23. यीशु मसीह दा जन्म

यीशु मसीह दा जन्म होणे ते पैहल्लैं इआं होएया, कि जाह़लू तिसदिया माँऊ मरियमा दी मंगणी यूसुफ नांऐ दे इक्की माणुये नैं होई गेई, अपर तिन्हां दा ब्याह होणे ते पैहल्ले ई सैह़ पवित्र आत्मा दिया तरफा ते गर्भवती होई। यूसुफ जेह्ड़ा मरियमा दा होणे आल़ा लाड़ा था, सैह़ इक्क धर्मी माणु था, जाह़लू तिसियो एह़ गल्ल पता लग्गी, तां सैह़ तिसा जो बदनाम नीं करणा चांह़दा था, एह़ सोची करी तिन्हीं तिसा जो चुपचाप छड्डी दैणे दा वचार कित्ता। जाह़लू सैह़ इन्हां गल्लां जो सोचा ई करदा था ताह़लू परमात्मे दे सुअर्गदूतैं तिसदे सुपणे च आई करी तिस नैं गल्ल कित्ती।

तिन्हीं सुअर्गदूतैं यूसुफे नैं ग्लाया, “ओ यूसुफा, दाऊद राजे दे वंश, हुण तू अपणिया होणे आल़िआ लाड़िया मरियमा जो अप्पु अल्ल रखणे ते मत डर, क्जोकि जेह्ड़ा बच्चा तिसादे पेटे च ऐ, सैह़ पवित्र आत्मा दिया तरफा ते ऐ। सैह़ जागत जम्मगी कने तू तिसदा नां यीशु रखेयां क्जोकि सैह़ अपणे लोकां दा तिन्हां दे पापां ते उद्धार करगा।”

ताह़लू यूसुफ निंदरा ते जागी करी प्रभु दे सुअर्गदूते दे हुक्मे मताबक अपणिया होणे आल़िआ लाड़िया जो अपणे घरेयो लेई आएया। कने जाह़लू तिकर मरियमा जागते जो जन्म नीं दित्ता ताह़लू तिकर यूसुफैं तिसा सौगी लाड़ा-लाड़ी आल़ा रिस्ता नीं रखेया।

जाह़लू मरियमा दा प्रसूता होणे दा बग्त नैड़ैं आएया, ताह़लू सैह़ कने यूसुफ इक्क लम्मा सफर करी नैं बैतलहम सैहरे जो गै। तिन्हां दा तित्थु जाणा जरूरी था क्जोकि रोमी अधिकारी इस्राएल देसे च रैहणे आल़े लोकां दी गिणती करणा चाहंदा था कि सारे लोक तित्थु जान जित्थु तिन्हां दे पूर्वज रैंह्दे थे। ताह़लू औगुस्तुस कैसरै एह़ हुक्म दित्ता कि सारे रोमी सम्राज्य दे लोकां दी गिणती कित्ती जां कने तिन्हां दे नां लिखे जान।

जाह़लू मरियम कने यूसुफ बैतलहम सैहरे च पुज्जे, तां तित्थु तिन्हां जो रैहणे तांई कोई जगाह नीं मिल्ली। अपर सैह़ घराला च रैह्, जित्थु डंगरे रखदे थे। जाह़लू तित्थु मरियमा दे प्रसूता होणे दा बग्त आएया, ताह़लू तिन्नै अपणे जागते जो जन्म दित्ता, कने तिसियो फालड़ूये च लपेटी करी डंगरा दिया खुरलिया च रखी दित्ता। तिन्हां तिस बच्चे दा नां यीशु रखेया।

तिसा राती तिस लाक्के च कुच्छ गुआल़े थे, जेह्ड़े राती खुले मैदाने च रेई नैं अपणियां भेड्डां दा पैहरा करा करदे थे। चाणचक परमात्मे दा इक्क सुअर्गदूत तिन्हां दे सामणै आई खड़ोता कने प्रभु दा तेज तिन्हां दे चौंन्नी पास्से चमकेया, कने सैह़ बड्डे भरी डरी गै। ताह़लू तिन्हीं सुअर्गदूतैं ग्लाया, “डरा मत, दिक्खा, मैं तुहां जो बड़ी खुसिया दा सुसमाचार सणांदा ऐ; जेह्ड़ा संसारे दे सारेयां लोकां तांई होणा ऐ। कि अज्ज दाऊद राजे दे बैतलहम सैहरे च तुहां तांई इक्क उद्धार करणे आल़ा पैदा होएया ऐ, कने सैई मसीह प्रभु ऐ।

तुहां तांई तिसदी एह़ पणछैण ऐ, कि तुहां जो इक्क बच्चा जेह्ड़ा फालड़ूये नैं लपेटया कने खुरलिया च सुतेया मिलगा।” ताह़लू चाणचक अम्बर सुअर्गदूतां नैं भरौई गेआ, कने सैह़ परमात्मे दी स्तुति करणा लग्गे कने ग्लाणा लग्गे, “सारी महिमा सुअर्गे च परमात्मे जो मिल्लैं। धरतिया च तिन्हां लोकां जो सान्ति मिल्लैं जिन्हां ते सैह़ खुस ऐ।

जाह़लू सुअर्गदूत चली गे। ताह़लू गुआल़े भी अपणियां भेड्डां जो छड्डी करी जागते दिखणा बैतलहम सैहरे जो चली गे। कने तिन्हां जागते जो खुरलिया च सुतेया दिख्या, तिसियो दिक्खी नैं सुअर्गदूतां दी सैह़ गल्ल जेह्ड़ी इस जागते दे बारे च तिन्हां नैं ग्लाईयो थी, तिन्हां लोकां जो कने तिसदे माँ-पियो जो दस्सी दित्ती, इसा गल्ला जो सुणी करी लोक बड़े खुस थे, कने मरियम भी बड़ी खुस थी। कने गुआलेयां जो जिंआं सुअर्गदूतां ग्लाया था, तिंआं ई सब कुच्छ सुणी करी कने दिक्खी करी परमात्मे दी महिमा कने स्तुति करदे-करदे बापस चली गै।

पूरब दिसा ते कुच्छ लोक आये जिन्हां जो तारेयां दा भेत दस्सणे दा ज्ञान था। तिन्हां अम्बरे च अनोखा तारा दिख्या था। तिन्हां ग्लाया कि इस तारे दा दुस्सणे दा मतलब एह़ ऐ कि यहूदियां दा इक्क नौआं राजा पैदा होएया ऐ। अहां इक्क लम्मा सफर करी नैं तिस राजे जो दिखणा कने तिसदी अराधना करणा आएयो हन। तिसते बाद सैह़ बैतलहम सैहरे जो गे, कने तिस घरे च पुज्जे जित्थु यीशु कने तिसदे माँ-पियो रेह् दे थे।

जाह़लू इन्हां लोकां यीशु जो अपणियां माँऊ सौगी दिख्या तां सिर झुकाई नैं जागते जो प्रणांम कित्ता, कने तिसदी अराधना कित्ती। कने अपणा-अपणा झोल़ु खोली नैं तिसियो खुसबुदार चीज्जां कने कीमती तोफे दित्ते। भिरी सैह़ घर वापस चली गे।