19. भविष्यवक्ता (परमात्मे दिया तरफा ते ग्लाणे आल़ा)
परमात्मा हमेसा इस्राएली लोकां अल्ल भविष्यवक्तां जो घल्लदा रैंह्दा था। भविष्यवक्ता परमात्मे दे संदेसां जो सुणदे थे कने भिरी लोकां जो दस्सदे थे।
जाह़लू अहाब इस्राएल देसे दा राजा था तां तिस बग्त एलिय्याह भविष्यवक्ता था। अहाब इक्क बुरा माणु था। तिन्हीं झूठे बाल देवता दी भक्ति करवाणे तांई लोकां जो मजबूर कित्ता था। इसतांई एलिय्याह अहाब राजे नैं ग्लाणा लग्गा कि परमात्मा तिन्हां लोकां जो सज़ा दैणे जो त्यार ऐ। तिन्हीं तिस नैं ग्लाया, “जाह़लू तिकर मैं बरखा होणे तांई नीं ग्लांगा ताह़लू तिकर इस्राएल देसे च बरखा नीं हुंगी कने ना ई पाल़ा पोंगा।” इसा गल्ला ते अहाब राजे जो बड़ा गुस्सा आया, कि तिन्हीं एलिय्याह जो मारी दैणे दा फैसला लेआ।
इसतांई परमात्मैं एलिय्याह नैं ग्लाया कि तू जंगले च जाई करी लुक्की बैठ, क्जोकि अहाब राजा तिज्जो मारणे दिया ताका च ऐ। एलिय्याह इसा गल्ला जो सुणी करी जंगले च तिस नाल़े अल्ल गेआ जित्थु जाणे तांई परमात्मे दस्सेया था। कोगले हर-रोज भ्यागा कने संझा एलिय्याह जो रोटी कने मांस लेई नैं ओंदे थे। अहाब राजा कने तिसदे सैनिक एलिय्याह जो तोपा दे थे, अपर सैह़ तिसियो तोपी नीं सके।
बरखा नीं होणे ते थोड़े दिनां बाद सैह़ नाल़ा सुकी गेआ। इसतांई एलिय्याह बक्खे आल़े देसे जो चली गेआ कने तिस देसे च इक्क गरीब विधवा थी जिसा दा इक्क जागत था। अकाल होणे दिया बज़ाह ते तिन्हां अल्ल दूँ-त्रीं दिनां दा रासन बचेया था सैह़ दो जणे ई इस रासने ते थोड़े दिन तांई अपणा पेट भरी करी जिन्दे रेई सकदे थे। अपर भिरी भी तिन्नैं जणासा एलिय्याह दी तिस बग्त मदत कित्ती। इसतांई परमात्मे तिन्हां दे घड़े दा आटा कने कुपिया दा तेल खत्म होणा नीं दित्ता। पूरे अकाल च भी तिन्हां जो रासन दी कोई कमी नीं होई कने एलिय्याह तित्थु मते साल रेह्आ।
साढे त्रै साल बाद, परमात्मे एलिय्याह नैं ग्लाया, कि सैह़ भिरी बरखा करगा, कने तू इस्राएल देस जो वापस जा कने अहाब राजे नैं मिल। इसतांई एलिय्याह अहाब राजे अल्ल गेआ, कने जाह़लू तिन्हीं तिसियो दिख्या कने ताह़लू एलिय्याह नैं ग्लाया, “अच्छा तू ऐ, मुसीबत पैदा करणे आल़ा!” तिन्हीं अहाब राजे नैं ग्लाया, “मुसीबत पैदा करणे आल़ा तां तू ऐ। तू सच्चे सर्वशक्तिमान यहोवा परमात्मे जो छड्डी करी मामूली बाल देवता दी भक्ति करा दा ऐ।” ताह़लू अहाब राजैं सारे इस्राएली लोकां जो सद्देया कने भविष्वक्तां जो कर्मेल प्हाड़े पर किट्ठा कित्ता।
