48. यीशु ई सच्चा मसीह ऐ

जाह़लू परमात्मैं संसारे जो बणाया तां सब कुच्छ ठीक था, कने कोई पाप नी था। आदम कने हव्वा इक्क दूये नैं प्यार करदे थे, कने सैह़ परमात्मे नैं भी प्यार करदे थे। कोई बमारी कने मौत नीं थी। परमात्मा ऐदेया संसार चांहदा था।

शैतान सर्प बणी नैं बगीचे च हव्वा सौगी गल्लां कित्तियां, कजोकि सैह़ तिसा जो धोखा दैणा चांहदा था। ताह़लू हव्वा कने आदमैं परमात्मे दे खलाफ पाप कित्ता। कजोकि तिन्हां पाप कित्ता था इसतांईं धरतिया पर रैंहणे आल़ा हर माणु मरदा ऐ।

क्जोकि आदम कने हव्वा पाप कित्या था, इसतांई कुच्छ होर भी बुरा होएया। सैह़ परमात्मे दे दुश्मण बणी गे। जिसदिया हर इक्की माणुयैं पाप कित्या ऐ। हर इक्क माणु जन्मे तेई परमात्मे दा दुश्मण ऐ। परमात्मे कने लोकां दे बिच सांति नीं थी। अपर परमात्मा तिन्हां जो सांति दैणा चांहदा था।

परमात्मे बादा कित्ता कि हव्वा दा वंशज शैताने दे सिरे कुचल़गा। तिन्हीं एह़ भी ग्लाया कि शैतान तिसदिया खुरिया जो डसगा, मलतब शैतान मसीह जो मारी दिंगा। अपर परमात्मा तिसियो दोबारा ते भिरी जिन्दा करी दिंगा। इसते बाद, मसीह शैताने दिया ताकता जो हमेसा तांई खत्म करी दिंगा। मतेआं सालां बाद, परमात्मैं प्रकट कित्ता कि सैह़ मसीह यीशु ऐ।

जेह्ड़ी बाढ़ परमात्मा लेयोणे आल़ा था तिसा बाढ़ा ते तिन्हीं अपणा परवार बचाया। तिन्हीं नूहे जो इक्क बड़ी बड्डी किश्ती बणाणैं तांई ग्लाया। इस तरिके नैं परमात्मैं तिन्हां लोकां जो बचाया जेह्ड़ा तिस पर बसुआस करदे थे। सैह़ सारे दे सारे परमात्मे दे जरिये मारी दैणे दे काबिल थे, क्जोकि तिन्हां पाप कित्या था। अपर परमात्मैं तिन्हां सबना जो बचाणे तांई यीशुये जो घल्लेया जेह्ड़े तिस पर बसुआस करदे हन।

मते साल तिकर, याजक परमात्मे तांई बल़िदान चढ़ांदे रैह्। तांजे सारे लोकां पाप कित्या था, इसतांई सैह़ परमात्मे दे जरिये सज़ा पाणे लायक थे। अपर सैह़ बल़िदान तिन्हां देयां पापां जो माफ नीं करी सकदे थे। यीशु सबना ते बड्डा महायाजक ऐ। तिन्हीं सैह़ कित्ता जेह्ड़ा कोई याजक नीं करी सकदा था। तिन्हीं अपणे आप्पे जो बल़िदाने दे रूपे च देई दित्ता, जेह्ड़ा हर कुसी दे पापां ते बचाई सकदा था। तिन्हीं स्वीकार कित्ता कि परमात्मा सब लोकां देयां पापां तांई मिन्जो सज़ा दैं। इसा बजाह ते यीशु सिद्ध महायाजक था।

परमात्मैं अब्राहमे नैं ग्लाया, “मैं तेरे जरिये संसारे दी सारियां जातिआं जो आसीष दिंगा।” यीशु इसी अब्राहमे दा वंसज था। परमात्मा अब्राहमे दे जरिये सारियां जातिआं जो असीस दिंदा ऐ, क्जोकि जेह्ड़े यीशु पर बसुआस करदे हन परमात्मा तिन्हां सारेयां जो पापां ते बचांदा ऐ। जाह़लू एह़ माणु यीशु पर बसुआस करदे हन, तां परमात्मा तिन्हां जो अब्राहमे दे वंशज मनदा ऐ।

