30. पंज हज़ार लोकां जो खाणा खुआणा

यीशुयैं अपणेयां प्रेरितां जो प्रचार करणे तांई कने लोकां जो सिक्षा दैणे तांई मते सारे ग्रां च घल्लेया। जाह़लू सैह़ ओत्थू ते वापस आई तां तिन्हां यीशु जो दस्सेया कि तिन्हां क्या-क्या कित्ता। ताह़लू यीशुयैं तिन्हां जो झीला दे दूये पास्सैं इक्क सांत जगाह पर जाई करी अराम करणे तांई ग्लाया। इसतांई सैह़ इक्क किस्त्तिया पर चढ़ी गै कने झीला दे दूये पास्सैं चली गै।

अपर तित्थु मते सारे लोक थे जिन्हां यीशु कने तिसदेयां चेलेयां जो किस्तिया च जांदे दिख्या था। एह़ लोक तिन्हां ते गां झीला दे दूये पास्स़ैं जाणे तांई झीला दे बक्खे-बक्खे पैदल नठे कने तिन्हां ते पैहल्लैं पुज्जी गै। जाह़लू यीशु कने तिसदे चेले पुज्जे तां लोकां दी इक्क बड़ी बड्डी भीड़ तिन्हां दा इन्तजार कर दी थी।

तिसा भीड़ा च लगभग पंज हज़ार मर्द थे। अपर तिन्हां च जणासां कने बच्चेयां दी गिणती नीं थी। यीशुयैं तिन्हां लोकां पर बड़ा तरस खादा। क्जोकि यीशुयैं तांई सैह़ लोक भेड्डां साइआं थे। इसतांई तिन्हीं तिन्हां जो सिक्षा दित्ती कने तिन्हां च जेह्ड़े लोक बमार थे तिन्हां जो खरा कित्ता।

जाह़लू संझ होई गेई तां चेलेयां यीशुये नैं ग्लाया, “हुण संझ बड़ी होई गियो ऐ कने ऐत्थु अक्खे-बक्खे कोई ग्रां नीं ऐ। इन्हां लोकां जो घल्ली देआ तांजे सैह़ जाई करी खाणे तांई कुच्छ लेई ओन।”

अपर यीशुयैं चेलेयां जो ग्लाया, “तुहां इन्हां लोकां तांई खाणे सा इन्तजाम करा!” तिन्हां जवाब दित्ता, “इन्हां लोकां तांई इतणियां रोटियां दा इन्तजाम अहां ते नीं होणा? क्जोकि अहां अल्ल सिर्फ पंज रोटियां कने दो लोक्कियां मच्छियां हन।”

यीशुयैं अपणेया चेलेयां जो ग्लाया, कि इन्हां लोकां जो ग्ला कि पंजाह-पंजाह माणुआं दा झुन्ड बणाई नैं बैई जा।

ताह़लू यीशुयैं पंज रोटियां कने दूँ मच्छियां जो लेईकरी सुअर्गे दे पास्सैं दिख्या, कने तिस खाणे तांई परमात्मे जो धन्यावाद दित्ता।

भिरी यीशु रोटियां जो तोड़ी-तोड़ी करी दिंदा गेआ कि सारे लोकां जो बंडी देआ कने भिरी दूँ मच्छियां जो भी सारे लोकां जो बंडी दित्ता। चेले तिस खाणे जो बंडदे रैह्, कने सैह़ खाणा खत्म नीं होएया कने सैह़ सारे लोक खाई करी रज्जी गै।

तिसते बाद, चेलेयां तिस खाणे जो किट्टा कित्ता जेह़डा बची गेआ था तिस च बारह टोकरु रोटियां दे होर भरौई गै! सैह़ सारा खाणा तिन्हां पंज रोटियां कने दूँ मच्छियां ते आएया था।