27. दयालु सामरी दी काहणी

इक्क दिन जाह़लू यीशु लोकां जो सिक्षा दे दा था, ताह़लू तित्थु व्यवस्था जो सिखाणे आल़ा माणु यीशुये अल्ल आएया। सैह़ सारेयां जो एह़ दस्सणा चांहदा था कि यीशु गलत तरीके नैं सिक्षा दे दा था। इसतांई तिन्हीं ग्लाया, “हे गुरू, सदा दी ज़िन्दगी पाणे तांई मैं क्या करैं?” यीशुयैं जवाब दित्ता, “परमात्मे दिया व्यवस्था च क्या लिख्या ऐ, तू तिसा जो किआं समझदा ऐ?”

तिन्हीं माणुयैं ग्लाया, “परमात्मे दिया व्यवस्था च लिख्या ऐ कि अपणे परमात्मे नैं अपणे सारे मने, प्राण, सामर्थ, कने अक्ला सौगी प्यार रख। कने अपणे प्ड़ेसिये नैं अप्पु साइआं प्यार रख।” यीशुयैं जवाब दित्ता, “तू ठीक ग्लांदा ऐ! जे तू इआं करगा, तां तिज्जो सदा दी ज़िन्दगी मिलगी।”

अपर सैह़ व्यवस्था जो सिखाणे आल़ा माणु लोकां जो दस्सणा चांहदा था कि तिसदा ज़िन्दगी जीणे दा तरीका ठीक था। इसतांई तिन्हीं यीशुये ते पुछया, “ठीक ऐ, तां मेरा प्ड़ेसी कुण ऐ?”

एह़ गल्ल सुणी करी यीशुयैं तिस माणुये जो इक्क काहणी सणाई नैं जवाब दित्ता, “कि इक्क बरी इक्क यहूदी माणु यरूशलेम सैहरे ते यरीहो सैहरे दा सफर करा दा था।”

“ताह़लू रस्ते च कुच्छ डाकुआं तिसियो दिख्या कने तिस पर हमला करी दित्ता, कने तिन्हां तिसियो मारेया कुट्टेया, कने तिसदा सब कुच्छ लुटी लेआ कने तिसियो अधमरा छड्डी करी चली गे।”

“तिसते थोड़िया देरा बाद इक्क यहूदी याजक तिसा रस्ते च जा दा था। तिन्हीं याजकैं तिस माणुये जो रस्ते च जख्मी हालता च पेआ दिख्या। अपर तिन्हीं तिसदी कोई मदत नीं कित्ती कने रस्ते दे दूज्जी तरफ चली गेआ। तिन्हीं तिस माणुये पर कोई दया नीं कित्ती।”

“भिरी थोड़िया देरा बाद, इक्क लेवी माणु तिस रस्ते च आएया, जेह्ड़ा मंदरे च कम्म करदा था। तिन्हीं तिस जख्मी माणुये दी मदत नीं कित्ती, कने सैह़ भी तिसियो दिक्खी करी चली गेआ। तिन्हीं भी तिस पर कोई दया नीं कित्ती।”

“अगला माणु जेहड़ा तिस रस्ते पर आएया सैह़ सामरिया देसे दा इक्क माणु था। तिन्हीं सामरी माणुयैं रस्ते च तिस जख्मी माणुये जो दिख्या। तिन्हीं दिख्या कि एह़ यहूदी ऐ, (सामरी लोक कने यहूदी इक्की दूये नैं नफरत करदे थे।) अपर भिरी भी तिन्हीं सामरी माणुये तिस पर दया कित्ती। सैह़ तिस जख्मी माणुये अल्ल गेआ। कने तिन्हीं तिसदे जख्मां पर दवाई लगाई कने पट्टी करी दित्ती।”

“भिरी सामरी माणुयैं तिस जख्मी माणुये जो अपणे गधे पर बैठाई करी इक्की सरांईं च लेई गेआ। कने जित्थु तिन्हीं तिसदी देखभाल कित्ती।”

अगले दिन, तिस सामरी माणुये जो अपणिया यात्रा च जाणा जरूरी था। तिन्हीं तिस सरांईं दे मालिके जो कुच्छ पैसे दित्ते। तिन्हीं तिस नैं ग्लाया, “इस माणुये दी सेवा करणा कने ख्याल रखणा। जे इन्हां पैसेयां दे अलावा तेरा कुच्छ होर पैसा खर्च हुंगा तां मैं वापस आई करी तेरे सारे पैसे भरी दिंगा।”

भिरी यीशुयैं तिसा व्यवस्था जो सखाणे आल़े माणुये ते पुछया, “तू क्या सोच दा ऐ? इन्हां त्रीनां लोकां च कुण तिस माणुये दा प्ड़ेसी ऐ जिसियो लुटेया कने मारेया था?” तिन्हीं जवाब दित्ता, “सैई जिन्हीं तिस पर दया कित्ती थी।” यीशुयैं तिस नैं ग्लाया, “तू जा कने ऐई कर।”