46. पौलुस दा मसीह बसुआसी बणी जाणा

शाऊल नांऐ दा इक्क माणु था जिन्हीं यीशु पर बसुआस नीं कित्या था। जाह़लू सैह़ जवान था, ताह़लू तिन्हीं स्तिफनुसे जो मारने आल़े लोकां दे कपड़ेयां दी निगरानी कित्तियो थी। बादे च, तिन्हीं बसुआसियां जो सताया था। तिन्हीं यरूशलेम सैहरे च घर-घर जाई करी मर्दां कने जणासां जो गिरफ्तार करी नैं जेला च पाई दित्या था। ताह़लू महायाजकैं शाऊले जो दमिश्क सैहरे च जाणे दा हुक्म दित्ता। महायाजकैं तिस नैं ग्लाया दमिश्क सैहरे च कने तित्थु दे मसीह लोकां जो गिरफ्तार करी नैं वापस यरूशलेम सैहरे च लेई आ।

ताह़लू शाऊलैं दमिश्क सैहरे च जाणे दी यात्रा सुरू कित्ती। तिस सैहेरे च पुज्जणे ते पैहल्लैं तिसदे चौंन्नी पास्सैं अम्बरे ते इक्क चमकदार लौ चमकी, कने सैह़ धरतिया पर पेई गेआ। शाऊलैं कुसी जो ग्लांदे सुणेया, “हे शाऊल! हे शाऊल! तू मिन्जो क्जो सता दा ऐ?” शाऊलैं पुछया, “हे प्रभु, तू कुण ऐ?" यीशुयैं जवाब दित्ता, मैं यीशु ऐ। तू मिन्जो सता दा ऐ !"

जाह़लू शाऊल उठेया तां सैह़ दिखी नीं सकदा था। तिसदे साथी तिसियो दमिश्क सैहरे च लेई गे। शाऊलैं त्रै दिन कुच्छ भी नीं खादा-पीता।

दमिश्क सैहरे च हनन्याह नांऐ दा इक्क यीशु दा चेला था। परमात्मैं तिस नैं ग्लाया, “तिस घरे जो जा जित्थु शाऊल रूकेया ऐ। अपणा हत्थ तिस पर रख तांजे सैह़ दोबारा ते दिखणा लग्गैं।” अपर हनन्याह ग्लाया, “हे प्रभु, मैं सुणेया ऐ कि इन्हीं माणुये बसुआसियां जो सताया ऐ।” परमात्मैं तिसियो जवाब दित्ता, "जा! मैं तिसियो यहूदी लोकां च कने होरनी जातिआं दे लोकां च मेरे नांऐ दी घोषणा करणे तांई चुणी लेआ ऐ। सैह़ मेरे तांई बड़े दुख झेलगा।”

ताह़लू हनन्याह शाऊले अल्ल गेआ, कने अपणा हत्थ तिस पर रखेया कने ग्लाया, “यीशु, जेह्ड़ा ऐत्थु ओंदे बग्त रस्ते च तिज्जो पर प्रकट होएया था, तिन्हीं मिन्जो तिज्जो अल्ल घल्लेया ऐ तांजे तू दोबारा ते दिखणा लग्गैं, कने पवित्र आत्मा सौगी तू भरौई जां।” तिसी बग्त शाऊले जो दोबारा ते सुज्जणा लग्गी पेआ, कने हनन्याह तिसियो बपतिस्मा दित्ता। ताह़लू शाऊलैं खाणा खादा कने दोबारा ते ताकतवर होई गेआ।

तिसी बग्त शाऊलैं दमिश्क सैहरे च रैंहणे आल़ेआं यहूदी लोकां च प्रचार करणा सुरू करी दित्ता। तिन्हीं ग्लाया, “यीशु ई परमात्मे दा पुत्तर ऐ।” यहूदी लोक हरान थे, क्जोकि शाऊलैं तां बसुआसियां जो मारणे दी कोसिस कित्तियो थी, अपर हुण एह़ यीशु दा बसुआसी बणी गेआ था। शाऊलैं यहूदी लोकां सौगी वाद-विवाद कित्ता। तिन्हीं दस्सेया कि यीशु ई मसीह ऐ।

मतेआं दिनां बाद, यहूदी लोकां शाऊले जो मारी दैणे दी योजना बणाई। तिन्हां तिसियो मारी दैणे तांई सैहरे दे खास दरवाजे पर लोकां जो घल्लेया, कि तिसदी निगरानी करा अपर शाऊलैं तिसा योजना दे बारे च सुणी लेआ, कने तिसदे साथियां तिन्हां ते बचाणे तिसदी मदत कित्ती। इक्क दिन तिन्हां राती दे बग्त तिसियो टोकरिया च बैठाई करी सैहरे दिया दीवारा ते तिसियो थल्लैं लौआई दित्ता। दमिश्क सैहरे ते बची करी निकल़ने ते बाद शाऊलैं यीशु दे बारे च प्रचार करणा नीं छड्डेया।

शाऊल प्रेरितां नैं मिलणे तांई यरूशलेम सैहरे जो गेआ, अपर सैह़ तिसते डरदे थे। ताह़लू बरनबास नांऐ दा इक्क बसुवासी शाऊले जो प्रेरितां अल्ल लेई करी गेआ। तिन्हीं तिन्हां जो दस्सेया कि शाऊलैं किआं हिम्मत रखी करी दमिश्क सैहरे च प्रचार कित्ता था। तिसते बाद, प्रेरितां शाऊले जो स्वीकार करी लेआ।

कुच्छ बसुआसी जेह्ड़ा यरूशलेम सैहरे च सताव दिया बज़ाह गियो थे सैह़ दूर अंताकिया सैहरे च चली गियो थे कने तित्थु यीशु दे बारे च प्रचार करदे थे। अंताकिया सैहरे च रैंहणे आल़े लोक जादातर यहूदी नीं थे, अपर पैहल्ली बरी, सैह़ लोक जेह्ड़े यहूदी नीं थे सैह़ लोक बसुआसी बणी गे। बरनबास कने शाऊल इन्हां नौये बसुआसियां जो यीशु दे बारे च होर ज्यादा सखाणे तांई तित्थु गे कने कलेसिया जो मजबूत कित्ता। यीशु पर बसुआस करणे आल़े पैहल्ली बरी अंताकिया सैहरे च मसीह बणे।

इक्क दिन, अंताकिया सैहरे दे मसीह लोक व्रत रखी नैं प्रार्थना करदे थे। पवित्र आत्मा तिस नैं ग्लाया, “मिन्जो तांई बरनबास कने शाऊले जो तिस कम्मे जो करने तांई लग्ग करी दित्ता जिसियो करणे तांई मैं तिन्हां जो सद्देया ऐ।” इसतांई अंताकिया सैहरे दिया कलेसिया बरनबास कने शाऊले तांई हत्थ रखी करी प्रार्थना कित्ती। ताह़लू तिन्हां सैह़ यीशु दे बारे च खुसखबरी दा प्रचार करणे तांई दूईया जगाह च घल्ली दित्ता। बरनबास कने शाऊलैं लग्ग-लग्ग जातिआं देयां लोकां जो सिक्षा दित्ती, कने मतेआं लोकां यीशु पर बसुआस कित्ता।