31. यीशुये दा पांणिये पर चलणा

पंज हज़ार लोकां जो खाणा खुआणे ते बाद, यीशुयैं अपणे चेलेयां जो किस्तिया चढ़णे तांई ग्लाया। यीशुयैं तिन्हां जो झीला दे दूये पास्सैं जाणे तांई ग्लाया अपर यीशु थोड़े बग्ते तांई औत्थु रूकी गेआ। अपर चेले चली गै कने यीशुयैं भीड़ा जो विदा कित्ता कि अपणे घरेयो चली जान। इसते बाद, यीशु प्रार्थना करणे तांई इक्क प्हाड़े पर चली गेआ। औत्थु यीशु किल्ला था, कने तिन्हीं राती मती देर प्रार्थना कित्ती।

तिस बग्त, चेले अपणिया किस्तिया च जा दे थे, अपर बड़ी तेज हौआ उल्टी दिशा दी तरफ चलियो थी। आधी रात होई जाणे पर भी सैह़ सिर्फ झीला दे बिच ई पुज्जेयो थे।

प्रार्थना करणे ते बाद, यीशु अपणे चेलेयाम अल्ल वापस चली गेआ। सैह़ किस्तिया दे पास्सैं जाणे तांई पांणिये ऊपर चलणा लग्गा।

ताह़लू चेलेयां यीशु जो झीला पर चलदे दिख्या। सैह़ बड़े भरी डरी गै क्जोकि तिन्हां सोचेया था कि एह़ तां कोई भुत ऐ। यीशु जाणदा था कि सैह़ डरी गियो हन, इसतांई तिन्हीं तिन्हां जो उआज़ देई करी ग्लाया, “डरा मत, मैं ऐ!”

ताह़लू पतरसैं यीशुये जो ग्लाया, “हे प्रभु, जे एह़ तू ऐ तां मिन्जो भी पांणिये पर चली करी तिज्जो अल्ल औणे दा हुक्म दे।” यीशुयैं पतरसे जो ग्लाया, “आई जा!”

ताह़लू पतरस किस्तिया ते उतरी गेआ कने यीशुयैं अल्ल जाणे तांई पांणिये पर चलणा लग्गा। अपर थोड़ी दूर जाई करी, तिन्हीं अपणियां अंखी जो यीशुये ते हटाई लियां कने लैहरां जो दिखणा लग्गा कने तेज हौआ जो महसूस करणा लग्गा।

कने ताह़लू पतरस डरी गेआ कने पांणिये च डूबणा लग्गा। “हे प्रभु, मिन्जो बचा!” यीशुयैं तिस बग्त अपणा हत्थ गांह करी नैं तिसियो पकड़ी लेआ। ताह़लू तिन्हीं पतरसे जो ग्लाया, “तेरा बसुआस बड़ा घट ऐ! तैं मिन्जो पर बसुआस क्जो नीं कित्ता?”

ताह़लू यीशु कने पतरस किस्तिया पर चढ़ी गै कने झट हौआ चलणा बंद होई गेई। पांणियर दियां लैहरां शांत होई गियां। चेलेयां हरान होई गे कने तिन्हां यीशु जो झुकी करी प्रणाम कित्ता। तिन्हां यीशु दी अराधना कित्ती कने तिस नैं ग्लाया, “सच्ची तू परमात्मे दा पुत्तर ऐ।”