24. यूहन्नैं यीशु जो बपतिस्मा दित्ता

इलीशिबा कने जकर्याह दा जागत यूहन्ना बड्डा होई नैं इक्क भविष्यवक्ता बणी गेआ। सैह़ इक्क सुणसाण जगाह च रैंह्दा था, कने सैह़ ऊँटे दे बाल़ां दे कपड़े बणाई नैं लगांदा था, कने अपणे लक्के च चमड़े दा पटका बन्नी रखदा था। कने सैह़ टिड्डियां कने जंगली मखीर खांदा था।

मते लोक यूहन्ने दियां गल्‍लां जो सुणने तांई सुणसाण जगाह च आई गे, यूहन्नै तिन्हां नैं ग्लाया, “अपणे मने बदला कने अपणे पापां ते पश्चाताप करा क्जोकि सुअर्गे दा राज़ नेड़े आई गेआ ऐ।

जाह़लू लोकां यूहन्ने दे संदेसे जो सुणेया, तां मतेआं लोकां अपणा मन बदलेया कने अपणे पापां ते पश्चाताप कित्ता, कने तिसते बपतिस्मा लेआ। यूहन्ने जो दिखणा मते यहूदी अगुवे आये, अपर तिन्हां अपणा मन नी बदलेया कने ना अपणे पापां ते पश्चाताप कित्ता।

यूहन्ने यहूदी अगुआं नैं ग्लाया, ओ सर्पे साइआं जहरिलै लोको, अपणे पापां ते पश्चाताप करा कने अपणे मने बदला। हुण गल्ल इआं कि परमात्मा हर इक्की जो जेह्ड़ा अपणे पापां ते पश्चाताप नीं करणा चांह़दा, तिसियो सज़ा दैणे तांई बिलकुल त्यार ऐ। ठीक तिंआं ई जिंआं कोई रूख खरा फल़ नीं दिंदा, कने तिसियो बड्डी करी अग्गी च फूकी दिंदे हन।” यूहन्नै सैह़ वचन पूरा कित्ता, जेह्डा यशायाह भविष्यवक्ता दिया कताबा च लिख्या था, दिक्ख, “मैं बड़ी तौली तिज्जो ते पैहल्लैं अपणे संदेस दैणे आल़े जो घल्लगा, जेह्ड़ा तिज्जो तांई लोकां देयां मनां जो त्यार करगा।”

कुच्छ यहूदी अगुवां यूहन्ने ते पुछया कि क्या तू सैह़ मसीह ऐ। यूहन्नैं जबाब दित्ता, “मैं मसीह नीं ऐ, अपर जेह्ड़ा मेरे बाद ओणे आल़ा ऐ, सैह़ मिन्जो ते बड़ा सामर्थी ऐ। मैं तिसदियां जुतियां चुकणे जोग्गा भी नीं ऐ।

दूजे दिन यीशु गलील प्रदेसे ते यरदन नदिया कनारे बपतिस्मा लैणे तांई यूहन्ने अल्ल आएया। जाह़लू यूहन्नैं तिसियो दिख्या, तां तिन्हीं ग्लाया, “दिक्खा एह़ परमात्मे दा मेम्ना ऐ जेह्ड़ा अपणा बलिदान देई करी संसारे दे पाप जो अप्पु ऊपर लेई लैंदा ऐ।

अपर यूहन्ना एह़ ग्लाई नैं तिसियो रोकणा लग्गा, “मिन्जो तां तेरे हत्थे ते बपतिस्मा लैणे दी जरूरत ऐ, कने तू मिन्जो अल्ल आएया?” यीशुयैं तिस नैं ग्लाया, “हुण तां मिन्जो तिज्जो ते बपतिस्मा लैणा चाइदा, क्जोकि अहां जो इस तरीके नैं परमात्मे दिया इच्छा जो पूरा करणा ऐ।” ताह़लू यूहन्नैं तिसियो बपतिस्मा दित्ता, बल्कि यीशुयैं कदी पाप नीं कित्या था।

बपतिस्मा लैणे ते बाद जाह़लू यीशु पाणिये ते निकल़ी करी बाहर आएया, ताह़लू परमात्मे दा आत्मा कबूतरे साइआं आएया कने तिस पर आई गेआ। तिसी बग्त परमात्मैं सुअर्गे ते गल्ल कित्ती कने ग्लाया, “तू मेरा प्यारा पुत्तर ऐ, मैं तिज्जो नैं प्यार करदा ऐ कने मैं तिज्जो ते बड़ा खुस ऐ।

परमात्मैं यूहन्ने नैं ग्लाया था, “जिस पर पवित्र आत्मा ओंगा तिसियो तू बपतिस्मा दिंगा।” सैई परमात्मे दा पुत्तर ऐ परमात्मा इक्को ई ऐ। अपर जाह़लू यूहन्नैं यीशु जो बपतिस्मा दित्ता, ताह़लू तिन्हीं पिता परमात्मे जो गल्लां करदे सुणेया, पुत्तरैं परमात्मे जो दिख्या ऐ, जेह्ड़ा कि यीशु ऐ कने तिन्हीं पवित्र आत्मा जो दिख्या ऐ।