50. यीशु वापस ओंदा ऐ

लगभग 2,000 सालां ते, संसारे च सब जगांह पर मते भरी लोक यीशु मसीह दे बारे च संदेसे जो सुणा दे हन, कने कलेसिया बधा दी ऐ। यीशुयैं वादा कित्या कि सैह़ संसारे दे अन्त च वापस ओंगा। क्जोकि सैह़ अह्ल्ली वापस नीं आएया ऐ, ताह़लू भी सैह़ अपणे वादे जो पूरा करगा।

जाह़लू कि अहां यीशु दे वापस ओणे दा इन्तजार करदे हन, परमात्मा अहां नैं ऐदेई ज़िन्दगी जीणे दी इच्छा करदा ऐ जेह्ड़ा पवित्र ऐ कने जेह्ड़ा तिसदा आदर करदा ऐ। परमात्मा एह़ भी चांह़दा ऐ कि अहां लोकां जो तिसदे राज्जे दे बारे च दस्सन। जाह़लू यीशु धरतिया पर रेह्आ था ताह़लू तिन्हीं ग्लाया, “मेरे चेले संसारे च हर जगाह दे लोकां जो परमात्मे दे राज्जे दे बारे च खुसखबरिया दा प्रचार करगे, कने ताह़लू संसारे दा अन्त आई जांगा।”

मतिआं जातिआं दे लोकां यीशु दे बारे च नीं सुणेया ऐ। सुअर्गे जो वापस जाणे ते पैहल्लैं, यीशुयैं मसीस लोकां ग्लाया कि तिन्हां लोकां जो खुसखबरी सणा, जिन्हां इसा जो कदी भी नी सुणेया ऐ। तिन्हीं ग्लाया, “जा कने सारियां जातिआं दे लोकां जो चेला बणा!” कने परमात्मे दी महिमा करणे तांई खेत पक्की चुकेयो हन!” ।

यीशुयैं एह़ भी ग्लाया, “इक्क दास अपणे मालके ते बड्डा नीं हुंदा। इस संसारे दे खास लोकां मिन्जो नैं नफरत कित्ती, कने मेरिया बजाह ते सैह़ तुहां जो भी सतांगे कने मारी दिंगे। इस संसारे च तुहां पीड़ित हुंगे, अपर मजबूत बणा, क्जोकि मैं शैताने जो हराई दित्या ऐ जेह्ड़ा इस संसारे पर राज्ज करदा ऐ। जे तुहां अन्त तिकर मेरे बसुआसे लायक बणी रैंह्गे, तां परमात्मा तुहां जो बचांगा!”

यीशुयैं अपणेयां चेलेयां जो एह़ समझाणे तांई इक्क काहणी सणाई कि जाह़लू संसारे दा अन्त होणा तां लोकां सौगी क्या हुंगा। तिन्हीं ग्लाया, “इक्की माणुयैं अपणेयां खेतां च खरा बीई बाएया। जाह़लू सैह़ सुतेया था तां तिसदा दुश्मण आएया कने तिन्हीं कणका देयां बीईयां च जंगली बीई बाई दित्ता, कने भिरी सैह़ चली गेआ।”

“जाह़लू सैह़ बीई लूंगे तां दासां अपणे मालके नैं ग्लाया, ‘हे मालक, तुहां तां अपणेयां खेतां च खरा बीई बाएया था। तां भिरी इस च जंगली बूटे कतांह ते लूंगी पे?’ तिन्हीं मालकैं जवाब दित्ता, ‘एह़ मेरा कोई दुश्मण ऐ जिन्हीं एदेया कित्या ऐ।’”

“तिन्हां दासां अपणे मालके जो जवाब दित्ता, ‘क्या अहां जंगली बूटेयां जो पुट्टी लैन?’ तिन्हीं मालकैं ग्लाया, ‘मत पुट्टा। जे तुहां इआं करदे हन तां तुहां तिन्हां सौगी कणका दे बूटे भी पुट्टी दिंगे। बड्डाईया तिकर इन्तजार करा। ताह़लू जंगली बूटेयां जो भी सौगी-सौगी किट्ठा करी लेआ तांजे तुहां तिसियो फुकी सकन। अपर कणका जो मेरे पेड़ूये च किट्ठा करा।’”

चेलेयां इसा काहणियां दे मतलब नीं समझेया, इसतांई तिन्हां यीशुये नैं विणती कित्ती कि अहां जो इसा काहणिया दा मतलब दस्सा। यीशुयैं ग्लाया, “खरा बीई बाणे आल़ा माणु मसीह दे बारे च दस्सदा ऐ। खेत संसारे दे बारे च दस्सदा ऐ।। खरा बीई परमात्मे दे राज्ज दे लोकां दे बारे च दस्सदा ऐ।”

