21. परमात्मा मसीह दे औणे दा वादा करदा ऐ

जाह़लू परमात्मैं सृष्टिया जो बणाया था, तां सैह़ जाणदा था कि तिसियो बादे च इक्क दिन जरूर मसीह जो घल्लणा पोणा। तिन्हीं आदम कने हव्वा नैं वादा कित्या था कि सैह़ इआं करगा। परमात्मैं ग्लाया था कि हव्वा दे वंश ते इक्क माणु जन्म लैंगा जेह्ड़ा सर्पे दे सिरे कुचलगा। जिन्हीं सर्पैं हव्वा जो धोखे नैं फल़ खुआई दित्या था सैह़ सैतान था। परमात्मे दे वादे दा मतलब था कि मसीह पूरे तरीकै नैं सैताने जो हराई दिंगा।

परमात्मैं अब्राहमें नैं वादा कित्या था कि तिसदे जरिये संसारे दियां सारियां जातिआं असीस पांगिया। परमात्मा इक्क दिन मसीह जो घल्ली करी इस वादे जो जरूर पूरा करगा। सैह़ मसीह संसारे दी सब जाति दे लोकां जो तिन्हां दे पापां ते बचांगा।

परमात्मैं मूसे नैं वादा कित्या था कि औणे आल़े बग्ते च मैं मूसे साइआं इक्क होर भविष्यवक्ता घल्लगा। एह़ भविष्यवक्ता मसीह हुंगा। इस तरीके नैं परमात्मैं भिरी वादा कित्ता कि सैह़ मसीह जो घल्लगा।

परमात्मैं दाऊद राजे नैं वादा कित्या था कि तेरे वंशे ते इक्क राजा हुंगा सैह़ मसीह हुंगा, जेह्ड़ा परमात्मे दे लोकां पर राज़ करगा।

परमात्मैं यिर्मयाह भविष्यवक्ता नैं गल्ल कित्ती कने ग्लाया इक्क दिन, “मैं इक्क नौआं वादा करगा। अपर सैह़ तिस वादे साइआं नीं हुंगा जेह्ड़ा परमात्मैं इस्राएली लोकां सौगी सीनै प्हाड़े पर कित्या था। जेह्ड़ा नौआं वादा मैं तिन्हां दिनां च तिन्हां सौगी करगा, सैह़ एह़ ऐ कि मैं अपणे आप्पे जो तिन्हां पर प्रकट करगा। “हर माणु तिस नैं प्यार रखगा कने तिसदे नियम-कानूनां दा पालण करणे दी इच्छा रखगा। मैं अपणे नियम-कानून तिन्हां दे दिलां पर लिखगा, कने सैह़ मेरे लोक हुंगे कने सैह़ परमात्मे जो जाणगे कने परमात्मा तिन्हां दे पापां जो माफ करगा। सैह़ मसीह हुंगा जेह्ड़ा तिन्हां सौगी तिस नौये वादे जो करगा।”

परमात्मैं भविष्यवक्तां नैं एह़ भी ग्लाया कि मसीह इक्क भविष्यवक्ता हुंगा। इक्क भविष्यवक्ता सैह़ माणु ऐ जेह्ड़ा परमात्मे दे वचनां जो सुणदा ऐ कने भिरी परमात्मे दे संदेसां जो लोकां जो दस्सदा ऐ। जिसियो घल्लणे दा वादा परमात्मैं कित्या था सैह़ मसीह इक्क म्हान भविष्यवक्ता हुंगा। मतलब सैह़ मसीह परमात्मे दे संदेसां जो सुणगा कने लोकां जो तिन्हां संदेसां जो सखांगा।

इस्राएली याजकां लोकां दे पापां दी माफी तांई परमात्मे सामणै बलिदान परमात्मे जो चढ़ांदे रेह्। तांजे परमात्मा तिन्हां दे पापां दी सज़ा तिन्हां जो ना दैं। याजक लोकां तांई प्रार्थना भी करदे थे। अपर सैह़ मसीह इक्क म्हान महायाजक हुंगा जेह्ड़ा संसारे दे लोकां देयां पापां जो अपणे ऊपर लेई करी अपणे आप्पे जो परमात्मे तांई बलिदान करी दिंगा। मतलब सैह़ कदी पापा नी करगा, कने जाह़लू सैह़ अपणे आप्पे जो बलिदान करणे तांई देई दिंगा, तां संसारे दे लोकां देयां पापां तांई कोई भी बलिदान जरुरी नीं हुंगा।

