22. यूहन्ना बपतिस्मा दैणे आल़े दा जन्म

पराणे बग्ते च, परमात्मैं अपणे लोकां नैं सुअर्गदूतां कने भविष्यवक्तां दे जरिये गल्लां करदा था तांजे सैह़ तिसदे लोकां जो मसीह दे बारे च दस्सी सकैं। अपर बग्ते ते लेई करी भिरी 400 साल तिकर परमात्मैं तिन्हां नैं गल्ल नीं कित्ती। ताह़लू परमात्मैं जकर्याह नांऐ दे भविष्यवक्ता अल्ल इक्क सुअर्गदूत घल्लेया। जकर्याह कने तिसदी लाड़ी परमात्मे दा आदर करदे थे। सैह़ दोयो बड़े जबरे होई गियो थे, कने तिन्हां दी कोई औलाद नीं थी।

इक्क दिन जकरियाह अपणिया मंडल़िया सौगी परमात्मे सामणै याजके दा कम्म करदा था। याजकां दिया रीतिया मताबक तिसदे नांऐ पर चिठ्ठी निकल़ी कि प्रभु दे मंदरे च जाई नैं धूप बाल़। कने धूपे बाल़णे दे बग्त अराधना करणे आल़े लोकां दी सारी मंडल़ी मंदरे दे अँगणे च प्रार्थना करा दी थी। तां तिसदे सामणै परमात्मे दा इक्क सुअर्गदूत धूप बाल़णे आल़िआ वेदिया दे सज्जे पास्से खड़ोत्या तिसियो दुस्सेया। जकरियाह तिसियो दिक्खी नैं विजकेया कने बड़ा डरणा लग्गा। अपर सुअर्गदूतैं तिस नैं ग्लाया, “हे जकरियाह, डरैं मत क्जोकि परमात्मे तेरी प्रार्थना सुणी लियो ऐ; कने तेरिया लाड़िया इलीशिबा ते तिज्जो तांई इक्क जागत पैदा होणा ऐ, कने तू तिसदा नां यूहन्ना रखेयां। तिसदे पैदा होणे पर तुहां तां खुस होणा ऐ अपर होर लोक भी खुस हुंगे। तां जकरियाह सुअर्गदूते ते पुच्छेया, “इसा गल्ला जो मैं किंआं सच्च मन्नी लैं, क्जोकि मैं कने मेरी लाड़ी जबरे होई गियो हन।”

सुअर्गदूते तिसियो जवाब दित्ता, “मेरा नां जिब्राईल ऐ, जेह्ड़ा परमात्मे सामणै खड़ोई रैंह्दा ऐ। परमात्मे मिन्जो तिज्जो अल्ल एह़ सुसमाचार सणाणे जो घल्लेया ऐ। दिक्ख, जाह़लू तिकर एह़ गल्लां पूरियां नीं होई जान, ताह़लू तिकर तू गूंगा रैंह्गा कने ग्लाई नीं सकगा, क्जोकि तैं मेरियां गल्लां दा बसुआस नीं कित्ता, जेह्ड़ियां कि अपणे बग्ते पर पूरियां हुंगियां।” जेह्ड़े लोक मंदरे दे अँगणे च जकरियाह जो निहालणा खड़ोत्यो थे सैह़ सोचणा लग्गे कि जकरियाह मंदरे च इतणी देर क्या करा दा ऐ? जाह़लू सैह़ बाहरेयो आया, तां सैह़ तिन्हां जो सणक लाई नैं लगाणा लग्गा, क्जोकि सैह़ ग्लाई नीं सकदा था, सैह़ सब बाहर खड़ोत्यो माणु जाणी गै कि मंदरे अंदर जरूर इसियो कुसकी दे दर्शन होएयो हन। जाह़लू तिसदी सेवा करणे दे दिने पूरे होई गै, तां यरूशलेम सैहरे जो छड्डी नैं अपणे घरेयो चली गेआ। कुच्छ दिनां बाद तिसदी लाड़ी इलीशिबा गर्भवती होई; अपर सैह़ पंज मीहने तिकर अपणे घरे अंदर ई रेई। कने तिन्नै अपणे मने च सोचेया कि, “लोकां च मेरी बदनामी दूर करणे तांई, परमात्मैं इन्हां दिनां च मिन्जो पर दया कित्ती ऐ।”

