29. कठोर दासे दी काहणी

इक्क दिन, पतरसैं यीशुये ते पुछया, “हे गुरु, जाह़लू मेरा भाऊ मेरे खलाफ पाप करदा ऐ तां मिन्जो अपणे भाऊये जो कितणी बरी माफ करणा चाइदा? क्या सत बरी तिकर? यीशुयैं ग्लाया, “सत बरी नीं, अपर सत दी बजाए सत्तर बरी!” यीशुये दे ग्लाणे दा मतलब ऐ कि अहां जो हमेसा माफ करणा चाइदा। ताह़लू यीशुयैं तिन्हां जो इक्क काहणी सणाई।

यीशुयैं ग्लाया, “परमात्मे दा राज्ज इक्क राजे साइआं ऐ जेहड़ा अपणे दासे ते लेखा लैणां चांहदा था। जाह़लू सैह़ लेखा लैणा लग्गा, तां तिसदा इक्क दास मतेआं पैसेयां दा कर्जदार था।”

अपर सैह़ दास अपणे कर्जे जो भरी नीं सकेया, इसतांई राजैं ग्लाया, “इसदे कर्जे भरने तांई इस माणुये जो कने इसदे परवारे जो गुलामिया च बेची देआ।”

तिस दासैं राजे सामणे झुकी करी प्रणाम करी नैं ग्लाया, “हे मेरे मालिक सबर रख कने मिन्जो पर दया कर, मैं तेरा सारा कर्ज भरी दिंगा। राजैं तिस दासे पर दया कित्ती, इसतांई तिन्हीं तिसदे सारे कर्जे जो माफ करी दित्ता कने तिसियो जाणा दित्ता।”

“अपर जाह़लू सैह़ दास मैहले ते बाहर आएया, तां तिसियो तिसदा इक्क साथी मिल्ला जेह्ड़ा तिस सौगी दासे दा कम्म करदा था सैह़ दास तिसदे थोड़े पैसेयां दा कर्ज दार था। तिन्हीं दासे अपणे साथी दासे जो पकड़ी लेआ कने तिसियो ग्लाया, जेहड़ा तिज्जो पर मेरा कर्ज ऐ तिसियो तू हुण ई भरी दे!”

“इसा गल्ला जो सुणी करी तिसदा साथी दास तिस नैं विणती करी नैं ग्लाणा लग्गा, हे साथी सबर रख कने मिन्जो पर दया कर, मैं अपणा अपणे सारा कर्ज भरी दिंगा। अपर तिसदा साथी नीं मन्नेया, कने तिन्हीं अपणे साथी दासे जो जेला च पाई दित्ता कि जाह़लू तिकर सैह़ तिस कर्जे नीं भरी दिंगा ताह़लू तिकर जेल च रैंह्।”

“जेहड़ा कुच्छ तिन्हीं दासैं अपणे साथी दासे नैं कित्ता सैह़ दूयेयां दासां दिक्खी लेआ था, कने सैह़ एह़ दिक्खी करी बड़े दुखी होये। सैह़ राजे अल्ल कने तिन्हां तिसियो सब कुच्छ दस्सी दित्ता।”

“राजे तिस दासे जो सद्दी करी ग्लाया, हे दुष्ट दास! मैं तेरे कर्जे जो इसतांई माफ कित्तेया था क्जोकि तैं मिन्जो नैं विणती कित्तियो थी। तिज्जो भी अपणे साथी दासे दा कर्ज माफ करणा चाइदा था। ताह़लू राजा इतणा गुस्सा होएया कि तिन्हीं तिस दुष्ट दासे जो जेला च पाई दित्ता जाह़लू तिकर कि सैह़ अपणा सारा कर्ज भरी नीं दैं ताह़लू तिके सैह़ भी जेला च रैंह्।”

ताह़लू यीशुयैं ग्लाया, “जे तुहां अपणे भाऊये जो अपणे मने ते माफ नीं करगे, तां मेरा पिता जेह्ड़ा सुअर्गे च विराजमान ऐ तुहां सौगी भी इआं ई करगा।”