राजा सैह़ हुंदा ऐ जेह्ड़ा लोकां पर राज़ करदा ऐ कने लोकां दा न्याय करदा ऐ, कने कदी-कदी सैह़ गलतियां भी करदे हन। दाऊद राजैं सिर्फ इस्राएली लोकां पर राज़ कित्ता, अपर दाऊद राजे दा वंश मसीह पूरे संसारे दे लोकां पर राज़ करगा कने सैह़ हमेसा तांई राज़ करगा, कने सदा सच्चाईया नैं न्याय करगा कने ठीक फैसला करगा।

परमात्मे दे भविष्यवक्तां मसीह दे बारे च बड़ी पैहल्ले ते मतिआं भविष्यवाणियां कित्तियां थियां। मलाकी नांऐ दे भविष्यवक्तैं अपणियां कताबा च ग्लाया था कि मसीह दे औणे ते पैहल्लैं इक्क भविष्यवक्ता ओंगा। सैह़ मसीह दे ओणे तांई लोकां देयां मनां जो त्यार करगा। इसते अलावा यशायाह भविष्यवक्तैं अपणिया कताबा च लिख्या ऐ कि मसीह इक्क कुआरिया कुड़िया ते जन्म लैंगा। कने मीका भविष्यवक्तैं भी अपणिया कताबा च जिकर कित्या कि मसीह बैतलहम ग्रांए च जन्म लैंगा।

यशायाह भविष्यवक्तैं एह़ भी लिख्या कि मसीह गलील प्रदेसे दे लाक्के च वास करगा। जेह्ड़े लोक बड़े दुखी हन मसीह तिन्हां जो सान्ति दिंगा। सैह़ कैदियां जो अजाद करगा। सैह़ बमारां, बोल़ेयां, अन्नेयां गुंगेयां कने लंगड़ेयां जो खरा करगा।

यशायाह भविष्यवक्तैं एह़ भी लिख्या कि लोक मसीह नैं नफरत करगे कने तिसियो अपनाणे ते मना करी दिंगे। दूयेयां भविष्यवक्तां भी ग्लाया कि लोक मसीह जो मारी दिंगे कने सैह़ तिसदे कपड़ेयां तांई जुआ खेलगे कने तिसदा इक्क साथी तिस नैं बगाबत करगा। जकर्याह भविष्यवक्तैं भी अपणिया कताबा च लिख्या कि मसीह दा इक्क साथी दूये लोकां ते तीई चाँदी दे सिक्के लेई तिसियो धोखे नैं पकड़ुआई दिंगा।

भविष्यवक्तां एह़ भी ग्लाया कि मसीह किआं मरगा। यशायाह भविष्यवक्तैं एह़ भी जिकर कित्या कि लोक मसीह पर थुकगे, तिसदा मजाक डुआंगे कने तिसियो मारगे। सैह़ तिसदे हत्थां-पैरां च छेद करगे कने तिसियो बड़ा दुख कने कष्ट देई करी मारगे। बल्कि तिन्हीं कोई पाप नीं कित्या था।

भविष्यवक्तां एह़ भी ग्लाया कि मसीह म्हान हुंगा जिन्हीं कोई पाप नीं कित्या हुंगा। सैह़ संसारे दे सारे लोकां देयां पापां दिया बज़ाह ते मारा जांगा। तिसदे मरणे ते परमात्मे बिच कने लोकां बिच मेल-मिलाप होई जांगा। इसतांई परमात्मा चांहदा ऐ कि मसीह मरैं।

भविष्यवक्तां एह़ भी ग्लाया कि मसीह मारा जांगा कने परमात्मा तिसियो मरेयां ते ज़िन्दा करगा। मसीह दी मौत कने दोबारा ज़िन्दा होणा एह़ दस्सदा ऐ कि संसारे दे लोकां नैं नौआं वादा करणा परमात्मे दी योजना थी, तांजे सैह़ संसारे दे लोकां जो बचाई सकैं जिन्हां तिसदे खलाफ पाप कित्या ऐ।

परमात्मैं भविष्यवक्तां जो मसीह दे बारे च मतिआं गल्लां दस्सियां थियां, अपर मसीह इन्हां च कुसी भी भविष्यवक्ता दे बग्ते च नी आएया। आखरी भविष्यवाणी होणे दे लगभग चार सौ साल बाद, जाह़लू सही बग्त पर, परमात्मे मसीह जो इस संसारे च घल्लणा।