जाह़लू इलीशिबा जो छेमां मीहना लगेया, तां परमात्मे जिब्राईल सुअर्गदूते जो, गलील प्रदेस दे नासरत सैहर च, मरियम नांऐ दिया इक्की कुआरिया कुड़िया अल्ल घल्लेया; कने मरियमा दी मंगणी यूसुफ नांऐ दे माणुये नैं होईयो थी, जेह्ड़ा कि राजा दाऊदे दे खानदाने दा था। सुअर्गदूतैं तिसा अल्ल जाई करी ग्लाया, “मरियम तिज्जो मेरा नमस्कार। तिज्जो पर परमात्मे दी दया होई ऐ कने सैह़ तिज्जो सौगी ऐ।” सुअर्गदूते दिया इसा गल्ला जो सुणी करी मरियम डरी गेई, कने सोचणा लग्गी कि इसा गल्ला दा क्या मतलब ऐ? सुअर्गदूतैं तिसा जो ग्लाया, “हे मरियम; डरैं मत, क्जोकि परमात्मे दी दया तिज्जो पर होई ऐ। कने सुण, तू गर्भवती हुंगी, कने इक्क जागत जम्मगी; तू तिसदा नां यीशु रखेयां। सैह़ म्हान हुंगा, कने परम प्रधान परमात्मे दा पुत्तर हुंगा कने हमेसा तांई राज़ करगा।”

ताह़लू मरियम सुअर्गदूते नैं ग्लाणा लग्गी, “एह़ किंआं होई सकदा ऐ? मैं तां कुआरी ऐ।” सुअर्गदूते तिसा जो जवाब दित्ता, “पवित्र आत्मा कने परम प्रधान परमात्मे दी सामर्थ तिज्जो पर बणी रैहणी ऐ; इसतांई सैह़ जागत जेह्ड़ा तिज्जो ते पैदा होणे आल़ा ऐ, सैह़ पवित्र कने परमात्मे दा पुत्तर हुंगा। होर क्या ग्लां, सुण, तेरी रिस्तेदार इलीशिबा, जिसा जो लोक बाँझ ग्लांदे थे, गर्भवती ऐ कने तिसा जो छेमां मीहना लगेया ऐ। क्जोकि जेह्ड़ा वचन परमात्मे दे पास्से ते हुंदा ऐ, तिस वचने मताबक परमात्मा सब कुच्छ करी सकदा ऐ। मरियमा ग्लाया, सुण, मैं प्रभु दी दासी ऐ, जिंआं प्रभु चांह़दा तिंआं ई मिन्जो तांई होयैं।” ताह़लू सुअर्गदूत तित्थु ते चली गेआ।

एह़ होणे ते थोड़े दिन बाद, मरियम इलीशिबा नैं मिलणा गेई जिंआं ई मरियमा तिसा नमस्कार ग्लाया, तिंआं ई बच्चा तिसा दे पेटे च उटकया, कने इलीशिबा पवित्र आत्मा नैं भरोई गेई। परमात्मैं जेह्ड़ा तिन्हां दिया ज़िन्दगिया च कित्ता तिसियो दिक्‍खी करी बाकि जणासां बड़ियां खुस होईयां। त्रै मीहने मरियम इलीशिबा अल्ल रेई कऱी अपने घर वापस आई गेई।

इसते बाद, जाह़लू इलीशिबा दे प्रसूता होणे दे दिन पूरे होये, तां तिन्नै जागते जो जन्म दित्ता। जकर्याह कने इलीशिबा तिस जागते दा नां यूहन्ना रखेया, जिआं सुअर्गदूतैं तिस नैं ग्लाया था। ताह़लू परमात्मैं जकर्याह जो इजाजत दित्ती के सैह़ भिरी ग्लाणा लग्गी पेआ। जकर्याह ग्लाया, “परमात्मे दी स्तुति होयैं, क्जोकि तिन्हीं अपणे लोकां दी अपणी दया कित्ती ऐ, कने ग्लाया, एह़ जेह्ड़ा मेरा जागत ऐ सैह़ सर्वशक्तिमान परमात्मे दा भविष्यवक्ता हुंगा। कने सैह़ लोकां जो दस्सगा कि किआं अपणे पापां ते पश्चाताप करी सकदे हन।”