40. यीशुये जो सूल़िया पर टुँगणा

यीशुये दा मजाक डुआणे ते बाद, सपाई तिसियो सूल़िया पर टुँगणे तांई लेई गे। तिन्हां सैह़ सूल़ी तिसते चुकवाई, जिस पर सैह़ टुँगणा था।

सैह़ सपाई यीशुये जो तिसा जगाह पर लेई आये जिसा जो “खोपड़ी दी जगाह ग्लाया जांदा ऐ” कने तित्थु तिसदे हत्थ-पैर तिसा सूल़िया च ठोकी दित्ते। अपर यीशुयैं ग्लाया, “हे पिता परमात्मा, इन्हां जो माफ कर, क्जोकि एह़ नीं जाणदे कि एह़ क्या करा दे हन।” पिलातुसैं सपाईयां जो सूलिया पर इक्क लकड़ी दी तख्ती लगाणे दा हुक्म दित्ता। तिसा पर लिख्या था, “यीशु यहूदियां दा राजा।”

ताह़लू सपाईयां यीशु दे कपड़े अप्पु च बंडणे तांई पर्चियां पाईआं कि कुसियो क्या मिलदा ऐ। जाह़लू तिन्हां इआं कित्ता तां तिन्हां एह़ भविष्यवाणी पूरी कित्ती, जिसा च ग्लाया था, “तिन्हां मेरेयां कपड़े अप्पु च बंडी ले, कने तिन्हां मेरेयां कपड़ेयां तांई पर्चियां पाईआं।”

जित्थु यीशु सूल़िया पर टुँगेया था, तित्थु दो डाकू भी थे जेह्ड़े सपाईयां तिसी बग्त सूल़िया पर टुँगेयो थे। इक्क सज्जे पास्सैं कने दूया खब्बैं पास्सैं। तिन्हां दूनीं च इक्क डाकू यीशु दी निन्दा करी नैं ग्लाणा लग्गा, जे तू मसीह ऐ तां अहां जो भी बचा कने अपणे आप्पे जो भी बचा। अपर दूयैं ग्लाया, “क्या तू परमात्मे दिया सज़ा नीं डरदा? अहां तां दोयो अपणे बुरे कम्मां दिया बजाह ते सज़ा भुगता दे हन, अपर एह़ माणु तां बेकसूर ऐ।” भिरी तिन्हीं यीशुये नैं ग्लाया, “जाह़लू तू अपणे राज्ज च ओंगा तां मिन्जो भी याद रखेयां।” यीशुयैं ग्लाया, “तू अज्ज ई मिन्जो सौगी सुअर्गे च हुंगा।”

तिसे बाद यहूदी अगुवे कने लोक यीशु दी निन्दा करी नैं ग्लाणे लग्गे, “जे तू परमात्मे दा पुत्तर ऐ, तां अपने आप्पे जो बचा कने सूल़िया ते थलैं लोई आ। ताह़लू अहां तिज्जो पर बसुआस करगे।”

ताह़लू दौपेरा बाराह बजे ते लेई नैं त्रै बजे तिकर सारे देसे च नेहरा छाई गेआ। बेसक एह़ दिने दा बग्त था।

ताह़लू यीशुयैं जोरे नैं डडी करी ग्लाया, “पूरा होएया! हे पिता परमात्मा, मैं अपणी आत्मा जो तेरे हत्थां च दिंदा ऐ।” ताह़लू यीशुयैं अपणे प्राण छड्डी दित्ता। जाह़लू यीशु मरेया तां इक्क हिल्लण आएया। ताह़लू मन्दरे दा पड़दा ऊपरे ते लेई नैं थलै तिकर फटी करी दो टुकड़े होई गेआ। एह़ सैह़ पड़दा ऐ जेह्ड़ा बड़ी पवित्र जगाह च लगेया हुंदा ऐ कने जित्थु परमात्मे दी हजूरी हुंदी ऐ।

अपणिया मौती दे जरिये यीशुयैं लोकां तांई परमात्में अल्ल औणे दा रस्ता खोली दित्ता। जेह्ड़ा सपाई यीशु दी निगरानी करा दा था कने जेहड़ा कुच्छ होएया था एह़ सब कुच्छ दिक्खी सैह़ ग्लाणा लग्‍गा, सच्ची च एह़ इक्क धर्मी माणु था कने परमात्मे दा पुत्तर था।”

ताह़लू यूसुफ कने नीकुदेमुस नांऐ दे दो यहूदी अगुवे आये। सैह़ बसुआस करदे थे कि यीशु ई मसीह था। तिन्हां पिलातुसे अल्ल जाई नैं यीशु दा शरीर मंगेया। तिन्हां तिसदे शरीरे जो चिट्टे कपड़े च लपेटेया। कने जेह्ड़ी कब्र सैह़ चट्टाना च कोरी नैं बणाईयो थी तिसा कब्रा च रखी दित्ता। ताह़लू तिन्हां तिसा कब्रा दे मुँए पर इक्क बड्डा भारी पत्थर खसकाई नैं लगाई दित्ता।