32. यीशु दुष्टआत्मां दे सताये माणुये जो कने इक्क बमार जणासा जो खरा करदा ऐ

इक्क दिन यीशु कने तिसदे चेले अपणिया किस्तिया च बैठी करी तिस सैहरे जो गै जित्थू गिरासेनी लोक रैंह्दे थे। सैह़ तिस सैहरे च पुज्जी करी किस्तिया ते उतरी गै।

औत्थु इक्क माणु था जिस च मतिआं दुष्टआत्मां थियां। कने सैह़ यीशु नैं मिल्ला।

एह़ माणु इतणा ताकतवर था कि कोई भी तिसियो काबू च नीं करी सकदा था। मती बरी लोकां तिसदे हत्थां कने पैरां जो जंजीरा नैं भी बन्नेया, अपर सैह़ तिन्हां जो तोड़ी दिंदा था

सैह़ माणु कब्रिस्तान च रैंह्दा था। कने पूरा दिन कने पूरी रात डडदा रैंह्दा था। सैह़ कपड़ेयां नीं पैहनदा था कने हमेसा अपणे आप्पे जो पत्थरां नैं जख्मी करदा था।

जिआं तिन्हीं माणुये यीशु जो दिख्या, तां सैह़ दौड़ी करी यीशुये अल्ल आएया कने तिसदे सामणे अपणे गोड्डे टेकी दित्ते। ताह़लू यीशुयैं तिस माणुये दे अन्दरे दियां दुष्टआत्मा नैं गल्लां कित्तियां कने ग्लाया, “इस माणुये ते बाहर निकल़ी जा!”

सैह़ दुष्टआत्मा जोरे नैं डडी करी ग्लाणा लग्गी, “हे यीशु, परम प्रधान दे पुत्तर, तेरा मिन्जो नैं क्या कम्म? कृपा करीके मिन्जो मत तंग कर!” ताह़लू यीशुयैं तिसा दुष्टआत्मा ते पुछया, “तेरा नां क्या ऐ?” तिन्नै जवाब दित्ता, “मेरा नां सेना ऐ, क्जोकि अहां मतिआं हन।”

तिन्हां दुष्टआत्मां यीशुये नैं विणती कित्ती, “कृपा करीके अहां जो इस सैहरे ते बाहर मत घल्ला!” तित्थु प्हाड़े पर सूअरां दा इक्क झुंड चुगा दा था। इसतांई तिन्हां दुष्टआत्मां यीशुये नैं विणती कित्ती, “कृपा करी नैं अहां जो तिन्हां सूअरां च घल्ली दे! “यीशुयैं ग्लाया, “ठीक ऐ, तिन्हां च चलिया!”

ताह़लू सैह़ दुष्टआत्मां तिस माणुये ते निकल़ी करी तिन्हां सूअरां दे अन्दर चली गियां। सैह़ सूअर दौड़ी करी खड़िया भेठी ते रिड़की करी पांणिये च जाई पै। तिस झुंडे च लगभग 2000 सूअर थे।

तित्थु तिन्हां सूअरां दी देखभाल़ करणे आल़़े लोक थे। जाह़लू तिन्हां एह़ सब कुच्छ दिख्या तां सैह़ सैहरे दी तरफ नठी गै। यीशुयैं जेह्ड़ा तिस प्हाड़े पर कित्तेया था। सैह़ तिन्हां सारे लोकां जो दस्सी दित्ता। कने तिस सैहरे दे लोकएह़ सब दिखणा आये तित्थु आई करी तिन्हां तिस माणुये जो दिख्या जिस च पैहल्लैं मतिआं दुष्टआत्मां थियां। सैह़ शांत कने, कपड़े पैहनी करी, कने इक्क आम आदमिये साइआं वर्ताब करदे होये बैठेया ऐ।

सैह़ लोक बड़े भरी डरेयो थे कने तिन्हां यीशु जो तित्थु ते जाणे तांई ग्लाया। अपर यीशु किस्तिया पर चढ़ी गेआ। सैह़ माणु जिस च दुष्टआत्मां थियां सैह़ यीशुये नैं विणती करणा लग्गा मिन्जो भी अपणे सौगी औणा देआ।

अपर यीशुयैं तिस नैं ग्लाया, “नीं। मैं चांहदा कि तू घरैं जाई करी सारे लोकां जो दस्सैं कि परमात्मे तिज्जो तांई क्या कित्तेया ऐ। तिन्हां लोकां जो दस्स कि किआं परमात्मे तिज्जो पर दया कित्ती ऐ।”

इसतांई सैह़ माणु चली गेआ कने तिन्हीं सारे लोकां जो इसदे बारे च दस्सेया जेहड़ा यीशुयैं तिस सौगी भलाई दा कम्म कित्तेया था। तिसदिया काहणिया जो सुणी करी सारे लोक हरान होई गियो थे।

जाह़लू यीशु झीला दी दुज्जी तरफ वापस आई गेआ। तां तिसदे तित्थु पुज्जणे दे बाद, इक्क बड़ी बड्डी भीड़ तिस अल्ल कट्ठरोई गेई कने लोक यीशु जो दिखणे तांई अप्पु च धक्का-मुक्की करणा लग्गे। तिसा भीड़ा च इक्क जणास थी जिसा जो बाहरां साल ते खून चलणे दी बमारी थी। तिन्नै अपणा सारी धन-धौलत वैदां-हाकिमां पर खर्च करी दित्तियो थी तांजे सैह़ तिसा जो ठीक करी सकन, अपर तिसादी बमारी होर भी जादा बिगड़ी गियो थी।

तिन्नै जणासा सुणेया था कि यीशुयैं मते बमार लोकां जो ठीक कित्तेया था तिन्नै सोचेया, कि “जे मैं यीशु दे कपड़े दे पल्ले जो छुई लैंगी, तां मैं ठीक होई जांगी।” इसतांई सैह़ यीशुये दे पचांह़ ते आई कने यीशु दे कपड़ेयां जो छुई लेआ। जिआं ई तिन्नैं तिसदे कपड़े छुते, तिसी बग्त तिसा दी खून चलणे दी बमारी ठीक होई गेई।

यीशु जो इकदम पता लग्गी गेआ कि मेरे ते सामर्थ निकल़ी ऐ। इसतांई तिन्हीं पचांह़ मुड़ी करी पुछया, “मिन्जो कुणी छुता?” चेलेयां जवाब दित्ता, “ऐत्थू इतणे सारे लोकां च तेरे चौनी पास्सैं भीड़ लगाई रखियो ऐ, कने तिज्जो पर चढ़ा दे हन। तां तू क्जो पुछदा ऐ कि मिन्जो कुणी छुता?”

ताह़लू सैह़ जणास डरे दे मारे कम्बदी होई गोड्डेयां भार यीशु दे सामणैं बैई गेई। कने तिन्नै यीशु जो सच-सच दस्सी दित्ता कि तेरे कपड़े मैं छुते हन कने तिन्नै एह़ भी दस्सेया कि तिज्जो छुणे ते मेरी बमारी ठीक होई गेई ऐ। यीशुयैं तिसा जो ग्लाया, कुड़िये “तेरे बसुआसे तिज्जो खरा कित्ता ऐ। खुसी-खुसी अपणे घरेयो जो जा।”