39. महासभा च यीशु दा मुकदमा

जाह़लू सपाईयां यीशु जो पकड़ेया था ताह़लू अधिया राती दा बग्त था। सैह़ सपाई यीशुये जो महायाजक दे घरे जो लेई आये, क्जोकि सैह़ यीशुये ते पुछताछ करणा चांहदा था। पतरस दूरे ते तिन्हां दा पीछा करा दा था। जाह्लू सपाई यीशु जो घरे अन्दर लेई गे, तां पतरस बाहर रूकी गेआ कने सपाईयां सौगी अग्गी सेकणा लग्गा।

घरे दे अन्दर, यहूदी अगुवां यीशुये पर मुकदमा चलाया। सैह़ तिसदे खलाफ झूठी गवाही दैणे तांई मते सारे झुठे गवाह लेई करी आये। हलांकि तिन्हां दी गवाही इक्की दूये नैं मिलदी-जुलदी नीं थियां, इसतांई यहूदी अगुवे यीशु जो दोसी साबित नीं करी सके। अपर यीशुयैं कुच्छ नीं ग्लाया।

ताह़लू महायाजक यीशु दी तरफ दिक्खी करी ग्लाणा लग्गा, “अहां जो दस्स कि क्या तूंई जिन्दे परमात्मे दा पुत्तर मसीह ऐ?”

यीशुयैं ग्लाया, “हाँ मैं आएया ऐ, कने तुहां मिन्जो परमात्मे सौगी बैठेया कने सुअर्गे ते ओंदे भी दिखगे।” महायाजकैं गुस्से च अपणे कपड़े फाड़ी दित्ते क्जोकि सैह़ यीशुये दिया गल्ला पर बड़ा गुस्सा होएया। सैह़ दूयेयां अगुवां नैं ग्लाणा लग्गा, “हुण अहां जो एह़ दस्सणे तांई कि कुसी होर गवाह दी जरूरत नीं ऐ कि इन्हीं माणुये क्या कित्तेया ऐ। तुहां हुण अप्पू ई सुणी लेआ ऐ कि इन्हीं अपणे आप्पे जो परमात्मे दा पुत्तर ग्लाया। इससदे बारे च हुण तुहां दा क्या फैसला ऐ?”

सारेयां यहूदी अगुवां महायाजके जो जवाब दित्ता, “एह़ मरने दे लायक ऐ!” ताह़लू तिन्हां यीशुये दियां अंखी पर पट्टी बन्नी दित्ती, तिस पर थूकेया, तिसियो मारेया, कने तिसदा मजाक डुआया।

जाह़लू पतरस बाहर अँगणे च अग्गी सेकणा बैठया था ताह़लू इक्की दासिया तिसियो दिख्या कने तिस नैं ग्लाया, “तूमी यीशुये सौगी था!” पतरसैं मना करी दित्ता। बादे च दूईया दासिया भी पतरसे जो दिक्खी करी ऐई ग्लाया, “तूमी यीशुये सौगी था!” अपर पतरसैं भिरी ते मना करी दित्ता, कि मैं तिस सौगी नीं ऐ। बादे च कुच्छ लोकां भी तिसियो ग्लाया, “अहां जाणदे हन कि तू यीशुये सौगी था क्जोकि तुहां दोयो गलील प्रदेसे ते हन।”

ताह़लू एह़ सुणी करी पतरसैं ग्लाया, “जे मैं इस माणुये जो जाणदा हुंदा तां परमात्मा मिन्जो श्राप दैं!” पतरसे दिया इसा गल्ला ग्लाणे ते बाद, ताह़लू इक्की कुक्ड़ै बांग दित्ती। यीशुयैं पचांह़ मुड़ी करी पतरसे पास्सैं दिख्या।

ताह़लू पतरस तित्थु ते चली गेआ कने बड़ा भारी रोया। तिस बग्त, यीशुये जो पकड़णे आल़े यहूदा इस्करियोतियैं दिख्या कि यहूदी अगुवां यीशु जो मौती दी सज़ा दित्ती ऐ। यहूदा बड़ा दुखी होएया कने जाई करी अपणे आपे जो फांसी लगाई लेई।

हुण तिस देसे दा राज्यपाल पिलातुस था। जेह्ड़ा रोमी सरकारा तांई कम्म करदा था इसतांई यहूदी अगुवे यीशुये जो तिस अल्ल लेई करी आये। सैह़ चांहदे थे कि पिलातुस तिसियो मौती दी सज़ा दैई नैं मारी दैन। ताह़लू पिलातुसैं यीशुये ते पुछ्या, “क्या तू यहूदियां दा राजा ऐ?”

यीशुयैं जवाब दित्ता, “तैं सच्च ग्लाया ऐ। अपर मेरा राज्ज इसा धरतिया दा नीं ऐ। जे मेरा राज्ज ऐत्थु दा हुंदा तां मेरे दास मिन्जो तांई लड़ाई करदे। मैं धरतिया पर परमात्मे दी सच्चाई दस्सणे तांई आएया ऐ। हर इक्क माणु जेहड़ा सचाईया नैं प्यार करदा ऐ सैह़ मेरी सुणदा ऐ।” पिलातुसैं ग्लाया, “तां सच्चाई क्या ऐ?”

यीशुये सौगी गल्ल करणे ते बाद, पिलातुस बाहर जाई करी लोकां नैं ग्लाणा लग्गा, “मिन्जो इस माणुये च मौती आल़ी सज़ा दे लायक कोई दोस नीं मिल्ला।” अपर यहूदी अगुवां कने लोक जोरे-जोरे नैं ग्लाणा लग्गे, “इसियो सूल़िया पर टुँगी देआ।” पिलातुसैं जवाब दित्ता, “इन्हीं माणुयैं कोई गलत कम्म नीं कित्तेया ऐ।” अपर सैह़ भिरी जोरे-जोरे नैं डडणा लग्गे। ताह़लू पिलातुसैं तिन्हां नैं त्री बरी ग्लाया, “एह़ माणु दोसी नीं ऐ।”

पिलातुस डरी गेआ कि भीड़ा आल़े लोक दंगे शुरु करी नीं दैन, इसतांई सैह़ यीशु जो सूल़िया पर टुँगणे तांई मनी गेआ। रोमी सपाईयां यीशुये जो कोड़े लगाये, भिरी तिसियो बैंगनी रंगे दे कपड़े पैहनाये कने तिसदे सिरे पर कंडेया दा मुकुट बणाई करी रखेया। ताह़लू सैह़ एह़ ग्लाई करी तिसदा मजाक डुआणा लग्गे, “दिक्खा एह़ यहूदियां दा राजा!”