28. इक्क अमीर जुआन यहुदी माणु

इक्क दिन, इक्क अमीर जुआन यहूदी माणु यीशुये अल्ल आई करी तिसते पुछणा लग्गा, “हे उतम गुरू, सदा दी ज़िन्दगी पाणे तांई मिन्जो क्या करणा चाइदा?” यीशुयैं तिस नैं ग्लाया,“तू मिन्जो उत्तम क्जो ग्लांदा ऐ? सिर्फ इक्को ई उत्तम ऐ कने सैह़ परमात्मा ऐ। अपर जे तू सदा दी ज़िन्दगी पाणा चांहदा ऐ तां परमात्मे दिया व्यवस्था दा पालन कर।”

तिन्हीं यीशु ते पुछया, मिन्जो कुण-कुण दे हुक्मां दा पालन करणा जरूरी ऐ? यीशुयैं तिसियो जवाब दित्ता, “खून मत करणा, ब्यभिचार मत करणा, चोरी मत करणा, झूठ मत ग्लाणा, अपणे माँ-पियो दी इज्जत करणी, कने अपणे प्ड़ेसिये नैं अप्पु साइआं प्यार करणा।”

अपर तिन्हीं जुआन माणुये ग्लाया, “मैं अपणे बचपने ते ई इन्हां सारेयां हुक्मां दा पालन करदा आएया। मिन्जो सदा दी ज़िन्दगी पाणे तांई हुण भी क्या करणे दी जरूरत ऐ?” यीशुयैं तिसदी तरफ दिख्या कने तिस नैं प्यार कित्ता।

यीशुयैं जवाब दित्ता, “जे तू सिद्ध होणा चांहदा ऐ तां जाईकरी अपणा सब कुच्छ बेची दे कने सारी धन-दौलत गरीबां च बंडी दे, कने तिज्जो सुअर्गे च धन-दौलत मिलगी। भिरी आई करी मिन्जो पचांह़ चली पौ।”

जेह्ड़ा यीशुयैं ग्लाया, तिसियो सुणी करी जुआन माणु बड़ा उदास होई गेआ, क्जोकि सैह़ बड़ा भरी अमीर था कने सैह़ अपणी सारी धन-दौलत दैणा नीं चांहदा था। सैह़ उदास होई करी तित्थु ते अल्ल चली गेआ।

ताह़लू यीशुयैं अपणेया चेलेयां नैं ग्लाया, “परमात्मे दे राज्ज च अमीर लोकां दा औणा बड़ा भरी औखा ऐ! हाँ, अमीर लोकां दा परमात्मे दे राज्ज च औणा बड़ा औखा ऐ अपर कुसी ऊटे दा सुईया दे नके च होई करी निकल़ी जाणा बड़ा सौखा ऐ।”

ताह़लू चेले यीशुये दियां गल्लां सुणी करी हरान होई गे। कने अप्पु च ग्लाणा लग्गे, “जे एदेया ऐ तां परमात्मा कुसियो बचांगा?”

यीशुयैं चेलेयां दी तरफ दिक्खी करी ग्लाया, “लोक अपणे आप्पे जो नीं बचाई सकदे हन। इआं करणा बड़ा मुसकल ऐ। अपर परमात्मा सब कुच्छ करी सकदा ऐ।”

पतरसैं यीशु नैं ग्लाया, “अहां चेले अपणा सारा कुच्छ छड्डी करी तिज्जो पचांह़ चली पैयो हन। तां अहां जो क्या इनाम मिलगा?”

यीशुयैं जवाब दित्ता, “हर इक्क माणुये जिन्हीं मिन्जो तांई अपणा घर, भाऊ, बैहण, माँ-पियो, बच्चे, जायदात जो छड्डी दित्या ऐ, सैह़ सौ गुणा फल़ पांगा कने सदा दी ज़िन्दगी भी पांगा। अपर इस संसारे च जेह्ड़े लोक अपणे आप्पे जो बड्डा समझदे हन, सैह़ लोक परमात्मे दिया नजरा च लोक्के कित्ते जांगे, के जेह्ड़े लोक इस संसारे च अपणे आप्पे जो लोक्का समझदे हन सैह़ परमात्मे दिया नजरा च बड्डे कित्ते जांगे।”