37. यीशु लाजरे जो मरेयां ते जिंदा करदा ऐ।

इक्क बरी लाजर नांए दा इक्क माणु था। तिसदियां दो बैहणी थियां जिन्हां दा नां मरियम कने मार्था था। एह़ त्रींनो यीशु दे पक्के दोस्त थे। इक्क दिन, कुणकि यीशुये जो दस्सेया कि लाजर बड़ा बमार ऐ। जाह़लू यीशुयैं एह़ सुणेया तां तिन्हीं ग्लाया, “एह़ बमारी मौती दी अपर परमात्मे दिया महिमा तांई ऐ तांजे लोक परमात्मे दा आदर करन।”

यीशु अपणे दोस्तां नैं प्यार करदा था, अपर जित्थु सैह़ था। तित्थू तिन्हां दो दिन होर इन्तजार कित्ता। अपर दूँ दिनां बाद यीशुयैं अपणे चेलेयां जो ग्लाया, “ओआ, अहां वापस यहूदिया प्रदेसे जो चलदे। “चेलेयां जवाब दित्ता, “हे गुरु, हुण कुच्छ बग्त पैहल्लैं तित्थु दे लोक तिज्जो मारी दैणा चांहदे थे!” यीशुयैं ग्लाया, “अहां दा दोस्त लाजर सोई गेआ ऐ, कने मिन्जो तिसियो जगाणा ऐ।”

यीशुये दे चेलेयां जवाब दित्ता, “हे प्रभु, जे लाजर सुतेया ऐ, तां सैह़ जागी जांगा।“ ताह़लू यीशुयैं तिन्हां नैं साफ-साफ ग्लाई दित्ता, “लाजर मरी गेआ ऐ। मैं खुस ऐ कि मैं तित्थु नीं था, तांजे तुहां मिन्जो पर बसुआस करी सकन।”

जाह़लू यीशु लाजरे दे ग्रांऐ च पुज्जा ताह़लू लाजरे जो कब्रा च रखेयो चार दिन होई गियो थे। मार्था यीशुये नैं मिलणे तांई बाहर आई कने ग्लाणा लग्गी, “हे प्रभु, जे तू ऐत्थु हुंदा तां मेरा भाऊ नीं मरदा। अपर मैं बसुआस करदी ऐ कि जेहड़ा कुच्छ भी तू परमात्मे ते मंगगा सैह़ तिज्जो तांई करगा।”

यीशुयैं जवाब दित्ता, “ज़िन्दगी दैणे आल़ा कने दोबारा जिन्दा करणे आल़ा सिर्फ मैं ई ऐ। जेहड़ा कोई मिन्जो पर बसुआस करदा ऐ जे सैह़ मरी भी जां तां भी जींगा। जेहड़ा कोई मिन्जो पर बसुआस करदा ऐ सैह़ कदी नीं मरगा। क्या तू इस पर बसुआस करदी ऐ?” मार्था जवाब दित्ता, “हे प्रभु, मैं बसुआस करदी ऐ कि तू परमात्मे दा पुत्तर मसीह ऐ।”

ताह़लू मरियम तित्थु आई जित्थु यीशु था। सैह़ यीशुये दे पैरां च पेई करी ग्लाणा लग्गी, “हे प्रभु, जे तू ऐत्थु हुंदा तां मेरा भाऊ नीं मरदा।” यीशुयैं तिसा ते पुछया, “तुहां लाजरे जो कुत्थु रखेया ऐ?” तिन्हां यीशु नैं ग्लाया, “हे प्रभु कब्रा च। आ कने दिक्खी ले।” ताह़लू यीशु रोणा लग्गा।

सैह़ कब्र इक्क गुफा च बणाईयो थी तिसादे मुँए पर इक्क बड़ा बड्डा पत्थर रखेया था। जाह़लू यीशु कब्रा पर पुज्जा, तां तिन्हीं तिन्हां नैं ग्लाया, “पत्थरे हटाई देआ।” अपर मार्था यीशु नैं ग्लाया, “हे प्रभु लाजरे जो मरेयो चार दिन होई गियो हन। हुण तां तिस च बदबू ओणा लग्गी पेईयो।”

यीशुयैं जवाब दित्ता, “क्या मैं तिज्जो नैं नीं ग्लाया था कि जे तू मिन्जो पर बसुआस करगी तां परमात्मे दिया सामर्थी जो दिखगी?” इसतांई तिन्हां तिस पत्थरे जो हटाई दित्ता।

ताह़लू यीशुयैं सुअर्गे दे पास्सैं दिक्खी करी ग्लाया, हे पिता परमात्मा, मैं तेरा धन्यावाद करदा ऐ क्जोकि तैं मेरी सुणी लेई ऐ। मैं जाणदा ऐ कि तू सदा मेरी सुणदा ऐ, अपर मैं एह़ ऐत्थु खड़ौत्यो लोकां दी मदत करणे तांई ग्लाया ऐ, तांजे एह़ बसुआस करन कि तैं मिन्जो घल्लेया ऐ।” ताह़लू यीशुयैं उआज़ लगाई, “हे लाजर, बाहर निकल़ी आ!”

कने लाजर कफने समेत बाहर निकल़ी आएया! यीशुयैं तिन्हां जो ग्लाया, “इस कफने जो नकाल़णे च इसदी मदत करा कने इसियो जाणा देआ।” ताह़लू जेह्ड़े यहूदी लोक मरियमा सौगी आएयो थे तिन्हां यीशु दे इस चमत्कारे दिख्या कने तिन्हां च मतेआं लोकां यीशु पर बसुआस कित्ता।

अपर यहूदी लोकां दे धार्मिक अगुवे यीशुये ते जल़ण करणा लग्गे, इसतांई सैह़ किट्ठे होई करी यीशु जो कने लाजरे जो मारणे दी योजना बणाणा लग्गे।