36. यीशु दा रूप बदल़ी जाणा

इक्क दिन, यीशु अपणे त्रीं चेलेयां जो अपणे सौगी लेई आएया, जिन्हां दा नां पतरस, याकूब, कने यूहन्ना था। कने यीशु तिन्हां जो प्रार्थना करणे तांई इक्क ऊच्चे प्हाड़े पर लेई गेआ।

जाह़लू यीशु प्रार्थना करा दा था तां तिसदा चेहरा सूरजे साइआं चमकणा लग्गा। तिसदे कपड़े रोशनी साइआं चिट्टे होई गे, इतणे चिट्टे कि धरतिया पर कोई भी धोबी इतणे चमकाई नीं सकदा था।

ताह़लू मूसा कने एलिय्याह भविष्यवक्ता प्रगट होये। एह़ माणु इसा धरतिया पर सैकड़ो साल पैहल्लैं रैंह्दे थे। तिन्हां यीशुये नैं तिसदिया मौती दे बारे च गल्ल कित्ती, जेह्ड़ी यरुशलेम सैहरे च होणे आल़ी थी।

जाह़लू मूसा कने एलिय्याह यीशुये नैं गल्लां करा दे थे ताह़लू पतरसैं यीशु नैं ग्लाया, “हे गुरु अहां दा ऐत्थु रैहणा ठीक ऐ। जे तेरी इच्छा ऐ तां अहां ऐत्थु त्रै तम्बू बणाई लेन, इक्क तिज्जो तांई, इक्क मूसा तांई कने इक्क एलिय्याह तांई।” अपर पतरस नीं जाणदा था कि मैं क्या ग्ला दा ऐ।

जाह़लू पतरस गल्ला दा था, तां इक्क चमकदार बदल़ तिन्हां पर छाई गेआ। भिरी तिन्हां बदल़े ते इक्क उआज़ सुणी कि “एह़ मेरा पुत्तर ऐ जिस नैं मैं प्यार करदा ऐ। मैं इसते खुस ऐ। तुहां सब इसदी सुणा।” सैह़ त्रींनो चेले डरी गै कने जमीना पर सोई गै।

ताह़लू यीशुयैं तिन्हां जो छुएया कने ग्लाया, “डरा मत। उठी जा।” जाह़लू तिन्हां चौनी पास्सैं दिख्या, तां यीशु जो छड्डी करी तिन्हां अप्पु सौगी होर कोई नीं दिख्या।”

जाह़लू यीशु कने सैह़ तिसदे त्रींनो चेले तिस प्हाड़े ते थलैं उतरा दे थे। ताह़लू यीशुयैं तिन्हां जो ग्लाया, “हुण जेहड़ा ऐत्थु होएया तिसियो कुसी नैं भी मत दस्सदे। मैं जल्दी ई मरने आल़ा कने भिरी मरेयां ते जिंदा होई जांगा। तिसदे बाद, तुहां लोकां जो दस्सी सकदे हन।”