33. इक्क किसाने दी काहणी

इक्क दिन, यीशु झीला दे कनारे पर मते सारे लोकां जो सिक्षा दे दा था। यीशु दिया सिक्षा जो सुणने तांई इतणे सारे लोक आये कि यीशु जो खड़े होणे तांई जगाह नीं बची। इसतांई सैह़ पांणिये च खड़ौतियो किस्तिया पर बैठी करी लोकां जो सिक्षा दैणा लग्गा।

यीशुयैं तिन्हां जो इक्क काहणी सणाई, “इक्क किसान खेतां च बीई बाणे तांई गेआ। जाह़लू सैह़ बीई बाआ दा था तां कुच्छ बीई रस्ते पर पै। अपर पंछि आई करी तिन्हां सारे बीईयां जो खाई गे।”

बांदे बग्ते कुच्छ बीई पथरीलिया जमीना पर पै जित्थु बड़ी घट चिक्क थी। पथरिलिया जमीना पर पैयो बीई बड़ी तौल़े लूंगी पै, अपर तिन्हां दियां जड़ा जमीना च मजबूत नीं थियां। जाह़लू सूरजे दी बड़ी तेज धूप पेई तां सैह़ सारे पल़ी गै कने सुकी गै।”

“बांदे बग्त कुच्छ बीई झुड़ां-बन्सुटा च पै। जाह़लू सैह़ बीई लूंगी करी बधणा लग्गे ताह़लू तिन्हां झुड़ां-बसुन्टा दबाई दित्ते। इसतांई झुड़ां-बन्सुटा च लूंगेयो बीई फल नी देई सके।”

“बांदे बग्त कुच्छ बीई खरिया जमीना पर पै। सैह़ बीई लूंगे कने तिन्हां च मते सारे बीई निकल़े, तिन्हां च कुच्छना 30 गुणा कने कुच्छना 60 गुणा, कने कुच्छना 100 गुणा बीई लग्गे। ताह़लू यीशुयैं लोकां जो ग्लाया, “जेह्ड़ा कोई भी परमात्मे दे पचांह़ चलणा चांहदा ऐ। सैह़ तिसा गल्ला पर ध्यान दैं जेह़ड़ा मैं ग्ला दा ऐ!”

इसा काहणिया जो सुणी करी चेले उलझणा च पेई गे। इसतांई यीशुयैं तिन्हां जो समझाया, “सैह़ बीई परमात्मे दा वचन ऐ। रस्ते दे कनारे पर पेयो बीई सैह़ लोक हन जेह्ड़े परमात्मे दे वचने जो तां सुणदे हन, अपर तिसियो समझदे नीं हन। ताह़लू सैतान इकदम आई करी तिस वचने जो चोरी लेई जांदा ऐ। मतलब सैतान तिसियो वचने जो समझणा नीं दिंदा ऐ।”

“पथरीलिया जमीना च पेयो बीई सैह़ लोक हन जिन्हां परमात्मे दा वचन सुणेया कने तिसियो खुसिया नैं मन्नी भी लेआ अपर जाह़लू ज़िन्दगिया च दुख दा बग्त आएया, कने लोकां तिन्हां जो सताणा सुरू कित्ता, तां सैह़ परमात्मे जो छड्डी करी चली गे। मतलब तिन्हां परमात्मे पर बसुआस करणा छड्डी दित्ता।”

“झुड़ां-बन्सुटा च पेयो बीई सैह़ लोक हन। जिन्हां परमात्मे दा वचन तां सुणेया अपर तिन्हां मतिआं सारियां गल्लां दी फिकर करणा शुरू करी दित्ती, कने सैह़ मता सारा पैसे कमाणे दा कने मतिआं चीज्जां जो पाणे दा लालच करदे रेह्। कुच्छ बग्ते बाद, सैह़ परमात्मे नैं प्यार नीं करी सके। इसतांई जेह्ड़ा तिन्हां परमात्मे दे वचने ते सिखया था, तिसते सैह़ परमात्मे जो खुस करी नीं सके।

खरिया जमीना च पेयो बीई सैह़ लोक हन। जेह्ड़े परमात्मे दे वचने जो सुणदे, मनदे कने तिस पर चलदे हन, कने तिस पर बसुआस करदे हन, कने मता सारा फल लेई करी ओंदे हन।”