26. यीशु अपणी सेवा शुरू कित्ती

जाह़लू सैतान यीशु दी परख करी बैठा तां तिसते बाद, यीशु वापस गलील प्रदेसे च आएया। एह़ सैई जगाह ऐ जित्थु यीशु रैंह्दा था। यीशु पवित्र आत्मा दिया सामर्था नैं भरौई गेआ था, कने यीशुयैं लग्ग-लग्ग जगांह च जाई करी लोकां जो सिक्षा दित्ती। सारे लोक तिसदे बारे च खरियां गल्लां ग्लांदे थे।

यीशु नासरत सैहरे च गेआ। एह़ सैह़ ग्रां ऐ जित्थु तिन्हीं अपणा बचपण बिताया था। बिस्रामे आल़े दिन, यीशु आराधना करणे अल़िआ जगाह च गेआ। यहूदी अगुआं तिसियो यशायाह भविष्यवक्ता दिया कताबा ते वचन पढ़णे तांई ग्लाया गेआ दित्ती। ताह़लू यीशुयैं तिसा कताबा जो खोली करी तिस च इक्क वचन लोकां तांई पढ़ेया।

यीशुयैं वचन इस तऱके नैं पढ़ेया, “परमात्मे मिन्जो अपणी पवित्र आत्मा दित्तियो ऐ तांजे मैं गरीबां जो सुसमाचार सणाई सकैं। परमात्मे मिन्जो इसतांई घल्लेया ऐ कि मैं कैदियां जो अजाद करैं, अन्नेयां जो नजर पाणे दी ताकत दैं जिन्हां जो दूये लोक दुख दिंदे हन तिन्हां जो छुटकारा दैं। एह़ सैह़ बग्त ऐ जाह़लू परमात्मा अहां पर दया करगा कने अहां दी मदत करगा।”

भिरी यीशु बेई गेआ। सारे लोक तिसियो बड़े ध्याने नैं दिखा दे थे। सैह़ जाणदे थे कि पवित्रशास्त्रे दा जेहड़ा वचन तिन्हीं हुण पढ़ेया था सैह़ मसीह दे बारे च था। यीशुयैं ग्लाया, “जेह्ड़ा वचन मैं हुण तुहां तांई पढ़ेया ऐ, सैह़ इस बग्त पूरा होआ दा ऐ।” सारे लोक हरान थे। तिन्हां लोकां ग्लाया, “क्या एह़ यूसुफे दा पुत्तर नीं ऐ?”

ताह़लू यीशुयैं ग्लाया, “एह़ सच ऐ कि कुसी भी भविष्यवक्ता दा अपणे सैहरे च कदी आदर नीं हुंदा। एलिय्याह भविष्यवक्ता दे बग्ते च, जाह़लू साढ़े तीन साल तिकर बरखा नीं होई तिस बग्त इस्राएल देसे च मतिआं विधवां थियां। अपर परमात्मैं एलिय्याह जो इस्राएल देसे च कुसा भी विधवा दी मदत करणे तांई नीं घल्लेया। बल्कि तिन्हीं एलिय्याह जो सिदोन देसे दिया विधवा दी मदत करणे तांई घल्लेया।”

यीशुयैं एह़ भी ग्लाया, “कि एलीशा भविष्यवक्ता दे बग्ते च, इस्राएल देसे च मते सारे लोक कोढ़े दिया बमारिया ते दुखी थे। अपर एलीशा तिन्हां च कोई खरा नीं कित्ता। तिन्हीं सिरफ इस्राएली दुश्मणा दा सेनापति नामान खरा कित्ता।” अपर जेहड़े लोक यीशुये दिया सिक्षा जो सुणा दे थे सैह़ यहूदी लोक थे। इसतांई जाह़लू तिन्हां तिसियो एह़ ग्लांदे सुणेया तां सैह़ तिस पर गुस्सा होये।

नासरत सैहरे दे लोकां यीशु जो पकड़ी लेआ कने सैह़ तिसियो यहूदी महासभा ते घसीटी करी बाहर भेठी पर लेई गै। सैह़ तिसियो तिसा भेठी ते रड़काणा चांहदे थे। अपर यीशु लोकां दियां भीड़ा ते निकल़ी गेआ कने नासरत सैहरे जो छडडी करी चली गेआ।

भिरी यीशु गलील प्रदेसे दे सारे लाक्केयां च गेआ, कने मते सारे लोक तिस अल्ल आई गे। सैह़ अप्पु सौगी मतेआं लोकां जो लेई करी आये जेह्ड़े बमार कने लंगड़े थे। तिन्हां च कुच्छ अन्ने कने लंगड़े, बोल़े कने गूँगे थे।

इसते अलावा, मते सारे ऐदेय लोक यीशुये अल्ल आये जिन्हां च दुष्टआत्मां थियां। यीशुयैं तिन्हां दुष्टआत्मा जो तिन्हां लोकां ते बाहर निकल़णे दा हुकम दित्ता। सैह़ दुष्टआत्मां तिन्हां लोकां ते बाहर निकल़ी गियां कने जोरे नैं डडदियां यीशुये नैं ग्लाणा लगियां, “तू परमात्मे दा पुतर ऐ!” एह़ सब कुच्छ दिक्खी करी भीड़ा दे लोक हरान थे, कने तिन्हां परमात्मे दी स्तुति कित्ती।

भिरी यीशुयैं खास बाराह चेले चुणे जिन्हां जो तिन्हीं प्रेरित नां दित्ता। तिन्हां प्रेरितां यीशु सौगी सफर कित्ता कने तिसते सिक्षा लेई।