47. फिलिप्पी सैहरे च पौलुस कने सीलास

जाह़लू शाऊलैं सारे रोमी सम्राज्य च यात्रा कित्ती तां तिन्हीं अपणे रोमी नांऐ “पौलुस” दा इस्तेमाल करणा सुरू करी दित्ता। इक्क दिन, पौलुस कने तिसदा साथी सीलास फिलिप्पी सैहरे च यीशु दे बारे च खुसखबरी सनाणे तांई गे। सैह़ सैहरे ते बाहर नदिया दे कनारे आल़िआ जगाह पर गै जित्थु लोक प्रार्थना करणे तांई किट्ठे थे। तित्थु सैह़ लुदिया नाए दिया इक्क जणासा नैं मिल्ले जेह्ड़ी इक्क व्यापारी थी। सैह़ परमात्मे नैं प्यार करदी थी कने तिसदी अराधना करदी थी।

परमात्मैं लुदिया दे मने जो यीशु दे बारे च संदेस पर बसुआस करणे तांई त्यार कित्ता। पौलुस कने सीलासैं तिसाजो कने तिसादे परवारे जो बपतिस्मा दित्ता। तिन्नैं पौलुस कने सीलासे जो अपणे घरैं रूकणे तांई ग्लाया, इसतांई सैह़ तित्थु रूकी गै।

पौलुस कने सीलास लोकां नैं अक्सर तिसा जगाह पर मिलदे थे जित्थु यहूदी लोक प्रार्थना करदे थे। हर रोज जाह़लू सैह़ तित्थु जांदे थे तां इक्क दासी कुड़िया जो दुष्टात्मा जकड़ी रखेया था, तिन्हां दा पीछा करदी थी। इसा दुष्टात्मा दे जरिये सैह़ लोकां दा भविष्य दस्सदी थी, इसतांई सैह़ भविष्य दस्सणे आल़ी दे रूपे च अपणे मालिकां तांई बड़ा पैसा कमाई करी दिंदी थी।

तिन्हां दे जांदे बग्त एह़ दासी कुड़ी जोरे नैं डडदी थी, “एह़ माणु परम प्रधान परमात्मे दे सेवक हन। एह़ तुहां जो उद्धार पाणे दा रस्ता दस्सा दे हन!” सैह़ हर रोज इआं ई करदी थी जिसते पौलुस नराज होई गेआ।

इक्क दिन जाह़लू सैह़ दासी कुड़ी डडणा लग्गी, तां पौलुसैं तिसा दी तरफ मुड़ी करी तिसा दे अंदरे आल़िआ दुष्टात्मा नैं ग्लाया, “यीशु दे नांऐ ते इसा कुड़िया ते निकल़ी जा।" तिसी बग्त सैह़ दुष्टात्मा तिसा कुड़िया ते निकल़ी गेई।

तिसा दासी कुड़िया दे मालक बड़े गुस्सा होई गे। तिन्हां जो पता लगी गेआ कि तिसा दुष्टात्मा ते बगैर एह़ कुड़ी लोकां दा भविष्य नी दस्सी सकदी थी। इसदा मतलब था कि लोक हुण तिसादे मालकां जो पैसा नीं दिंगे कि सैह़ तिन्हां जो भविष्य दस्सैं कि तिन्हां सौगी क्या हुंगा।

इसतांई तिसा कुड़िया दे मालकां पौलुस कने सीलासे जो रोमी अधिकारियां अल्ल लेई गे। तिन्हां पौलुस कने सीलासे जो मारेया, कने भिरी तिन्हां जो जेला च पाई दित्ता।

तिन्हां पौलुस कने सीलासे जो जेला च ऐदिया जगाह च रखेया जित्थु मते सपाई थे। ऐत्थु तिकर तिन्हां दे पैरां जो लकड़िया दे खाँचेयां च जकड़ी दित्ते। अपर पौलुस कने सीलास अधिया राती तित्थु परमात्मे दिया अराधना दे गीतां जो गा दे थे।

तिसी बग्त ताह़लू इक्क खतरनाक हिल्लण होएया! जेला दे सारे दरवाजे खुली गर, कने सारे कैदियां दियां जंजीरा खुली गियां।

ताह़लू जेलर जागी गेआ। तिन्हीं दिख्या कि जेला दे दरवाजे तां सारे खुले हन। तिन्हीं सोचेया कि सारे कैदी नठी गे हन। सैह़ डरी गेआ कि इन्हां दे नठणे दिया बजाह ते रोमी अधिकारियां मिन्जो मारी दैणा, इसतांईं सैह़ अपणे आप्पे जो खत्म करणे तांई त्यार होई गेआ! अपर पौलुसैं तिसियो इआं करदे दिक्खी लेआ कने ताह़लू तिस नैं ग्लाया, “रूकी जा। अपणे आप्पे जो खत्म मत कर। अहां सारे कुत्थियो नीं गियो अपर ऐत्थु ई हन।”

तिन्हीं जेलरैं डरदे-डरदे पौलुस कने सीलासे अल्ल आई करी पुछया, “उद्धार पाणे तांई मैं क्या करैं?” पौलुसैं जवाब दित्ता, “प्रभु यीशु पर बसुआस कर, तां तू कने तेरा सारा घराना उद्धार पांगा।” ताह़लू सैह़ जेलर पौलुस कने सीलासे जो अपणे घरे जो लेई गेआ कने तिन्हां दे जख्म साफ कित्ते। पौलुसैं तिसदे घरे दे सारे लोकां जो यीशु दे बारे च खुसखबरी सणाई।

जेलर कने तिसदे सारैं परबारैं यीशु पर बसुआस कित्ता, इसतांई पौलुस कने सीलासैं तिन्हां जो बपतिस्मा दित्ता। ताह़लू जेलरैं पौलुस कने सीलास जो खाणा खुआया, कने सैह़ सारे खुस होये।

दुज्जे दिनैं तिस सैहरे दे अगुवां पौलुस कने सीलासे जो जेला ते अजाद करी दित्ता कने तिन्हां जो ग्लाया फिलिप्पी सैहरे जो चली जा। पौलुस कने सीलास लुदिया कने कुच्छ होरना दोस्तां सौगी मिल्ले कने तिसदे बाद तिस सैहरे ते चली गे। यीशु दे बारे च खुसखबरी फैलदी गेई, कने कलेसिया बधदी गेई।

पौलुस कने होर मसीह अगुवां मतेआं सैहरां दी यात्रा कित्ती। तिन्हां लोकां जो यीशु दे बारे च खुसखबरी सणाई। तिन्हां कलेसियां दे बसुआसियां जो सिक्षा दैणे तांई केई चिट्ठियां भी लिखियां। इन्हां च कुच्छ चिट्ठियां बाइबल दियां कताबां बणी गेईयां।