18. इस्राएल देसे दा दूँ देसां च बंटवारा

दाऊद राजैं इस्राएल देसे पर चाल़ी साल राज़ कित्ता। तिसते बाद सैह़ मरी गेआ, कने तिसते बाद तिसदा जागत सुलैमान तिसदिया जगाह इस्राएल देसे दा राजा बणेया। परमात्मैं सुलैमाने सौगी गल्ल कित्ती कने तिसते पुछया कि, “तू क्या चांहदा ऐ कि मैं तिज्जो तांई करैं। सुलैमाने परमात्मे ते अक्ल मंगी, इसा गल्ला जो सुणी करी परमात्मा बड़ा खुस होएया, कने परमात्मैं तिसियो संसारे दा सबते जादा अक्लमंद माणु बणाई दित्ता। सुलैमाने मतिआं गल्लां जो सिखेया कने सैह़ इक्क अक्लमंद राजा बणेया कने परमात्मे तिसियो बड़ा अमीर माणु भी बणाई दित्या था।

सुलैमाने यरूशलेम सैहरे च तिस मंदरे जो बणाया जिसदी योजना तिसदे बुढैं दाऊदैं बणाईयो थी कने तिस मंदरे जो बणाणे तांई समान किट्ठा कित्ता। हुण सारे लोक मिलाप आल़े तम्बूये दिया जगाह पर तिस मंदरे च परमात्मे दी भक्ति करदे थे कने बलिदान चढ़ांदे थे। तिस मंदरे च परमात्मे दी हजूरी बणी रैंह्दी थी कने तित्थु अपणे लोकां सौगी रैंह्दा था।

अपर सुलैमान दूये देसां दियां जणासां नैं प्यार करदा था। तिन्हीं परमात्मे दे हुक्मां दा पालन नीं कित्ता, कने तिन्हीं लगभग 1000 जणासां सौगी ब्याह करी लेआ। इन्हां च मतिआं जणासां विदेस आईआं थियां, कने अपणे देवतेयां जो भी अप्पु सौगी लेई आईआं थियां कने सैह़ अपने देवतेयां दी भक्ति करदियां थियां। जाह़लू सुलेमान स्याणा होई गेआ तां तिन्हीं भी तिन्हां दे देवतेयां दी भक्ति कित्ती।

इसा बज़ाह ते परमात्मा सुलैमानैं ते गुस्सा होएया, कने तिन्हीं सुलेमाने नैं ग्लाया कि मैं तेरे मरणे ते बाद इस्राएल देसे जो दूँ हिस्सेयां च बंडी दिंगा कने तिन्हां जो सज़ा दिंगा।

सुलैमान दे मरणे ते बाद, तिसदा जागत रहबाम तिस देसे दा राजा बणी गेआ। रहबाम इक्क नासमझ माणु था। इस्राएल देसे दे सारे लोकां किट्ठे होई करी एह़ फैसला लेआ कि सैई अहां दा राजा बणैं। भिरी सैह़ रहबामे अल्ल सुलैमान दी सिकायत करी नैं ग्लाणे लग्गे, “तेरे बापूयैं अहां लोकां ते बड़ी जादा मजदूरी करवाईयो थी कने सैह़ मते भरी टैक्स बसूलदा था। तिन्हां रहबामे नैं विणती कित्ती कि तू अहां ते घट मजदूरी करवायां।”

अपर रहबामैं तिन्हां जो गुस्से नैं जबाब दित्ता कने ग्लाया कि, “मेरे बापूयैं तुहां ते बड़ी मजदूरी करवाई। अपर मैं तुहां ते तिसते भी जादा मजदूरी करवांगा, कने मैं तुहां जो तिसते भी जादा दुखी करगा।”

जाह़लू लोकां रहबाम जो इआं ग्लांदे सुणेया, तां तिन्हां च दस गोत्रां दे इस्राएली लोक तिसदे खलाफ थे, सिर्फ दो गोत्र तिस सौगी सेहमत थे। इन्हां दूँ गोत्रां मिल्ली नैं अपणे तांई यहूदा दा देस बणाई लेआ।

बाकि दसां गोत्रां यारोबाम नांऐ दे इक्की माणुये जो अपणा राजा बणाई लेआ। एह़ दस गोत्र, देसे दे उत्तर-पूरब दिसा च थे। इन्हां दसां गोत्रां भी मिल्ली नैं अपणे तांई इस्राएल देस बणाई लेआ।

अपर यारोबामैं परमात्मे दे खलाफ बगाबत कित्ती कने लोकां ते पाप करवाया। तिन्हीं अपणे लोकां दे जरिये भक्ति करवाणे तांई पशुयैं दियां दो मूर्तियां बणाईयां। सैह़ हुण यहूदा दे देसे च यरूशलेम सैहरे च परमात्मे दे मंदरे च तिसदी भक्ति करणे तांई नीं गे।

यहूदा कने इस्राएल देस अप्पु च दुश्मण बणी गे कने अक्सर इक्की दूये दे खलाफ लड़णा लग्गे।

इस्राएल देसे दे नौयें प्रदेसे च, जितणे भी राजे आये सैह़ सारे दुष्ट थे। मते राजे तिन्हां दूये इस्राएली लोकां दे जरिये मारे गे जेह्ड़े अप्पु जो राजा बणना चांहदे थे।

इस्राएल देसे दे सारे राजेआं कने मतेआं लोकां मूर्तियां दी भक्ति कित्ती। जाह़लू तिन्हां इआं कित्ता, तां तिन्हां हर बरी वेश्यां जणासां सौगी नाजायज रिश्ता रखेया कने ऐत्थु तिकर कि मती बरी मूर्तियां सामणैं बच्चेयां जो बल़ि करदे थे।

यहूदा प्रदेसे दे राजा दाऊदे दे वंश दे लोक थे, कने कुच्छ राजे भले माणु भी थे जिन्हां इमानदारिया नैं राज़ कित्ता कने परमात्मे दी भक्ति कित्ती। अपर यहूदा प्रदेसे दे मते राजे बुराई करी नैं राज़ कित्ता कने मूर्तियां दी भक्ति कित्ती। तिन्हां च कुच्छ राजेआं झूठे देवतेयां तांई अपणे बच्चेयां दी बल़ि चढ़ाणा लग्गे कने यहूदा प्रदेसे दे मतेआं लोकां परमात्मे दे खलाफ बगाबत कित्ती कने देवतेयां दी भक्ति कित्ती।