45. स्तिफनुस कने फिलिप्पुस

पैहल्ले दे मसीह अगुवां च स्तिफनुस नांऐ दा इक्क माणु था। सारे लोक तिसदा आदर करदे थे। पवित्र आत्मा तिसियो बड़ी सामर्थ कने अक्ल दित्तियो थी। स्तिफनुसैं मते चमत्कार कित्यो थे। जाह़लू तिन्हीं यीशुये पर बसुआस करणे दे बारे च तिन्हां जो सिक्षा दित्ती तां मतेआं लोकां यीशु पर बसुआस कित्ता।

इक्क दिन, स्तिफनुस यीशु दे बारे च सिक्षा दे दा था, कने कुच्छ यहूदी माणु आये जिन्हां यीशु पर बसुआस नी कित्ता था कने तिस सौगी बैंह्सवाजी करणा लग्गे। सैह़ बड़ा गुस्सा होई गे, इसतांई सैह़ धार्मिक अगुवां अल्ल गे कने तिन्हां दे बारे च झूठ ग्लाया। तिन्हां ग्लाया, “अहां स्तिफनुसे जो मूसा कने परमात्मे दे बारे च बुरियां गल्लां ग्लांदे सुणेया ऐ!" इसतांई धार्मिक अगुवां स्तिफनुसे जो गिरफ्तार करी लेआ कने तिसियो महायाजक कने यहूदियां दे होरनी अगुवां दे सामणैं पेस कित्ता। कने होर भी झूठे गवाह आये कने तिन्हां स्तिफनुससे दे बारे च झूठ ग्लाया।

महायाजकैं स्तिफनुसे ते पुछया, “क्या एह़ लोक तेरे बारे च सच्च ग्ला दे हन?” स्तिफनुसैं महायाजके जो जवाब देणे तांईं मतिआं गल्लां ग्लाईयां। तिन्हीं ग्लाया कि अब्राहम दे बग्ते ते यीशु दे बग्ते तिकर परमात्मैं इस्राएली लोकां तांईं मते अनोखे कम्म कित्ते हन। अपर लोकां हमेसा परमात्मे दा हुक्म नी मनेया था। स्तिफनुसैं तिन्हां जो एह़ भी ग्लाया, “तुहां लोक परमात्मे दे खलाफ बगाबत करणे आल़े कने ढीठ हन। तुहां हमेसा पवित्र आत्मा जो स्वीकार नीं कित्ता, जिआं अहां देयां पुर्वजां हमेसा पवित्र आत्मा जो स्वीकार नीं कित्ता था कने हमेसा तिसदेयां भविष्यवक्तां जो मारी दित्ता था। अपर जेह्ड़ा तिन्हां कित्या था तिसदिया तुलना च तुहां होर भी बुरा कम्म कित्या ऐ! तुहां मसीह जो मारी दित्ता !"

जाह़लू तिन्हां धार्मिक अगुवां एह़ सुणेया, तां सैह़ इतणा गुस्सा होई गै कि तिन्हां अपणेयां कन्नां जो बन्द करी लेआ कने जोरे नैं डडणा लग्गे। कने सैह़ स्तिफनुसे जो घसीटी करी सैहरे ते बाहर लेई गे कने तिसियो जान्नी ते मारी देणे तांई तिस जो पत्थर मारे।

जाह़लू स्तिफनुस मरणा लगेया था, ताम तिन्हीं उठी करी जोरे नैं ग्लाया, “हे यीशु मेरिया आत्मा जो अपनाई ले!” ताह़लू सैह़ अपणेयां गोड्डेयां पर पेई गेआ कने भिरी जोरे नैं ग्लाणा लग्गा, “हे प्रभु परमात्मा, एह़ पाप इन्हां पर मत लगांदा।” ताह़लू सैह़ मरी गेआ।

तिस दिन, यरूशलेम सैहरे च रैंहणे आल़े मतेआं लोकां यीशु दे चेलेयां जो सताणा सुरू करी दित्ता, इसतांई बसुआसी लोक दूईयां जगांह जो नठी गे। अपर इसदे बाबजूद भी, जित्थु कुत्थी भी सैह़ गे तिन्हां यीशु दे बारे च प्रचार कित्ता।