ताह़लू अहाब राजैं सारे इस्राएली लोक कने बाल देवता दे 450 भविष्यवक्ता कर्मेल प्हाड़े पर किट्ठे कित्ते। एलिय्याह लोकां नैं ग्लाया, “काह़लू तिकर तुहां अपणे वचारां नैं समझौता करदे रैंह्गे? जे यहोवा परमात्मा ऐ तां तिसदी भक्ति करा कने जे बाल देवता परमात्मा ऐ तां तिसदी भक्ति करा।”
ताह़लू एलिय्याह बाल देवते दे भविष्यवक्तां नैं ग्लाणा लग्गा, “इक्क जानवरे दी बल़ि चढ़ा कने तिसदा माँस इक्क वेदिया पर रखा, अपर अग्ग मत लगांदे। तिसदे बाद मैं भी तिआं ई करगा, कने इक्क लग्ग वेदिया पर मैं तिस माँसे जो रखगा। जे ताह़लू परमात्मा वेदिया च अग्ग सट्टगा तां तुहां जाणी लैंगे कि सैह़ सच्चा परमात्मा ऐ।” ताह़लू बाल देवते दे भविष्यवक्तां इक्क बल़िया जो वेदिया पर रखेया अपर अग्ग नीं लगाई।
ताह़लू बाल देवते दे भविष्यवक्तां बाल नैं प्रार्थना कित्ती, “ओ बाल देवता, अहां दी सुण, अहां दी सुण।” पूरा दिन तिन्हां प्रार्थना कित्ती कने जोरे-जोरे नैं डडणा लग्गे ऐत्थु तिकर तिन्हां अप्पु जो चाकुआं नैं बड्डी लेआ, अपर बाल देवतैं तिन्हां दी नीं सुणी, कने तिन्हीं कोई अग्ग नीं सट्टी।
पूरा दिन प्रार्थना करणे ते बाद बाल देवते दे भविष्यवक्तां प्रार्थना करणा बंद करी दित्ता। तिसते बाद जाह़लू एलिय्याह भविष्यवक्तैं दूये जानवरे दा माँस वेदिया पर रखी दित्ता ताह़लू तिन्हीं लोकां नैं ग्लाया, कि तुहां पाणिये दे बाराह घड़े मुँऐ तिकर भरी नैं वेदिया पर ताह़लू तिकर डोलदे रेह्आ जाह़लू तिकर माँस, लकड़ियां कने वेदिया दी चौंनी पास्सेया दी जमीन सीज्जी नीं जां।
भिरी एलिय्याह प्रार्थना कित्ती, “ओ यहोवा, अब्राहम, इसहाक कने याकूबे दे परमात्मा, अहां जो दस्स कि तू इस्राएल देसे दे परमात्मा ऐ कने मैं तेरा दास ऐ। ओ यहोवा परमात्मा मेरी सुण, मेरी सुण कि एह़ लोक जाणी लैन कि तूईं सच्चा यहोवा परमात्मा ऐ।”
तिसी बग्त परमात्मे अम्बरे ते अग्ग सट्टी कने तिन्हीं माँस, लकड़ियां, पत्थरां, धूड़ी समेत सब कुच्छ फूकी दित्ता कने वेदिया अल्ल जेह्ड़ा पाणी पेआ था सैह़ सारा सुकाई दित्ता। एह़ दिक्खी करी, सैह़ सारे लोक जमीना पर प्रणाम करी नैं ग्लाणा लग्गे, “यहोवा ई परमात्मा ऐ! यहोवा ई परमात्मा ऐ!”
