38. यीशु जो पकड़वाया जाणा

यहूदी लोक हर साल फसह दा त्योहार मनांदे थे। एह़ इस यादा तांई त्योहार मनांदे थे कि मतिआं सदियां पैहल्लैं परमात्मे तिन्हां दे पुर्वजां जो मिस्रे देसे दिया गुलामिया ते बचाया था। लगभग त्रै साल बाद यीशुयैं सिक्षा दैणा शुरू कित्ता। यीशुयैं अपणेया चेलेयां जो ग्लाया, कि एह़ फसह दा त्योहार तिन्हां सौगी यरुशलेम सैहरे च मनाणा चांहदा ऐ, कने एह़ सैई जगाह ऐ जित्थु मैं मारेया जांगा।

यीशुये दे चेलेयां च इक्क यहूदा इस्करियोती नांऐ दा माणु था। यहूदे जो प्रेरितां दे पैसेयां दिया थैलिया जो रखणे दी जिम्मेवारी दित्तियो थी, सैह़ पैसेयां नैं प्यार करदा था कने हर बरी सैह़ थैलिया ते पैसेयां चोरी लैंदा था। जाह़लू यीशु कने चेले यरुशलेम च पुज्जे, ताह़लू यहूदा यहूदी अगुवां अल्ल गेआ। तिन्हीं पैसेयां दे बदले यीशु जो पकड़ुआणे दी तिन्हां सौगी योजना बणाई। सैह़ जाणदा था कि यहूदी अगुवे यीशु जो मसीह नीं मनदे, सैह़ जाणदा था कि सैह़ तिसियो मारी दैणा चांहदे थे।

महायाजक दे ग्लाणे पर यहूदी अगुवां यीशुये जो तिन्हां दे हत्थां च पकड़ुआणे तांई यहूदा इस्करोतिये जो तीई चाँदिया दे सिक्के दित्ते। इसा गल्‍ला दे बारे च भविष्यवक्तां पैहल्लैं दस्सी दित्या था। यहूदा यीशु जो पकड़ुआणे तांई यहूदा इस्करियोती मन्नी गेआ कने तिन्हां ते तीई चाँदिये दे सिक्केयां जो लेई करी चली गेआ। भिरी सैह़ मौका तोपणा लग्गा कि यीशु जो किआं पकड़ुआं।

यीशु यरुशलेम सैहरे च अपणे चेलेयां सौगी फसह दा त्योहार मनाया। फसह दे त्योहारे च खाणा खांदे बग्त यीशुयैं रोटी लेई कने परमात्मे ते आसीष मंगी करी तोड़ी। तिन्हीं ग्लाया, “इसायो लेआ कने खा। एह़ मेरा शरीर ऐ जेहड़ा मैं तुहां तांई दिंदा ऐ। मेरिया यादा च इआं ई करनेयों।” इस तरीके नैं यीशुयैं ग्लाया कि सैह़ तिन्हां तांई मरी जांगा, मतलब तिन्हां तांई सैह़ अपणे आप्पे जो बलिदान करी दिंगा।

भिरी यीशुयैं इक्क कटोरे च अंगूरा दा रस लेआ कने ग्लाया, “इसियो पी लेआ। एह़ नोईया वाचा दा मेरा खून ऐ जेह्ड़ा मतेआं लोकां दे पापां दी माफी तांई बहाया जांदा। परमात्मा तुहां दे पापां जो माफ करैं। मेरिया यादा च इआं ई करा।” इस तरीके नैं, यीशुयैं तिन्हां जो ग्लाया कि मेरा खून तुहां दे पापां दी माफी तांई बहाया जांदा ऐ।”

ताह़लू यीशुयैं अपणेया चेलेयां जो ग्लाया, “तुहां च इक्क माणु मिन्जो पकड़ुआणे आल़ा ऐ।” चेले हरान होई गै, कने पूछणा लग्गे कि कुण ऐदेया कम्म करगा। यीशुयैं ग्लाया, “मिन्जो पकड़ुआणे आल़ा माणु सैह़ ऐ जिसियो मैं एह़ रोटिया दा टुकड़ा दिंदा ऐ।” ताह़लू तिन्हीं सैह़ रोटी यहूदा इस्करोतिये जो दित्ती।

तिसा रोटिया जो लैणे दे बाद, यहूदा इस्करियोती च सैतान समाई गेआ। यहूदा तित्थु ते चली गेआ सैह़ यीशु जो पकड़णे तांई यहूदी अगुवां दी मदत करणा चली गेआ। एह़ राती दा बग्त था।

