20. गुलामी कने वादे दे देसे च वापस औणा

इस्राएल देस कने यहूदा देस दूनीं परमात्मे दे खलाफ पाप कित्ता। तिन्हां तिस वादे दा पालन नीं कित्ता जेह्ड़ा परमात्मैं तिन्हां सौगी सीनै प्हाड़े पर कित्या था। परमात्मैं मतेआं भविष्यवक्तां जो चतौणी दैणे तांई घल्लेया, तांजे सैह़ लोक अपणे पापां ते पश्चाताप करन कने परमात्मे दी अराधना करन। अपर तिन्हां भविष्यवक्तां दियां गल्लां जो मनणे ते मना करी दित्ता।

ताह़लू परमात्मैं तिन्हां दूनी देसा जो सज़ा दित्ती कने तिन्हां दे दुस्मणा जो इजाजत दित्ती कि सैह़ तिन्हां दूनीं देसां जो नास करी देआ। अश्शूर देस इक्क ताकतवर देस था, जिन्हीं आई नैं इस्राएल देस दा नास करी दित्ता। अश्शूरी लोकां इस्राएल देसे दे मते लोकां जो मारी दित्ता, कने तिन्हां दियां सारियां चीज्जां जो लुटी करी लेई गे कने इस्राएल देसे दे मते इलाके नास करी दित्ते।

अश्शूरी लोकां इस्राएल देसे दे सारे अगुआं जो, अमीर माणुआं जो कने करीगर लोकां जो किट्ठा कित्ता कने सैह़ तिन्हां अश्शूर देसे जो लेई गे। इस्राएल देसे च सिर्फ गरीब इस्राएली लोक बचेयो थे।

भिरी अश्शूरी लोक इस्राएल देसे च रैहणे तांई विदेसी लोकां जो लेई करी आये; कने तिन्हां विदेसी लोकां इस्राएल देसे दे नास कित्तेयो सैहरां जो दोबारा ते बणाया। जेह्ड़े इस्राएली लोक बचेयो थे तिन्हां नैं अश्शूरी लोकां ब्याह करी लेआ, कने इन्हां लोकां दे वंश सामरी कैहलाये।

यहूदा देसे दे लोकां दिख्या कि परमात्मे पर बसुआस नीं करणे कने तिसदे हुक्मां दा पालन नीं करणे दिया बज़ाह ते किआं परमात्मैं इस्राएली लोकां जो सज़ा दित्ती। भिरी भी तिन्हां लोकां कनानी लोकां दे देवतेयां दी भक्ति कित्ती। परमात्मैं तिन्हां जो चतौणी दैणे तांई भविष्यवक्तां जो घल्लेया अपर तिन्हां दियां गल्लां जो अणसुणा करी दित्ता।

अश्शूरी लोकां दे जरिये इस्राएल देसे जो नास करणे दे 100 साल बाद, परमात्मैं बेबीलोन देसे दे राजा नबूकदनेस्सरे जो यहूदा देसे पर हमला करणे तांई घल्लेया। बेबीलोन देस इक्क ताकतवर देस था। यहूदा देसे दा राजा नबूकदनेस्सरे दा दास बणीकरी हर साल मती धन-दौलत दैणे तांई राज्जी होई गेआ।

अपर कुच्छ साल्ल बाद, यहूदा देसे दे राजैं बेबीलोन देसे दे खलाफ बगाबत कित्ती। बेबीलोन देसे दे लोकां वापस आई नैं भिरी यहूदा देसे पर हमला करी दित्ता। तिन्हां यरूशलेम सैहरे पर कब्जा करी लेआ, मंदरे जो नास करी दित्ता कने सैहरे दे कने मंदरे दे खजाने जो लुटी करी लेई गे।

बेबीलोन देसे नैं बगाबत करणे तांई यहूदा देसे दे राजे जो सज़ा दित्ती कने नबूकदनेस्सरे दे सैनिकां तिसदे जागते जो मारी दित्ता कने तिसते बाद राजे जो अन्ना करी दित्ता, कने तिसियो लेई गे तांजे सैह़ बेबीलोन देसे दिया जेला च मरी जां।

नबूकदनेस्सर कने तिसदे सैनिक यहूदा देसे दे लगभग सारे लोकां जो पकड़ी करी बेबीलोन देसे जो लेई गे, सिर्फ तिस देसे दे गरीब लोकां जो छड्डी दित्ता तांजे सैह़ खेती करी सकन। इस दौरे दे बग्ते जो देस निकाले दा नां दित्ता गेआ जिस च परमात्मे दे लोकां जो वादे दे देसे ते निकल़ी जाणे तांई मजबूर कित्या था।

परमात्मैं अपणे लोकां जो तिन्हां दे पापां तांई सज़ा दित्ती तिन्हां दा देस निकाला होणे ते बाद भी, परमात्मां तिन्हां जो कने अपणे वादे जो नीं भुलेया था। परमात्मा लगातार अपणे लोकां जो दिखदा रेह्आ कने अपणे भविष्यवक्तां दे जरिये तिन्हां नैं गल्लां करदा रेह्आ। तिन्हीं वादा कित्ता कि, 70 साल्लां बाद सैह़ भिरी वादे देस वापस आई जांगे।

70 साल्लां बाद, कुस्रू जेह्ड़ा फारस देसे दा राजा बणेया, तिन्हीं बेबीलोन देसे जो हराई दित्ता, इसतांई बेबीलोन देसे दे बजाये फारस देसे नैं मतेआं देसां पर राज़ कित्ता। इस्राएली लोकां जो हुण यहूदी ग्लाया जांदा था कने तिन्हां अपणी सारी ज़िन्दगी बेबीलोन देसे च कटी। सिर्फ कुच्छ पराणे यहूदी लोकां जो यहूदा देस याद रेह्आ।

फारसी लोक बड़े समर्थी थे, अपर तिन्हां हारने आल़े लोकां पर दया कित्ती। फारसी लोकां दा राजा बणने ते बाद कुस्रूयैं इक्क हुक्म दित्ता कि कोई भी यहूदी माणु यहूदा देस वापस जाणा चांहदा ऐ तां सैह़ फारस देसे जो छड्डी करी यहूदा देस वापस जाई सकदा ऐ। तिन्हीं तिन्हां जो मंदर बणाणे तांई धन-दौलत भी दित्ती, 70 साल देस निकाला होणे ते बाद, यहूदी लोकां दी इक्क टोली यरूशलेम सैहरे जो वापस चली आई।

जाह़लू यहूदी लोक यरूशलेम सैहरे च पुज्जे तां तिन्हां मंदरे जो कने सैहरे दे चौंनी पास्से दी दिवारा जो भिरी ते बणाया। फारसी लोक हुण भी तिन्हां पर राज़ करदे थे अपर इक्क बरी भिरी सैह़ वादे दे देसे च रैह् दे थे कने मंदरे च अराधना करदे थे।