ताह़लू एलिय्याह ग्लाणा लग्गा, “बाल देवते दा इक्क भी भविष्यवक्ता बची करी नीं जाई सकैं।” ताह़लू लोकां तिन्हां जो पकड़ी लेआ कने तित्थु ते लग्ग लेईआ कने तिन्हां जो मारी दित्ता।
ताह़लू एलिय्याह अहाब राजे नैं ग्लाया, “फटाफट अपणे घरेयो नठी जा, क्जोकि बड़ी जोरदार बरखा होणे आल़ी ऐ।” थोड़िया देरा च अम्बर काल़ा होई गेआ कने बड़ी जोरदार बरखा होणा लग्गी। यहोवा परमात्मे अकाले जो खत्म करी दित्ता कने एह़ साबित करी दित्ता कि सैई सच्चा परमात्मा ऐ।
परमात्मे एलिय्याह दे बाद, एलिशा नांऐ दे भविष्यवक्ता जो चुणेया। परमात्मे एलिशा दे जरिये मते चमत्कार कित्ते, जिन्हां च इक्क चमत्कार नमान नांए दे माणुये दिया ज़िन्दगिया च होएया। सैह़ दुश्मणा दा सेनापति था कने तिसियो कोढ़ था। नमानैं एलिशा दे बारे च सुणेया था इसतांई सैह़ एलिशा अल्ल गेआ कि सैह़ मिन्जो इसा बमारिया ते खरा करैं। एलिशा तिस नैं ग्लाया, “तू जाई नैं यरदन नदिया च सत बरी डुबकी मार।”
नमान इसा गल्ला जो सुणी करी गुस्सा होएया कने तिन्हीं इआं करणे ते मना करी दित्ता, क्जोकि तिसियो बसुआस नीं होएया कि इआं करी नैं सैह़ खरा होई सकदा ऐ, तिसियो मूर्खता दी गल्ल लग्गी। अपर बादे च अपणा मन बदली लेआ कने जाई नैं यरदन नदिया च सत बरी डुबकी लगाई। जाह़लू सैह़ सतमीं डुबकी लगाई नैं पांणिये ते बाहर आएया तां परमात्मे तिसियो कोढ़े दिया बमारिया ते खरा करी दित्ता ऐ।
परमात्मे इस तरीके नैं इस्राएली लोकां अल्ल मतेआं भविष्यवक्तां जो घल्लेया, कने तिन्हां लोकां नैं ग्लाया कि मूर्तियां दी भक्ति करणा बन्द करी देया। बल्कि तुहां इक्की-दूये नैं खरा बर्ताब कने दया करदे रेह्आ। तिन्हां भविष्यवक्तां लोकां जो चतौणी दित्ती कि बुरे कम्म करणा छड्डी देया कने परमात्मे दे हुक्मां दा पालन करा। भिरी एह़ भी ग्लाया, “जे तुहां इआं नीं कित्ता तां परमात्मा तुहां जो पापी समझी करी तुहां दा न्याय करगा कने तुहां जो सज़ा दिंगा।”
मती बरी तिन्हां लोकां परमात्मे दे हुक्मां दा पालन नीं कित्ता; अपर अक्सर तिन्हां भविष्यवक्तां सौगी बुरा बर्ताब कित्ता कने ऐत्थु तिकर तिन्हां जो मारी भी दित्ता। इक्क बरी यिर्मयाह भविष्यवक्ता जो सुक्के खुऐ च पाई दित्ता कने तिसियो तित्थु मरणे जो छड्डी दित्ता। खुऐ च पाणी नीं था सिर्फ चिकड़ था यिर्मयाह तिस चिकड़े च दबौई गेआ। अपर ताह़लू बिन्यामीन राजैं तिस पर दया कित्ती कने तिन्हीं अपणे सेवकां जो हुक्म दित्ता कि यिर्मयाह दे मरणे ते पैहल्लैं तिसियो खुऐ ते बाहर कड्डी करी लेई ओआ।
भविष्यवक्ता परमात्मे दे बारे च लोकां जो लगातार दस्सदे रेह् बेशक लोक तिन्हां नैं नफरत करदे थे। तिन्हां लोकां जो चतौणी दित्ती, कि जे तुहां अपणे पापां ते पश्चाताप नी करगे तां परमात्मां तुहां जो नास करी दिंगा। तिन्हां लोकां जो परमात्मे दा सैह़ वादा याद करवाया कि मसीह तौल़ी ओणे आल़ा ऐ।
बाइबला दी काहणी: 1 राजा अध्याय 16-18; 2 राजा अध्याय 5 कने यिर्मयाह अध्याय 38
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।