25. सैताने दे जरिये यीशु दी परख

यीशु बपतिस्मा लैणे ते बाद, पवित्र आत्मा यीशुये जो सुनसाण जगाह जो लेई गेआ। तिसा जगाह च यीशु चाल़ी दिन कने चाल़ी रात रेह्आ। चाल़ी दिन-रात यीशुयैं कुच्छ नीं खादा क्जोकि तिन्हीं व्रत रखेया था, ताह़लू सैतान यीशुये दी परख करणा आएया।

जाह़लू यीशु जो भुख लग्गी, तां सैतान परखणे तांई यीशुये नैं ग्लाणा लग्गा, “जे तू परमात्मे दा पुत्तर ऐ, तां ग्ला कि एह़ पत्थर रोटियां बणी जान, तांजे तू खाई सकैं।”

अपर यीशुयैं सैताने नैं ग्लाया, “पवित्रशास्त्रे च परमात्मे दा वचन ग्लांदा ऐ, जिन्दा रैहणे तांई माणुये जो रोटिया दी जरुरत नी ऐ, अपर हर इक्क वचने ते जेह्ड़ा परमात्मे दे मुँऐ ते निकल़दा ऐ, जे तिस पर चलगा तां जिन्दा रैंह्गा।

ताह़लू सैतान यीशुये जो मंदरे जो लेई गेआ कने तिसियो मंदरे दिया चुंडिया पर खरेड़ी दित्ता, कने तिस नैं ग्लाणा लग्गा, “जे तू परमात्मे दा पुत्तर ऐ, तां अप्पु जो ऐत्थु ते थल्लैं छाल़ मारी दे, क्जोकि पवित्रशास्त्रे च परमात्मे दा वचन ग्लांदा ऐ: ‘परमात्मा तिज्जो बचाणे तांई अपणे सुअर्गदूतां जो हुक्म दिंगा, कने तिन्हां तिज्जो हत्थां पर चुक्की लैणां। कने इआं होणा कि तेरे पैरां च पत्थरे नैं ठोकर भी नीं लगणी।’”

अपर यीशु तिस नैं ग्लाणा लग्गा, “पवित्रशास्त्रे च परमात्मे दा वचन एह़ भी ग्लांदा ऐ, ‘तू प्रभु अपणे परमात्मे जो मत परख।’”

भिरी सैतान यीशु जो इक्क बड़े बड्डे कने ऊचे प्हाड़े पर लेई गेआ कने सारे संसारे दा राजपाठ कने तिसदी धन-दौलत दा रुतबा दस्सी करी, तिस नैं ग्लाणा लग्गा, “जे तू झुकी नैं मेरा आदर कने मेरी भक्ति करैं, तां मैं एह़ सब कुच्छ तिज्जो देई दिंगा।”

ताह़लू यीशुयैं तिस नैं ग्लाया, “हे सैतान दूर होई जा, क्जोकि पवित्रशास्त्रे च परमात्मे दा वचन ग्लांदा ऐ, ‘तू प्रभु अपणे परमात्मे जो झुकी करी आदर कर, कने सिर्फ तिसदी भक्ति कर।’”

यीशु सैताने दे बैहकावे च नीं आएया, कने ताह़लू सैतान तित्थु ते चली गेआ। भिरी सुअर्गदूत आई नैं तिसदी सेवा करणा लग्गे।