फिलिप्पुस नांऐ दा इक्क माणु यीशु पर बसुआस करदा था। जिआं दूये बसुआसी लोक नठी गियो थे सैह़ भी यरूशलेम सैहरे ते नठी गेआ। सैह़ सामरिया प्रदेसे जो चली गेआ। तित्थु तिन्हीं लोकां च यीशु दे बारे च प्रचार कित्ता। मतेआं लोकां यीशु पर बसुआस कित्ता कने उद्धार पाएया। इक्क दिन, फिलिप्पुसे अल्ल परमात्में दिया तरफा ते इक्क स्वर्गदूत आएया कने तिसियो सुनसाण जगाह च जाणे तांई, कने इक्क सड़का पर चलणे तांई ग्लाया। फिलिप्पुस तित्थु चली गेआ। जाह़लू सैह़ तिसा सड़का पर चलेया था, तां तिन्हीं इक्की माणुये जो अपणे रथे च जांदे दिख्या। एह़ माणु कुश देसे दा इक्क खास अधिकारी था। पवित्र आत्मा फिलिप्पुसे नैं ग्लाया कि जाई करी तिस माणुये दे रथे सौगी-सौगी चल कने तिस नैं गल्ल कर।

इसतांई फिलिप्पुस रथे अल्ल गेआ। तिन्हीं सुणेया कि सैह़ कुशी अधिकारी परमात्मे दे वचने जो पढ़ा दा था। जेह्ड़ा यशायाह भविष्यवक्तैं लिख्या था। सैह़ एह़ पढ़ा दा था, “सैह़ तिसियो बल़ि करणे आल़िआ भेड्डा साइआं लेई गे, कने जिआं इक्क भेड्डा दा बच्चा ऊन कतरणे दे बग्त सांत हुंदा ऐ, तिआं ई तिन्हीं भी कुच्छ नीं ग्लाया। तिन्हां तिस सौगी बुरा बर्ताव कित्ता कने तिसदा आदर नीं कित्ता। तिन्हां तिसदे प्राण लेई ले।"

फिलिप्पुसैं तिस कुशी अधिकारी ते पुछेया, "जेह्ड़ा तू पढ़ा दा ऐ क्या तू तिसियो समझदा भी ऐ?" तिन्हीं जवाब दित्ता, “नीं। जाह़लू तिकर मिन्जो कोई नीं समझां, ताह़लू तिकर मैं इसियो नीं समझी सकदा। करिपा करी नैं मिन्जो अल्ल आई करी बैठ कने मिन्जो समझा। यशायाह एह़ अपणे बारे च लिख्या ऐ या कुसी होरसी दे बारे च?"

फिलिप्पुस रथे पर चढ़ी करी बैठी गेआ। ताह़लू तिन्हीं तिस कुशी अधिकारिये जो सैह़ वचन दस्सेया जेह्ड़ा यशायाहैं यीशु दे बारे च लिख्या था। फिलिप्पुसैं परमात्मे दे होर भी वचन दस्से। इस तरिके नैं तिन्ही यीशु दे बारे च खुसखबरी सुणी कने तिन्हीं यीशु पर बसुआस कित्ता।

फिलिप्पुस कने सैह़ कुशी अधिकारी इक्क नदिया दे कनारे अल्ल आये। तिन्हीं कूशी अधिकारियैं ग्लाया, “दिख! ऐत्थु पाणी ऐ! क्या मैं बपतिस्मा लेई सकदा ऐ?" फिलिप्पुसैं ग्लाया, “जे तू अपणे पूरे मने नैं यीशु पर बसुआस करदा ऐ, तां तू लेई सकदा ऐ।” तिन्हीं ग्लाया मैं यीशु पर बसुआस करदा ऐ कि यीशु ई परमात्मे दा पुत्तर ऐ। ताह़लू तिन्हीं अपणे सपाईये जो रथे जो रोकणे तांई ग्लाया।

ताह़लू सैह़ पाणिये च चली गे, कने फिलिप्पुसैं तिस कुशी अधिकारिये जो बपतिस्मा दित्ता। जाह़लू सैह़ पाणिये ते बाहर आये, तां पवित्र आत्मा फिलिप्पुसे जो चाणचक कुसी होरसी जगाह जो लेई गेआ। तित्थु फिलिप्पुस लोकां जो यीशु दे बारे च दस्सदा रेह्आ।

सैह़ कुशी अधिकारी बड़ा खुस होई करी अपणे सैहरे जो वापस चली गेआ। क्जोकि सैह़ हुण यीशु दे बारे च जाणी गेआ था।