बाद दाऊदैं बतशेबा नैं ब्याह करी लेआ। बादे च, तिन्नैं दाऊदे दे जागते जो जन्म दित्ता। परमात्मा दाऊदे दे इस पापे जो दिक्खी करी बड़ा गुस्सा होएया, इसतांई तिन्हीं नातान भविष्यवक्ते जो एह़ दस्सणे तांई दाऊदे अल्ल घल्लेया कि तिसदा पाप कितणा बड्डा ऐ। तिन्हीं अपणे पापां ते पश्चाताप कित्ता कने परमात्मे तिसियो माफ करी दित्ता, कने दाऊदैं अपणी बाकि ज़िन्दगिया दे मुश्कल बग्ते पर परमात्मे दे हुक्मां दा पालन कित्ता।

इन्हां पापां दिया बजाह दाऊदे दा जागत मरी गेआ, इस तरीके नैं परमात्मे दाऊदे जो सज़ा दित्ती। इसते अलावा दाऊदे दे मरने तिकर, तिसदे अपणे परवारे दे कुच्छ लोकां तिसदे खलाफ लड़ाई कित्ती, कने दाऊद हर तरफा ते कमजोर हुंदा गेआ। अपर दाऊद परमात्मे दे सामणैं बसुआसे जोग्गा नीं बणी रेह्आ, भिरी भी परमात्मा अपणे वादे पर कायम रेह्आ। तिसते बाद, दाऊद कने बतशेबा दा इक्क जागत होएया तिसदा नां तिन्हां सुलैमान रखेया।