“जंगली बूटे शैताने दे लोकां दे बारे च दस्सदे हन। तिस मालके दा दुश्मण, जिन्हीं तिसदे खेतां च जंगली बीई बाएया था सैह़ शैताने दे बारे च दस्सदा ऐ। फसला दी बड्डाई इस संसारे दे अन्त दे बारे च दस्सदी ऐ, कने बड्डाई करणे आल़े परमात्मे दे सुअर्गदूतां दे बारे च दस्सदे हन।”

“जाह़लू संसारे दा अन्त हुंगा ताह़लू सुअर्गदूत तिन्हां सारे लोकां जो किट्ठा करगे जेह्ड़े शैताने दे हन। सैह़ सुअर्गदूत तिन्हां जो नरके च सट्टी दिंगे। तित्थु सैह़ लोक खतरनाक सतावे दिया बज़ाह ते रोणा कने दंद पीणे हन। अपर जेह्ड़े लोक धर्मी हन, जिन्हां यीशु पर बसुआस कित्या ऐ, सैह़ अपणे पिता परमात्मे दे राज्जे च सूरजे साइआं चमकगे।”

यीशुयैं एह़ भी ग्लाया कि सैह़ संसारे दा अन्त होणे ते पैहल्लैं धरतिया पर ओंगा। सैह़ तिसी तरिके नैं वापस ओंगा जिआं सैह़ गेआ था। मतलब, तिस अल्ल तिसदा असली सरीर हुंगा, कने सैह अम्बरे च बदल़ां पर सवार होई करी ओंगा। जाह़लू यीशु वापस ओंगा, तां हर इक्क मसीह जेह्ड़े मरी चुकेयो हन सैह़ मरेयां ते दोबारा जिन्दे होई जांगे कने तिस सौगी सुअर्गे च मिलगे।

कने तिस बग्त जेह्ड़े मसीह अह्ल्ली भी जिन्दे हन सैह़ अम्बरे च चुक्की लेई जाणे हन कने तिन्हां दूयेयां मसीह लोकां सौगी सामिल होई जांगे जेह्ड़े मरेयां ते दोबारा जिन्दे होई गियो हन। सैह़ सारे तित्थु यीशु मसीह सौगी हुंगे। तिसदे बाद, यीशु अपणे लोकां सौगी रैंह्गा। जाह़लू सैह़ सौगी रैह्दे हन तां तिस अल्ल हमेसा तांई पूरी सांति हुंगी।

यीशुए पर बसुआस करणे आल़े हर इक्क माणुये जो इक्क ज़िन्दगिया दा मुकट दैणे दा वादा कित्या ऐ। सैह़ हमेसा तांई परमात्मे सौगी हर इक्क चीज्जा पर राज्ज करगे। तिन्हां अल्ल सिद्ध सांति हुंगी।

अपर परमात्मा तिन्हां सबना दा न्याय करगा जेह्ड़े यीशु पर बसुआस नीं करदे हन। सैह़ तिन्हां जो नरके च पाई दिंगा। तित्थु सैह़ रोंगे कने ददां पींगे, कने सैह़ हमेसा दुखी हुंदे रैंह्गे। कदी भी नीं बुझणे आल़ी अग्ग लगातार तिन्हां जो जल़ांदी रैंह्गी, कने नरके आल़े कीड़े तिन्हां जो हमेसा खांगे।

जाह़लू यीशु ओंदा ऐ, तां सैह़ पूरे तरिके नैं शैताने जो कने तिसदे राज्जे जो खत्म करी दिंगा। सैह़ शैताने जो नरके च पाई दिंगा। तित्थु शैतान हमेसा तांई जल़दा रैंह्गा, तिन्हां सबना सौगी जिन्हां परमात्मे दे हुक्मां जो मनणे दे बजाये शैताने दे पचांह् चलणा चुणेया था।

क्जोकि आदम कने हव्वा नैं परमात्मे दे हुक्मां जो नीं मनेया था कने पाप जो इस संसारे च लेई करी आएयो थे, परमात्मैं तिसियो श्राप दित्ता कने तिसियो खत्म करने दा फैसला कित्ता। अपर कुसी दिन परमात्मे इक्क नौआं सुअर्ग कने इक्क नौई धरती बणागा, जेह्ड़े सिद्ध हुंगे।

यीशु कने तिसदे लोक तिसा नौईआं धरतिया पर रैंह्गे, कने सैह़ हमेसा तांई सारियां चीज्जां पर राज्ज करगे। सैह़ लोकां दे अंखी दे हर इक्क आंसु जो पुंज्जी दिंगा। हुण कोई भी दुखी या पीड़ित नी हुंगा। सैह़ रोंगे नीं। सैह़ बमार नी हुंगे कने ना कदी मरगे। कने तित्थु कुच्छ भी बुराई नीं हुंगी। यीशु अपणे राज्ज पर न्याय, कने सांतिया सौगी राज़ करगा। सैह हमेसा तांई अपणेयां लोकां सौगी रैंहगा।