49. परमात्मे दी नौई वाचा

इक्क स्वर्गदूतैं मरियम नांऐ दिया इक्क कुआरिया कुड़िया जो ग्लाया कि तू परमात्मे दे पुत्तरे जो जन्म दैणा। सैह़ अह्ल्ली तिकर कुआरी थी, अपर पवित्र आत्मा तिसा पर उतरी कने सैह़ गर्भवती होई। तिन्नैं इक्क पुत्तरे जो जन्म दित्ता जिसदा नां तिन्नैं यीशु रखेया। इसतांई, यीशु परमात्मा भी कने माणु भी ऐ।

यीशुयैं मते अनोखे कने चमत्कारे दे कम्म कित्ते जिसते एह़ पत् लगदा ऐ कि यीशु परमात्मा ऐ। सैह़ पाणिये पर चलेया कने तफाने जो सांत कित्ता। तिन्हीं मते बमार लोक खरे कित्ते कने मतेआं लोकां दियां दुष्टात्मां जो कड्डेया। तिन्हीं मरेयां लोकां जो दोबारा ते जिन्दा करी दित्ता, कने तिन्हीं पंज्ज रोटियां कने दूँ मच्छियां नैं 5,000 लोकां जो पेट भरी करी खाणा खुआआ।

यीशु इक्क म्हान गुरू भी था। जेह्ड़ा कुच्छ भी तिन्हीं सखाया, सैह़ तिन्हीं अधिकारे सौगी सखाया। जेह्ड़ा सैह़ लोकां जो करणे तांई ग्लांदा ऐ सैह़ तिन्हां जो करणा चाइदा क्जोकि सैह़ परमात्मे दा पुत्तर ऐ। तिन्हीं एह़ भी सखाया कि तुहां जो दूये लोकां सौगी तिसा रीतिया नैं प्यार करणे दी जरूरत ऐ जिआं तुहां अपणे आप्पे नैं प्यार करदे हन।

तिन्हीं एह़ भी सखाया कि तुहां जो सारियां चीज्जां ते जादा कने अपणिया धन-दौलता ते भी जादा परमात्मे नैं प्यार करना चाइदा।

यीशुयैं ग्लाया कि संसारे च कुसी भी चीज्जा जो हासल करणे ते जादा खरा ऐ परमात्मे दे राज्जे च होणा। तिसदे राज्ज च तुहां जो प्रवेस करणे तांई जरूरी ऐ कि परमात्मे तुहां जो तुहां देयां पापां ते बचाया ऐ।

यीशुयैं ग्लाया कि कुच्छ लोक तिसियो स्वीकार करगे। परमात्मा तिन्हां लोकां जो बचांगा। अपर दुए लोक तिसियो कबूल नी करगे। तिन्नी एह़ भी ग्लाया कि कुच्छ लोक खरिया जमीना सांईएं हन, कजोकि सैह़ यीशुए दे बारे च नौंए संदेसे जो कबूल करी लैंदे हन, कने परमात्मा तिन्हां जो बचादा ऐ। अपर कुच्छ लोक रस्ते दिया सख्त जमीना सांईएं हन। परमात्में दा वचन बीईए सांईएं रस्ते पर पोंदा ऐ, अपर ओत्थू कुच्छ भी नी लूंगदा ऐ। एह़ लोक यीशुए दे बारे च संदेसे जो नामजूर करी दिंदे हन। सैह़ तिसदे राज्य च अंदर जांणे ते मन्ना करी दिंदे हन।

यीशुयै अहां जो सखाया कि परमात्मा पापियां नैं बड़ा प्यार करदा ऐ। सैह़ तिन्हां जो माफ करणा चांहदा ऐ कने तिन्हां जो अपणी औलाद बणाणा चांहदा ऐ।

यीशुयैं एह़ भी दस्सेया कि परमात्मा पापां ते नफरत करदा ऐ। क्जोकि आदम कने हव्वा नैं पाप कित्ता, इसतांई तिन्हां दे सारे वंशजा नैं भी पाप कित्ता। इस संसारे च रैंहणे आल़ा हर इक्क माणु पाप करदा ऐ कने परमात्मे ते दूर ऐ। हर इक्क माणु परमात्मे दा दुश्मण ऐ।

अपर परमात्मैं इस संसारे च रैंहणे आल़े हर इक्क माणुये नैं इस तरीके नैं प्यार कित्ता: तिन्हीं अपणे इक्कलौते पुत्तरे जो बलिदाण करणे तांई देई दित्ता तांजे परमात्मा तिन्हां जो सज़ा नीं दैं जेह्ड़ा तिस पर बसुआस करदे हन। हलांकि सैह़ हमेसा तांई परमात्मे सौगी रैंहगा।

तुहां मौती दिया सज़ा लायक हन, क्जोकि तुहां पाप कित्या ऐ। तुहां जो परमात्मे दी सज़ा मिलणा जायज ऐ, अपर अहां दे पापां दी सज़ा तांई यीशुयैं अपणे आप्पे जो बलिदान करी दित्ता। तिन्हीं यीशु जो सूल़िया दी मौत देई करी सज़ा दित्ती।

