35. इक्क दयालु बुढ़े दी काहणी

इक्क दिन, यीशु तिन्हां मतेआं लोकां जो सिक्षा दे दा था जेह्ड़े तिसदिया शिक्षा जो सुणने तांई तित्थु किट्ठे होएयो थे। एह़ लोक चुंगी लेणे आल़े कने होर भी लोक थे जिन्हां मूसा दे नियम-कानूनां दा पालण करणे दा बचार कित्तेया था।

कुच्छ धार्मिक अगुवां दिख्या कि यीशु तिन्हां लोकां नैं इक्क दोस्तां साइआं गल्ल करा दा ऐ। इसतांई सैह़ अप्पु च एह़ ग्लाणा लग्गे कि सैह़ गलत करा दा था। यीशुयैं तिन्हां जो गल्लां करदे सुणी लेआ, इसतांई तिन्हीं तिन्हां जो एह़ काहणी सणाई।

“इक्क माणु था जिसदे दो पुत्तर थे। लोक्के पुत्तरे अपणे बुढ़े नैं ग्लाया, हे बापू, मिन्जो हुणी मेरा हिस्सा चाइदा! ताह़लू बुढ़ैं अपणे दूनीं पुत्तरां च अपणी जायदात बंडी दित्ती।”

“कुच्छ दिन बाद, लोक्का पुत्तर अपणा सब कुच्छ किट्ठा करी नैं दूर देसे जो चली गेआ कने बुरेयां कम्मा च अपणा सारा पैसा बर्बाद करी दित्ता।”

“इसते बाद, जिसे देसे च लोक्का पुत्तर था तिस देसे च इक्क खतरनाक अकाल़ पेआ, कने सैह़ कंगाल होई गेआ ऐत्थु तिकर कि तिस अल्ल खाणे तांई पैसे भी नीं थे। इसतांई तिसियो जेहड़ा कम्म मिलेया सैह़ सुअरां जो चराणे दा था। सैह़ इतणा दुखी कने भूखा था कि सैह़ सुअरां दा खाणा खाई नैम अपणा पेट भरणा चांहदा था।”

“आखरी च, जाह़लू तिस लोक्के पुत्तरे जो समझ आई तां सैह़ अपणे आप्पे नैं ग्लाणा लग्गा, मैं ऐत्थु क्या करा दा ऐ? मेरे बुढ़े दे घरैं कितणे मजदूर कम्म करदे हन कने तिन्हां जो पेठ भरी करी खाणा मिलदा ऐ, अपर मैं ऐत्थु भूखा मरा दा ऐ। मैं अपणे बुढ़े अल्ल वापस जाणा कने अपणे बुढ़े नैं विणती करणी ऐ कि मिन्जो अपणा इक्क मजदूर बणाई नैं रखी लै।”

“ताह़लू लोक्का पुत्तर अपणे घरे जो वापस चली पेआ। जाह़लू सैह़ अल्ली घरे ते दूर ई था, कि तिसदे बुढ़ैं तिसियो दिख्या कने तिस पर तरस खादा। सैह़ दौड़ी करी अपणे पुत्तरे अल्ल गेआ कने तिसियो गल़े लगाई करी तिस नैं प्यार कित्ता।”

“तिन्हीं पुत्तरैं ग्लाया, हे बापू, मैं परमात्मे दे खलाफ कने तेरे खलाफ पाप कित्तेया ऐ। मैं तेरा पुत्तर ग्लाणे जोग्गा भी नीं ऐ।”

“अपर तिसदे बुढ़ैं अपणे इक्क नोकरे जो ग्लाया, झट जाईकरी नौये कपड़ेयां दा जोड़ा लेई आ कने मेरे पुत्तरे जो पैहनाई देआ! इसदिया ऊँगल़िया च गुँठी कने पैरां च जुतेयां पहनाई देआ। कने भिरी खाणे तांई सबना ते बधिया पाल़ेया पेरू बड्डा तांजे अहां खाई नैं खुसी मनाई सकन, क्जोकि मेरा पुत्तर मरी गेआ था, अपर हुण सैह़ जिन्दा ऐ! सैह़़ खोई गेआ था, अपर हुण अहां जो मिल्ली गेआ ऐ!”

“इसतांई लोकां तिसदे वापस ओणे पर खुसी मनाणा शुरू कित्ती। थोड़िया देरा बाद, तिसदा बड्डा पुत्तर खेतां ते कम्म करी नैं घरेयो वापस आएया। तिन्हीं अपणे घरे आई नैं नचणे-गाणे दी ऊआज सुणी कने हरान होएया कि एह़ क्या होआ दा ऐ।”

“जाह़लू बड्डे पुत्तरे जो पता लगा कि मेरे भाऊये दे वापस ओणे पर खुसी मना दे हन ताह़लू सैह़ बड़ा गुस्सा होएया कने घरे अन्दर नीं आएया। तिसदे बुढ़ैं बाहर आई करी तिस नैं ग्लाया कि तू भी आई नैं अहां सौगी खुसी मनाणा अन्दर चल, अपर तिन्हीं अन्दर जाणे ते मना करी दित्ता।”

“तिन्हीं बड्डे पुत्तरैं अपणे बुढ़े नैं ग्लाया, बापू जी, मैं इतणे साल इमानदारिया नैं तिज्जो तांई कम्म करदा रेह्आ कने कदी भी तेरी गल्ल नीं टाल़ी, अपर तैं कदी भी मेरे तांई पाल़ेया पेरू नीं दित्ता तांजे मैं अपणेया दोस्तां सौगी खुसी मनाई सकैं। अपर तेरे इस लोक्के पुत्तरैं तेरी सारी जायदात बुरेयां कम्मां च बर्बाद करी दित्ती। कने हुण जाह़लू एह़ घर वापस आई गेआ तां तिस तांई खुसी मनाणे जो तैं पाल़ेया पेरू बड्डी दित्ता!”

“बुढ़ैं तिसदिया गल्ला दा जवाब दित्ता, हे मेरे पुत्तर, तू सदा मिन्जो सौगी ऐ, कने जेहड़ा कुच्छ मेरा ऐ सैह़ सब कुच्छ तेरा ऐ। अपर अहां तांई खुसी मनाणा ठीक ऐ क्जोकि तेरा भाऊ मरी गेआ था, अपर हुण सैह़ जिन्दा ऐ। सैह़ खोई गेआ था, अपर हुण अहां जो वापस मिल्ली गेआ ऐ!”