खाणा खाणे ते बाद, यीशु कने तिसदे चेले जैतून प्हाड़े पर चली गे। ताह़लू यीशुयैं तिन्हां जो ग्लाया, “तुहां सारे अज्ज राती मिन्जो छड्डी करी नठी जांगे। क्जोकि पवित्रशास्त्रे च लिख्या ऐ, मैं भेड्डां दे चरवाहे जो मारगा कने सारियां भेड्डां बिछड़ी जांगियां।”

इसा गल्ला पर पतरसैं ग्लाया, “बेसक सारे तिज्जो छड्डी करी नठी जांगे, अपर मैं तिज्जो कदी नीं छड्डगा!” ताह़लू यीशुयैं पतरसे जो ग्लाया, “सैतान तुहां सारेयां दी परख लैणा चांहदा ऐ, अपर हे पतरस, मैं तिज्जो तांई प्रार्थना कित्तियो ऐ कि तू बसुआसे ते कमजोर नीं होई जां। भिरी भी अज्ज राती, मुर्गे दे बांग दैणे ते पैहल्लैं तू त्रै बरी मिन्जो पछैणने ते मना करगा कि तू मिन्जो नीं जाणदा ऐ।”

ताह़लू पतरसे यीशुयैं नैं ग्लाया, “बेसक मिन्जो तिज्जो सौगी मरणा भी पोंगा, तमी मैं तिज्जो पछैणने ते कदी नीं मुकरगा!” बाकि सारेयां चेलेयां भी इआं ई ग्लाया।

ताह़लू यीशु अपणे चेलेयां सौगी गतसमनी नांऐ दिया जगाह पर गेआ। यीशुयैं अपणे चेलेयां जो प्रार्थना करणे तांई ग्लाया तांजे सैतान तिन्हां दी परख नीं करी सकैं। ताह़लू यीशु प्रार्थना करणे तांई चली गेआ।

यीशुयैं त्रै बरी प्रार्थना कित्ती, “हे मेरे पिता परमात्मा, जे तेरी इच्छा ऐ तां मिन्जो इस दुखे दे बग्ते ते बचाई लै। अपर जे लोकां दे पाप माफ करणे तांई होर कोई जरिया नीं ऐ, तां भिरी मेरी नीं तेरी इच्छा पूरी होयैं।” यीशु बड़ा बचैन था कने तिसदा पसीना खूने दियां बूंदा साइआं जमीना पर पोणा लग्गा। यीशु जो सामर्थ दैणे तांई परमात्मे इक्क स्वर्गदूत घल्लेया।

प्रार्थना करणे बाद, यीशु अपणे चेलेयां अल्ल वापस आएया, अपर सैह़ सोई गियो थे। जाह़लू यीशु त्री बरी प्रार्थना करी नैं वापस आएया तां यीशुयैं अपणे चेलेयां नैं ग्लाया, “उठी पौया! मिन्जो पकड़णे आल़ा ऐत्थु आई गेआ ऐ।”

ताह़लू यहूदा इस्करियोती यहूदी अगुवां कने मतेआं सपाईयां जो तलवारां कने डांगा समेत लेई आएया। थियां। यहूदा इस्करोतियैं यीशुये अल्ल आएया कने ग्लाया, “प्रणाम गुरू जी,” कने यीशु जो अपणे गल़े लगाया। यहूदैं तिन्हां जो पैहल्लैं ई दस्सी दित्या था कि जिसियो मैं प्रणाम करगा कने गल़ैं लगांगा सैई यीशु ऐ। ताह़लू यीशुयैं ग्लाया, “हे यहूदा, क्या तू मिन्जो पकड़ुआणा चांह़दा ऐ?”

जाह़लू सैह़ सैनिक यीशुये जो पकड़णा लग्गे, तां पतरसैं अपणी तलवार कड्डी कने महायाजक दे इक्की दासे दा कन्न बड्डी दित्ता। ताह़लू यीशुयैं ग्लाया, “ओ पतरस तलवारा अपणिया म्याना च रख! क्या तू नीं जाणदा जे मैं अपणे पिता परमात्मे नैं विणती करैं तां तिन्हीं मिन्जो बचाणे तांई ते स्वर्गदूतां दी इक्क सेना घल्ली दैणी। अपर मिन्जो मेरे पिता परमात्मे दा हुक्म मनणा जरुरी ऐ।” ताह़लू यीशुयैं तिस माणुये दे कन्ने जो छूई करी ठीक करी दित्ता। ताह़लू सारे चेले नठी गे।