यीशुयैं कदी पाप नीं कित्या था, अपर भिरी भी तिन्हीं अहां दे पापां दी सज़ा अपणे उपर लेई लैई कने तिन्हीं अपणे तांई मौत चुणी। इस तरिके नैं, तुहां देयां पापां जो कने इस संसारे च रैहणे आल़े हर इक्क माणुये दे पापां जो चुक्की लेई जाणे तांई सैह़ इक्क सिद्ध बल़िदान था। यीशु अपणे आप्पे जो परमात्मे तांई बल़िदान करी दित्ता, इसतांई परमात्मा तिन्हां दा कोई भी पाप, बल्कि बड्डे ते बड्डा पाप भी माफ करदा ऐ, जेह्ड़े यीशु पर बसुआस करददे हन।

बेसक तुहां मते सारे खरे कम्म कित्तेयो हन, अपर इन्हां कम्मा दे जरिये परमात्मे तुहां जो नी बचाणा। तिसदा साथी बणने तांई एदेया कुच्छ भी नीं ऐ जेह्ड़ा तुहां करी सकदे हन। इसदिया जगाह तुहां जो बसुआस करणा ऐ कि यीशु परमात्मे दा पुत्तर ऐ, कने सैह़ तुहां तांई सूल़िया पर मरी गेआ, कने एह़ भी कि परमात्मैं तिसियो दोबारा ते जिन्दा करी दित्ता। जे तुहां इसा गल्ला पर बसुआस करगे, तां परमात्मा तुहां देयां पापां जो माफ करगा।

परमात्मा तिस हर इक्क माणुये जो बचांगा जेह्ड़ा यीशु पर बसुआस करदा ऐ कने तिसियो अपणा प्रभु मनदा ऐ। अपर सैह तिन्हां जो नीं बचांगा जेह्ड़ा तिस पर बसुआस नीं करदा ऐ। एह़ कोई मायने नी रखदा कि तुहां अमीर हन या गरीब हन, मर्द हन या जणास हन बुढे हन या जौआन हन, या तुहां कुत्थू रैंह्दे हन। परमात्मा तुहां नैं प्यार करदा ऐ कने चांहदा ऐ कि तुहां यीशु पर बसुआस करन कि सैह़ तुहां दा साथी बणी सकैं।

यीशु तुहां जो बुलांदा ऐ कि तिस पर बसुआस करन कने बपतिस्मा लेन। क्या तुहां बसुआस करदे हन कि परमात्मैं दा इक्कलौता पुत्तर, यीशु ई मसीह ऐ? क्या तुहां बसुआस करदे हन कि तुहां पापी हन कने परमात्मे दे जरिये सज़ा पाणे लायक हन? क्या तुहां बसुआस करदे हन कि तुहां देयां पापां जो मटाणे तांई यीशु सूल़िया पर मरेया?

जे तुहां यीशु पर कने जेह्ड़ा तिन्हीं तुहां तांई कित्या ऐ तिस पर बसुआस करदे हन, तां तुहां इक्क मसीह हन! हुण शैताने अपणे नेहरे आल़े राज्ज च तुहां पर राज़ नीं करदा ऐ। हुण परमात्मा अपणे परगड़े दे राज्ज च तुहां पर राज़ करदा ऐ। तिन्हीं तुहां जो पाप करणे ते रोकी दित्या ऐ, जिसियो तुहां पैहल्लैं करदे थे। तिन्हीं तुहां जो इक्क नौई ज़िन्दगी दित्तियो ऐ।

जे तुहां इक्क मसीह हन तां जेह्ड़ा यीशुयैं कित्या ऐ तिसदिया बजाह परमात्मैं तुहां देयां पापां जो माफ करी दित्या ऐ। हुण, परमात्मा तुहां दुश्मण नीं ऐ अपर इक्क अच्छा साथी ऐ।

जे तुहां परमात्मे दे साथी हन कने प्रभु यीशु दे सेवक हन तां तुहां तिन्हां गल्लां जो मनणे दी इच्छा करगे जेह्ड़ा यीशु तुहां जो सखांदा ऐ। भले ई तुहां इक्क मसीह हन, शैतान हुण भी पाप करणे तांई तुहां दी परीक्षा करगा। अपर परमात्मा हमेसा सैह़ करदा ऐ जेह्ड़ा सैह़ ग्लांदा ऐ कि मैं करगा। सैह़ ग्लांदा ऐ कि जे तुहां अपणे पापां जो मनी लेन, तां सैह़ तुहां दे पाप माफ करी दिंगा। सैह़ तुहां दे पापां दे खलाफ लड़ने दी सामर्थ दिंगा।

परमात्मा तुहां जो प्रार्थना करणे तांई कने तिसदे वचनां जो पढ़ने तांई ग्लांदा ऐ। सैह़ तुहां जो दूये बसुआसियां सौगी मिली करी तिसदी अराधना करणे तांई भी ग्लांदा ऐ। तुहां जो दूये लोकां जो भी दस्सणा ऐ कि तिन्हीं तुहां तांई क्या कित्या ऐ। जे तुहां इन्हां सारेयां कम्मां जो करन, तां तुहां तिसदे इक्क पक्के साथी बणी जांगे।