34. यीशुयैं मतिआं काहणियां सणाई

यीशुयैं परमात्मे दे राज्ज दे बारे च होर भी मतिआं काहणियां सणाईया। यीशुयैं ग्लाया, “परमात्मे दा राज्ज इक्क राईया दे बीऐ साइआं ऐ जिन्हीं कुणी अपणेयां खेतां च बाई दित्ता। तुहां जाणदे हन कि राईया दा बीई सारे बीईआं ते छोटा हुंदा ऐ।”

“अपर जाह़लू राईया दा बीई लूंगी करी बड्डा होएया तां सैह़ बगीचे दे सारे रूखां ते बड्डा होई जांदा ऐ, सैह़ इतणा बड्डा होई जांदा कि पंछी आई करी तिस दियां डालियां पर बसेरा करदे हन।”

यीशुयैं इक्क काहणी होर दस्सी, “परमात्मे दा राज्ज खमीरे साइआं ऐ जिसियो लेई करी इक्क जणासा त्रै किलो आटे च मलाई दिंदी ऐ कने सैह़ सारा आटा खमीर बणी जांदा ऐ।”

“परमात्मे दा राज्ज तिस खजाने दे साइआं ऐ जिसियो कुणकि जमीना च लकाई दित्ता। भिरी कुसी दूये माणुये जो सैह़ खजाना मिली गेआ कने तिन्हीं तिसियो पाणे दी बड़ी कोसिस कित्ती। इसतांई तिन्हीं तिसियो भिरी ते दबी दित्ता। सैह़ खुसिया नैं इतणा भरौया था कि तिन्हीं जाई करी अपणा सब कुच्छ बेची दित्ता तांजे सैह़ तिसा जमीना जो खरीदी सकैं जित्थु सैह़ खजाना था।”

“परमात्मे दा राज्ज इक्क बड़े किमती शुद्ध मोतिये साइआं ऐ। जाह़लू इक्क मोतिये दे व्यपारिये जो किमती मोती मिल्ला तां सैह़ तिसियो खरीदणे तांई अपणा सब कुच्छ बेची दिंदा ऐ।”

तित्थु कुच्छ लोक थे जेह़ड़े सोचदे थे कि परमात्मा तिन्हां जो इसतांई अपनांगा, कि सैह़ भलेयां कम्मां जो करा दे हन। एह़ लोक दूये लोकां जो निच समझदे थे जेह़ड़े तिन्हां भलेयां कम्मां जो नीं करदे थे। इसतांई यीशुयैं तिन्हां जो एह़ काहणी सणाई, “दो माणु थे कने दोनों माणु प्रार्थना करणे तांई मंदरे च गे। तिन्हां च इक्क चुंगी लेणे आल़ा था, कने दूया इक्क धार्मिक अगुवा था।”

“तिन्हीं धार्मिक अगुवे इस तरीके नैं प्रार्थना कित्ती, “हे परमात्मा, मैं तेरा धन्यवाद ऐ कि मैं दूयेयां लोकां साइआं ड़ाकु, कने ब्यभिचारी माणु नीं ऐ कने ना मैं इस चुंगी लेणे आल़े साइआं इक्क पापी माणु ऐ।”

“मैं हर हफ्ते च दो बरी व्रत रखदा ऐ, कने मैं अपणिया कमाईया च दसमां हिस्सा तिज्जो दिंदा ऐ।”

“अपर सैह़ चुंगी लेणे आल़ा माणु तिस धार्मिक अगुवे ते बड़ी दूर खड़ोई करी अपणिया छातिया पीटी-पीटी करी प्रार्थना करणा लग्गा, ‘हे परमात्मा, मिन्जो पर दया कर क्जोकि मैं इक्क पापी माणु ऐ’।”

भिरी यीशुयैं ग्लाया, “मैं तुहां नैं सच्च ग्लांदा ऐ, परमात्मे तिस चुंगी लेणे आल़े दिया प्रार्थना जो सुणेया कने तिसियो धर्मी ग्लाया। अपर तिन्हीं तिस धार्मिक अगुवे दिया प्रार्थना जो पसंद नीं कित्ता। परमात्मा हर इक्क घमंडिये दे सिरे जो निचा करगा, अपर सैह़ हर तिस माणुये जो आदर दिंगा जेह्ड़ा अप्पू जो नम्र करदा ऐ।”