परमात्मैं अब्राहमे नैं ग्लाया कि मेरे तांई अपणे पुत्तर इसहाके दा बल़िदान करी दे। परमात्मे इआं करी नैं अब्राहमे दी परख कित्ती। अपर भिरी परमात्मे इसहाके दे बदले बल़ि करणे तांई इक्क भेड्डा दे बच्चे दा इन्तजाम कित्ता। अहां सब अपणेयां पापां च मरणे लायक थे! अपर परमात्मैं अहां दिया जगाह पर मरणे तांई यीशु जो बल़िदान दे रूपे च दित्ता। इस बजाह ते अहां यीशु जो परमात्मे दा मेम्ना ग्लांदे हन।

जाह़लू परमात्मैं मिस्र देसे पर आखरी मुसीबत घल्ली तां तिन्हीं हर इक्क इस्राएली परवारे नैं ग्लाया कि सैह़ इक्क मेम्ने दी बल़ि करन। तिस मेम्ने च कोई दोस नी होणा चाइदा। तिन्हां तिस जो मेम्ने दा खून अपणे दरवाजे दिया चौखटा पर लगाणा था। जाह़लू परमात्मैं तिस खूने जो दिख्या ताह़लू तिन्हां देयां घरां जो छड्डी करी चली गेआ कने तिन्हां देयां जेठेयां पुत्तरां जो नीं मारेया। जाह़लू एह़ होएया तां परमात्मैं इसियो फसह दा त्योहार ग्लाया।

यीशु फसह दे त्योहारे दे इक्क मेम्ने साइआं ऐ। तिन्हीं कदी पाप नीं कित्ता, इसतांई तिस च कुच्छ भी गलत नीं था। सैह़ फसह दे त्योहारे दे बग्त मरेया। जाह़लू कोई यीशु पर बसुआस करदा ऐ, ताह़लू यीशुये दा खून तिस माणुये दे पापां दी कीमत चुकांदा ऐ। कने सैह़ माणु परमात्मे दिया सज़ा ते बची जांदा ऐ।

परमात्मैं इस्राएली लोकां सौगी इक्क वादा कित्ता, क्जोकि सैह़ ऐदेय लोक थे जिन्हां जो परमात्मैं अपणा होणे तांई चुणेया था। अपर हुण परमात्मैं इक्क वादा कित्तेया जेह्ड़ा सबना तांई ऐ। जे कुसी भी जातिआ दा कोई भी माणु इस नौये वादे जो स्वीकार करदा ऐ, तां सैह़ परमात्मे दे लोकां च मिल्ली जांदा ऐ। सैह़ इआं इसतांई करदा ऐ क्जोकि सैह़ यीशु पर बसुआस करदा ऐ।

मूसा इक्क ऐदेया भविष्यवक्ता था जिन्हीं परमात्मे दे वचने जो बड़िया सामर्थी सौगी प्रचार कित्या था। अपर यीशु इन्हां सारे भविष्यवक्तां ते बड्डा ऐ। सैह़ परमात्मा ऐ, इसतांई जेह्ड़ा कुच्छ भी तिन्हीं कित्या कने ग्लाया सैह़ परमात्मे दे कम्म कने वचन थे। इसतांई पवित्रशास्त्र यीशु जो परमात्मे दा वचन ग्लांदा ऐ।

परमात्मैं राजा दाऊदे नैं वादा कित्या था कि तेरा इक्क वंशज राजे साइआं परमात्मे दे लोकां पर हमेसा राज्ज करगा। यीशु परमात्मे दा पुत्तर कने मसीह ऐ, इसतांई सैह़ राजा दाऊदे दा वंशज ऐ जेह्ड़ा हमेसा तांई राज्ज करी सकदा ऐ।

दाऊद तां इस्राएल देसे दा राजा था, अपर यीशु सारे संसारे दा राजा ऐ! सैह़ भिरी वापस ओंगा कने हमेसा तांई न्याय कने सांतिया नैं राज्ज करगा।